မဲခေါင်၊ ဇန်နဝါရီ ၂၉
ထိုင်းနိုင်ငံက ပြောင်းအဝယ်လိုက်လာသဖြင့် ရှမ်းပြည်နယ်အရှေ့ပိုင်း၊ တာချီလိတ်သို့ ပြောင်းများ ပေးပို့နိုင်သော်လည်း ပေးဆောင်ရတဲ့အခွန် ၃ ထပ်ကြောင့် အမြတ်မရှိဘဲ ငွေပေါ်ရောင်းချရတဲ့ အနေအထား ဖြစ်တယ်လို့ တောင်သူများထံက သိရပါတယ်။
လာမယ့် ဖေဖော်ဝါရီ ၁ ရက် က စပြီး တာချီလိတ်တံတားအမှတ်(၂)က တင်ပို့နိုင်မယ့် ပြောင်းဈေးကွက်တွင် မြန်မာ-ထိုင်း စာရွက်စာတမ်း (Form-E) အပြီးအစီး တစ်ပိဿာကို ၁၃၇၀ က ၁၃၈၀ ဈေးပေးဝယ်နေတဲ့အတွက် အေးစက်နေတဲ့ ပြောင်းဈေးကွက် အနည်းငယ်လှုပ်ခတ်လာ တာဖြစ်ပါတယ်။
အဓိက အခွန် ၃ ထပ်ကြောင့် အမြတ်မရနိုင်တာ၊ လမ်းကြေး၊ တာချီလိတ်မြို့အဝင်ကြေး၊ နဲ့ တံတားကြေးတွေက အမြတ်မပြောနဲ့အရင်းထဲက တောင်ပါချင်နေတာ၊ အစိုးရတရားဝင် အခွန်ပဲဆောင်ရရင် တောင်သူတွေ တွက်ချေကိုက်နိုင်ပါတယ်
လို့ ပြောင်းတောင်သူ တစ်ဦးက ပြောပါတယ်။
နမ့်စန်က တာချီလိတ်သို့ ပြောင်းတင်ပို့ရာတွင် လမ်းကြေး ၈ သိန်းခန့်၊ တာချီလိတ်မြို့ဝင်ကြေး ၅ သိန်းတို့ကို ပေးဆောင်ရသလို တရားဝင်အခွန် ၁၄ သိန်းကျော် ကုန်ကျတာ စုစုပေါင်း ၂၇ သိန်း လောက် ကုန်ကျတယ်လို့ သိရပါတယ်။
နှစ်စဉ် တရုတ်နိုင်ငံဖက်ကို အများအပြားတင်ပို့နေရတဲ့ ပြောင်းဈေးကွက်ဟာ စစ်ကောင်စီက အာဏာသိမ်းပြီးနောက်ပိုင်းနဲ့ အခုရှမ်းပြည်နယ်အခြေအနေကြောင့် အရောင်းအဝယ် အေးစက်နေတဲ့နေရာမှာ ထိုင်းဘက်က အဝယ်လိုက်လာတာဖြစ်လို့ ပြောင်းတောင်သူတွေ အနည်းငယ်အသက်ရှုချောင်ရတယ်လို့ ငွေပေါ်တာပေါ့လို့ သူက ပြောပါတယ်။
၂၀၂၃ ခုနှစ်မှာ ရင်းထားရတဲ့ စိုက်ပျိုးစားရိတ်တွေက အတက်ဈေးနဲ့ ဝယ်ယူထားရတာဖြစ်ပြီး ပြောင်းမျိုးကို ယခင်ပုံမှန်ပေါက်ဈေးထက်၂ ဆ၊ မြေသြဇာကို ၃ ဆ၊ စိုက်စားရိတ် ၃ ဆ နဲ့ရင်းထားကြရပြီး ၂၀၂၁ က ပြောင်းဈေး ကျပ် ၆၀၀ လောက်သာ ရှိပေမယ့် ခု ၁၂၀၀ ကျော်ရောင်းရလဲ တွက်ချေမကိုက်ဘူးလို့ ဆိုကြပါတယ်။
အခုက ၁၀၀၀ အောက်ဈေးပဲ ရောင်းရနေရတာဖြစ်လို့ တရုတ်နှစ်သစ်ကူးပြီးရင် ဈေးတက်လေ့ရှိတာကိုပဲ မျှော်လင့်နေရတယ်လို့ ပြောကြပါတယ်။
ယခုဈေးအတိုင်း ဆက်သွားနေရင်တော့ နောက်နှစ်ပြောင်းစိုက်ဖို့ ကြောက်သွားကြမှာ
လို့ မြန်မာနိုင်ငံပြောင်းစိုက်ပျိုးထုတ်လုပ်သူများအသင်းက ဦးတိုးတက်နိုင်က ပြောပါတယ်။
ပြောင်းစိုက်တောင်သူတွေအနေနဲ့ ပြောင်းအစိုဓာတ် ၁၅ ဒီဂရိအောက်မှာ ထားသိုကြပြီး လပိုင်းလောက်မစောင့်ဘဲ ရောင်းချင်ကြသူတွေအနေနဲ့ ချင့်ချိန်ရောင်းကြဖို့ သူက အကြံပြုပါတယ်။
ဈေးကွက်အရောက် ဈေးတွေကတော့ ရန်ကုန် ၁၀၈၀ ကျပ်က ၁၁၅၀ ၊ မန္တလေး ၉၇၀ က ၁၀၀၀ ၊ တောင်ကြီး ၉၃၀ က ၉၆၀၊ လားရှိုး ၇၃၀ က ၇၈၀ ၊ သင်္ဘောတစ်တန် ၆၂၃ ပိဿာ ကို ၂၂၀ ဒေါ်လာကနေ ၂၅၀ ဒေါ်လာ၊ ထိုင်း ၁၀ ဘတ်က ၁၂ ဘတ် နဲ့ တရုတ်လမ်းဖွင့်ရင် နယ်စပ်ဈေး ၁၀၅ယွမ်က ၁၂၀ ထိ ရှိနိုင်တယ်လို့ သူ့ထံက သိရပါတယ်။
ပြောင်းတစ်အိတ်လျှင် ၃၀. ၆၂ ပိဿာ ဆိုသော်လည်း အစိုဓတ်အလျော့တွက်အတွက် ထပ်ဆောင်းကာ ၃၀.၇၅ ပိဿာကို တောင်သူတွေက ၅၀ ကီလိုအနေနဲ့ ထည့်သွင်းရပြီး ပြောင်းကားတစ်စီးလျှင်၃၅ တန်( အိတ် ၇၀၀ က ၇၂၀ အထိ) တင်ဆောင်ပြီး ကားခကတော့ ဝေးလေ ဈေးပေးရလေ
ဖြစ်တယ်လို့ ပြောင်းတင်ကားဈေးကွက် ကသိရပါတယ်။
ပြောင်းမှာ သီးနှံခွန်အတွင်း မပါရှိပေမယ့် လမ်းတွေမှာ သီးနှံခွန်အနေနဲ့ ဆောင်ရတာအပြင် တရားမဝင်ကောက်ခံမှုတွေကလည်း ကားတစ်စီးကို ၂၇ သိန်းက သိန်း ၃၀ လောက်ထိ ရှိနေတယ်လို့ သိရှိရပါတယ်။
ရှမ်းပြည်နယ်တောင်ပိုင်းက ထွက်ရှိတဲ့ ပြောင်းများကို အရင်က တစ်အိတ်လျှင် ၅၀၀ ကျပ်သာ ပေးဆောင်ရတဲ့ ဂိတ်တွေမှာ ကျပ် ၁၀၀၀ အထိ ပေးဆောင်နေရတယ်လို့ စုံစမ်းသိရှိရပါတယ်။
ခုချိန်မှာတော့ မြို့အလိုက်ဒေသဈေးနှုန်း(တစ်ပိဿာ)က နမ္မတူ ကျပ် ၅၀၀၊ ကျောက်မဲ ၉၀၀ ၊ ဆတ်သေ ၉၀၀၊ လဲချား ၇၅၀၊ အောင်ပန်း၉၅၀ တို့ ရှိနေကြောင်း စုံစမ်းသိရှိရပါတယ်။
MK – 012
#MeKongNews
#ပြောင်းစျေး
#ထိုင်း
#အခွန်
#တောင်သူ