မဲခေါင်၊ ဖေဖော်ဝါရီ ၂

ဖေဖော်ဝါရီ ၁၀ ရက် မှာ ရောက်ရှိမယ့် တရုတ်နှစ်သစ်ကူးနေ့နီးလာပေမယ့် ဖရဲသီးဈေး သိပ်မရသေးလို့ ပြည်တွင်းဖရဲဈေးကွက်မှာ ရောင်းလိုအားသာရှိပြီး ဝယ်လိုအား နည်းနေတယ်လို့ မိုင်းလားဖရဲဈေးကွက်က သိရပါတယ်။

နှစ်စဉ်တိုင်း ဖရဲ၊ သခွားမွှေး ဈေးတက်တတ်သော်လည်း ဒီနှစ်မှာတော့ နှစ်သစ်ကူးအနီး ရက်သတ္တပတ်အလိုမှာ ဖရဲဈေးက သိပ်မရလို့ ကြန့်ကြာတဲ့အခြေအနေတွေ လမ်းခရီးကုန်ုကျစားရိတ်တွေကြောင့် ဈေးကွက်ကို တွက်ချက်ချင့်ချိန်ပြီးမှ သယ်ပို့ရောင်းချကြဖို့ ဖရဲကုန်သည်တွေက အကြံပြုကြပါတယ်။

ကားတင်ရင် ၁၅ တန် ၁၆ တန်ပဲတင်ဖို့ ဝိတ်အရမ်းများရင် အပေါ်ဝိတ်နဲ့ အောက်သီးတွေပျက်စီးတယ်၊ ဈေးကမှန်းတဲ့အထိ ရောက်မလာသေးပေမယ့် တက်ရိတ်တော့ရှိတယ်၊ ကိုယ့်ဖက်က သေသေချာချာပြင်ဆင် တင်လာဖို့တော့ လိုတယ်၊ မဟုတ်ရင် ပယ်သီးတွေ ဖြစ်ရင် ရှုံးကြမှာလို့ ဝေလျှံ သစ်သီးရောင်းဝယ်ရေး ပွဲရုံက ပြောပါတယ်။

ဈေးကောင်းရဖို့ရန်မှာ အသီးအရည်အသွေးကောင်းတာ၊ ပစ္စည်းထည့်တာ၊ ကားတင်တာ၊ ဂျပ်ဖာချောင်တာကအစ အခွံကောင်း၊ မကောင်းတွေ အရေးကြီးသလို အချိန်မီရောက်ဖို့လဲ လိုတယ်၊ ဈေးကလဲ မငြိမ်ဘူး၊ ရောက်တဲ့အချိန် ရတဲ့ဈေးနဲ့ဝယ်လက်လိုအပ်ချက်အပေါ် မူတည်တယ်လို့ ပြောပါတယ်။

မိုင်းလားဘက်ကို မန္တလေးဘက်က ကားငှားတာ ကားသမားတွေ လိုက်ချင်တဲ့သူမရှိလို့ အသီးရောင်းချဖို့ အရမ်းခက်နေတယ်လို့ မန္တလေးသစ်သီးဝလံ ဈေးကွက်က ဆိုပါတယ်။

လမ်းက တောင်းတာတွေပေးရတာနဲ့ ဆက်ဆံရတာ၊ မိုင်းလား အဝင်ကနေ တာလော့ ဖရဲကွင်းကိုရောက်ဖို့ စောင့်ရတဲ့ရက်နဲ့တွက်ချေမကိုက်လို့ မလိုက်ချင်ကြဖူးလို့ ပြောကြလို့ ကားရှာခက်နေတယ်လို့ ဆိုပါတယ်။
မန္တလေးကနေ မိုင်းလားအထိ ကားခ သိန်း ၇၀ ထက်ပိုမိုကုန်ကျသလို ဂိတ်ကြေးတွေ အပါအဝင် ကျပ်သိန်း ၂၀၀ ကျော် ရင်းရပြီး ပယ်သီးအဖြစ် သတ်မှတ်ခံရပါက လုံး၀ ဆုံးရှုံးကြရတာဖြစ်လို့ ကုန်သည်တွေလဲ ဈေးပေးရပြီး အသီးကောင်းဖို့နဲ့ အချိန်မီရောင်းချရဖို့ လိုအပ်နေတယ်လို့ ဆိုပါတယ်။

အလားတူ၊ အဓိက ဖရဲစိုက်တဲ့ ပဲခူးတိုင်းနဲ့အခြားနေရာတွေက တောင်သူတွေကလဲ ဖရဲရောင်းချနိုင်ရေး ကုန်သည်မျှော်နေရတဲ့အခြေအနေနဲ့စိုက်လို့ကုန်ကျခဲ့ရတဲ့စားရိတ် ဒီနှစ်အတွက် အရင်းပြန်ရရှိရေး မျှော်လင့်နေကြတယ်လို့ သိရပါတယ်။

မနေ့က ဆို မိုင်းလားအဝင်ကနေ ဖရဲကွင်းအထိ ကားစီးရေ ၅၀၀ ကျော်လောက်ရှိတယ်၊ ဒီနေ့လဲ ဝင်နိုင်တဲ့အခြေအနေမမြင်သေးဘူး၊ အသီးတွေ မပျက်စီးဖို့ ရင်မနေရတယ်၊ ဒီနေ့ဆို သခွားမွှေးဈေးက အေးသွားပြန်တယ်တဲ့၊ မနက် ၉နာရီကနေ စပြီး ဖရဲကွင်းကလက်ခံတာ၊ ညနေ အထိပေါ့၊ တရုတ်နှစ်သစ်ကူးတောင်နေ့တစ်ဝက်ပဲ ပိတ်မယ်ပြောတယ်ဟု ကုန်သည်တစ်ဦးက ပြောပါတယ်။

ပြည်တွင်း က တရုတ်သို့ ဖရဲအပါအဝင် သစ်သီးဝလံတင်ပို့မူဆယ် လမ်းကြောင်းသို့နှစ်စဉ်တင်ပို့နေရာမှ လမ်းခရီးအခြေအနေများကြောင့် ရှမ်းအရှေ့မိုင်းလားသို့တင်ပို့ကြရတာဖြစ်ပါတယ်။

အစေ့မဲ့ဖရဲ၊ 855 ၊ ထျန်ဝမ့်၊ ရွှေသခွားမွှေး များကို တရုတ်ပြည်က အထူးကြိုက်နှစ်သက်သည့်အတွက် မြန်မာက ဖရဲနဲ့သခွားကို နှစ်စဉ်ဝယ်ယူနေကြတာဖြစ်ပြီး တရုတ်ရိုးရာနှစ်သစ်ကူးနီးလျင်ပိုမို ဝယ်.ယူကြတာဖြစ်လို့ ဈေးကောင်းရရန် ဖရဲစိုက်တောင်သူနဲ့ကုန်သည်များ မျှော်လင့်လျက်ရှိနေတယ်လို့ စုံစမ်းသိရှိရပါတယ်။

MK – 012

#MeKongNews

#သစ်သီး

#ဖရဲ

#သခွား

#မိုင်းလား

#တရုတ်နှစ်ကူး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)