မဲခေါင်၊ မေ ၂
ကယား(ကရင်နီပြည်)တွင်း အရပ်သားတွေ ထိခိုက်သေဆုံးမှု သိသိသာသာ တိုးလာတဲ့အတွက် မြေမြုပ်မိုင်း ရှင်းလင်းရေးလုပ်ငန်းတွေကို ဒေသခံတွေနဲ့ လက်တွဲပြီး လုပ်ဆောင်နေတယ်လို့ ကရင်နီပြည် ကြားကာလအုပ်ရေးကောင်စီ (IEC)က ဒီနေ့ (မေ ၁)မှာ ထုတ်ပြန်လာပါတယ်။
ကရင်နီပြည်အတွင်း ရပ်ကွက်/ကျေးရွာ အများစုမှာ မြေမြုပ်မိုင်း အပါအဝင် မပေါက်ကွဲသေးတဲ့ ကြွင်းကျန် စစ်လက်နက်သုံးပစ္စည်း အန္တရာယ်တွေ ကြီးမားနေဆဲ ဖြစ်တာကြောင့် အင်အားစု အသီးသီးနဲ့ ပူးပေါင်းပြီး မိုင်းအန္တရာယ် ကင်းရှင်းရေး အသိပညာပေးခြင်းနဲ့ လေကြောင်းအန္တရာယ် ကာကွယ်ရေး လုပ်ငန်းစဉ်တွေကို ကြိုးပမ်း ဆောင်ရွက်နေတယ်လို့ ဆိုပါတယ်။
မိုင်းအန္တရာယ်ကာကွယ်ရေးအတွက် သက်ဆိုင်ရာမြို့နယ်၊ ကျေးရွာအုပ်စု၊ အုပ်ချုပ်ရေးအဖွဲ့တွေနဲ့ တော်လှန်ရေးတပ်ပေါင်းစုံက တာဝန်ရှိသူတွေရဲ့ အတည်ပြုချက် တစ်စုံတစ်ရာမရရှိဘဲ မိမိတို့ရပ်ကွက်ကျေးရွာတွေမှာ ပြန်လည်နေထိုင်တာမျိုး မပြုလုပ်ကြဖို့နဲ့ ပြန်လည်အခြေချနေထိုင်ခွင့် ပေးထားတဲ့ ကျေးရွာရပ်ကွက်တစ်ချို့မှာလည်း သတ်မှတ်ထားတဲ့နေရာမှာပဲ နေထိုင်သွားလာကြဖို့၊ ကန့်သတ်ထားတဲ့နယ်မြေတွေကို သွားလာခြင်းမပြုကြဖို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် မိမိပတ်ဝန်းကျင်နေထိုင်ရာဒေသမှာ မြေမြုပ်မိုင်းနဲ့ ပေါက်ကွဲစေတတ်တဲ့ စစ်လက်နက်ပစ္စည်းတွေ တွေ့ရှိခဲ့ရင်လည်း သက်ဆိုင်ရာ ရပ်ကွက်ကျေးရွာအုပ်ချုပ်ရေးအဖွဲ့နဲ့ တော်လှန်ရေးတပ်ပေါင်းစုံတာဝန်ရှိသူတွေရဲ့ လိုအပ်ချက်အရထုတ်ပြန်တဲ့ မြေမြုပ်မိုင်းအန္တရာယ်ဆိုင်ရာ စည်းကမ်းသတ်မှတ်ချက်တွေကို လိုက်နာကြဖို့ IEC ရဲ့ ထုတ်ပြန်ထားတယ်လို့ သိရပါတယ်။
MK-015