ဘန်ကောက်၊ ဇန်နဝါရီ ၂၁
ထိုင်းအစိုးရရဲ့လက်ရှိ ဆိုင်ဘာမှုခင်းတိုက်ဖျက်ရေးအစီအစဉ်ကြောင့် လိမ်လည်တဲ့ဘဏ်အကောင့် ၅၀၀၀၀ ကျော်နဲ့ လောင်းကစားဝက်ဆိုက် ၂၀၀၀ နီးပါးပိတ်သိမ်းနိုင်ခဲ့တယ်လို့ ထိုင်းအစိုးရပြောခွင့်ရသူ ရတ်ချာနာ နာဒီရက်က ကြာသပတေးနေ့မှာ ပြောပါတယ်။
ထိုင်းဒစ်ဂျစ်တယ်စီးပွားရေးနှင့်လူ့အသိုက်အဝန်းဝန်ကြီးဌာန၊ ရုပ်သံလွှင့်နှင့်ဆက်သွယ်ရေးကော်မရှင်၊ ငွေကြေးခဝါချမှုတိုက်ဖျက်ရေးကော်မရှင်နဲ့ ထိုင်းဗဟိုဘဏ်တို့က ပြီးခဲ့တဲ့နှစ်မှာစတင်ခဲ့တဲ့အစီအစဉ်ကို ပူးပေါင်းဆောင်ရွက်ခဲ့ကြတယ်လို့လည်း ပြောပါတယ်။
လိမ်လည်တဲ့ဘဏ်အကောင့် ၅၈၄၆၃ ကောင့်နဲ့ လောင်းကစားဝက်ဆိုက် ၁၈၃၀ ခုကို ၂၀၂၂ ခုနှစ်မှာ ပိတ်သိမ်းနိုင်ခဲ့တယ်လို့ သူကပြောပါတယ်။
လိမ်လည်တဲ့ဝက်ဆိုက်လိပ်စာတွေ ပေးပို့တဲ့ ဖုန်းနံပါတ် ၁၁၈၅၃၀ ခုကိုလည်း ပိတ်သိမ်းထားတယ်လို့ ပြောပါတယ်။
သေသေချာချာစောင့်ကြည့်နေမယ့် သံသယဘဏ်အကောင့်တွေစာရင်းကိုလည်း ငွေကြေးခဝါချမှုတိုက်ဖျက်ရေးကော်မရှင်က စာရင်းပြုစုထားတယ်လို့ အသိပေးပါတယ်။
www.ThaiPoliceOnline.com ဝက်ဆိုက်မှာ အွန်လိုင်းလိမ်လည်မှုတွေ တိုင်ကြားနိုင်တယ်လို့လည်း အသိပေးပါတယ်။
၂၀၂၂ ခုနှစ်အတွင်း ထိုင်းနိုင်ငံမှာ အွန်လိုင်းလိမ်လည်မှု ၁၆၃၀၉၁ ခုဖြစ်ပွားခဲ့ပြီး ဘတ်သန်း ၂၇၃၀ ကျော် ထိခိုက်နစ်နာခဲ့တယ်လို့ ထိုင်းရဲတပ်ဖွဲ့ရဲ့ စာရင်းတွေအရ သိရပါတယ်။
Source – Bangkok Post
ဥက္ကာ #MeKongNews
Photo – Bangkok Post
