မဲခေါင်၊ ဖေဖော်ဝါရီ ၂

အမျိုးသား ညီညွတ်ရေး အစိုးရအဖွဲ့ ပြည်ထောင်စုဝန်ကြီးတွေနဲ့ ပြင်သစ် အောက်လွှတ်တော် ကိုယ်စားလှယ် အဖွဲ့တို့ မနေ့က နေ့လယ်ပိုင်းမှာ တွေ့ဆုံခဲ့တယ်လို့ သိရပါတယ်။

ဖေဖော်ဝါရီလ ၁ ရက် နေ့လယ် ၁ နာရီမှာ အမျိုးသား ညီညွတ်ရေး အစိုးရ၊ လူသားချင်းစာနာ ထောက်ထားရေးနှင့် ဘေးအန္တရာယ် ဆိုင်ရာ စီမံခန့်ခွဲရေး ပြည်ထောင်စုဝန်ကြီး ဒေါက်တာ ဝင်းမြတ်အေး၊ လူ့အခွင့်အရေးဆိုင်ရာ ပြည်ထောင်စုဝန်ကြီး ဦးအောင်မျိုးမင်း၊ နိုင်ငံခြားရေး ဝန်ကြီးဌာန ပြင်သစ်နိုင်ငံဆိုင်ရာ ကိုယ်စားလှယ် ဒေါ်နန်းဆုမွန်အောင်၊ ကိုယ်စားလှယ်ရုံး အဖွဲ့ဝင် Maé Robbine တို့ဟာ ပြင်သစ် အောက်လွှတ်တော်မှာ ပြင်သစ်-မြန်မာ ချစ်ကြည်ရေးအဖွဲ့ရဲ့ ဥက္ကဌ အောက်လွှတ်တော်အမတ် Mr Alain David နဲ့ အောက်လွှတ်တော် ကိုယ်စားလှယ်အဖွဲ့တွေ တွေ့ဆုံ ဆွေးနွေးခဲ့ကြတာပါ။

ဆွေးနွေးပွဲမှာ ပြည်ထောင်စုဝန်ကြီးတွေက မြန်မာ့ နွေဦးတော်လှန်ရေး တိုးတက်မှု အခြေအနေတွေ၊ အမျိုးသား ညီညွတ်ရေး အစိုးရ ရဲ့လမ်းပြမြေပုံ အပါအဝင် မြန်မာ လူထုရဲ့ နွေဦး တော်လှန်ရေးမှာ အရေးကြီး ပါဝင်နေမှုတွေကို ရှင်းလင်း ပြောကြားခဲ့တယ်လို့ သိရပါတယ်။

ဒါ့အပြင် ပြည်ထောင်စု လွှတ်တော် ကိုယ်စားပြု ကော်မတီနဲ့ ပြင်သစ် အောက်လွှတ်တော်တို့ တရားဝင် တွေ့ဆုံ ချိတ်ဆက်လုပ်ဆောင်ဖို့ တင်ပြချက်ကို လက်ခံပြီး တွေ့ဆုံဖို့ အစီအစဉ်တွေကိုလည်း ဆွေးနွေးခဲ့ကြပါတယ်။

မြန်မာ အစိုးရ ကိုယ်စားလှယ်တွေက အကြမ်းဖက် စစ်ကောင်စီ ပြုလုပ်မယ့် တရားမဝင် အတုအယောင် ရွေးကောက်ပွဲကို ပြင်သစ်လွှတ်တော်၊ ပြင်သစ်အစိုးရနဲ့ နိုင်ငံတကာက လက်မခံကြဖို့ တောင်းဆိုခဲ့တယ်လို့ သိရပါတယ်။

အဲ့ဒီနောက် အစိုးရအဖွဲ့ဝင်တွေနဲ့ ပြင်သစ် အောက်လွှတ်တော် ကိုယ်စားလှယ်ကဖွဲ့က ပြင်သစ် အောက်လွှတ်တော်မှာ သတင်းစာ ရှင်းလင်းပွဲ ပြုလုပ်ခဲ့ရာ ပြင်သစ်စာနယ်ဇင်း သမားတွေ ပြင်သစ်ရောက် မြန်မာတွေ တက်ရောက်ခဲ့ကြတယ်လို့ သိရပါတယ်။

MK-003

#MeKongNews

#ပြင်သစ်အောက်လွှတ်တော်

#နွေဦးတော်လှန်ရေး

#လမ်းပြမြေပုံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)