မဲခေါင်၊ မတ် ၂၀
နေပြည်တော၊် တပ်ကုန်းမြို့နယ်၊ ကျေးရွာတစ်ရွာမှာ မတ်လ ၁၄ ရက်နေ့က ပြုလုပ်တဲ့ ရှင်ပြု၊ ရဟန်းခံ အခမ်းအနားမှာ ရွှေထည် လက်ဝတ်လက်စားတွေ ဝတ်ဆင်ပြီး စီးကရက် သောက်နေတဲ့ ဘုန်းကြီး ဓာတ်ပုံနဲ့ ဗီဒီယိုဖိုင် လူမှုကွန်ရက်မှာ ပျံ့နှံ့ခဲ့ပြီးနောက် ဝေဖန်မှုများစွာ ပေါ်ထွက်ခဲ့ပါတယ်။
အဆိုပါ ဘုန်းကြီးကို တပ်ကုန်းမြို့နယ်၊ သံဃာ့နာယက အဖွဲ့မှ မတ်လ ၁၉ ရက်နေ့က ခေါ်ယူပြီးနောက် ဆုံးမ သြဝါဒပေးကာ ခံဝန် လက်မှတ် ထိုးခိုင်းခဲ့တယ်လို့ ဒေသခံ တစ်ဦးက ပြောပါတယ်။
“ တပ်ကုန်းနားမှာပဲ သူ့ကျောင်းက ရှိတယ်။ တောထွက် ဘုန်းကြီးလို့ ပြောရမှာပေါ့။ ဓာတ်ပုံတွေ အရမ်းပျံ့နှံ့လာတော့ စုံစမ်းရတာလေ။ နောက်မှ အဲဒီ ဘုန်းကြီးကို ရှာတွေ့တော့ သွားပင့်ပြီး ခေါ်ရတာ။ ဒီမှာတော့ မြို့နယ်သံဃာ့နာယက အဖွဲ့ သတိပေး ခံဝန်ထိုးခိုင်းတယ်။ ကျန်တာတော့ ဆရာတော်တွေ ဆုံးမပြီး ပြန်ခိုင်းလိုက်ပါတယ်” လို့ သူကပြောပါတယ်။
သင်္ကန်းဝတ် ဘုန်းကြီးနဲ့ မယ်သီလရှင်တွေ Tik Tok ကစားပြီး လူမှုကွန်ရက်မှာ တင်တဲ့အတွက် သာသာနာရေးဝန်ကြီးဌာနက တားမြစ်ထားပေမယ့် ထိရောက်တဲ့ အရေးယူမှုတွေ မရှိလို့ အခုလိုတွေ ဖြစ်နေတာလို့ ကျောင်းထိုင် ဆရာတော် တစ်ပါးက မိန့်ပါတယ်။
“ ခက်တာက မကောင်းကျောင်းပို့က စတာလေ။ ခဏလာဝတ်ပြီး သူတို့က ဆော့ပြသွားတယ်။ နောက်က ကိုယ်တော်တွေကလည်း လိုက်ဆော့ကြနဲ့ ဖြစ်ကြတာ။ ဘုရားကတော့ သင်္ကန်း ၃ ထည်ကလွဲလို့ ဘာမှ မဆောင်ခိုင်းဘူး။ ခုခေတ်ကတော့ အဲ့လို ရဟန်းသံဃာ မရှိသလောက် ဖြစ်နေပြီ။ ဒီတော့ ကိုးကွယ် ယုံကြည်သူတွေလည်း ကြည်ညိုမှု ပျက်ပြားတာပေါ့။ ခုဖြစ်နေတာက ရဟန်းက ရဟန်းအလုပ် မလုပ်ဘူး။ လူတွေကြားထဲ ဟိုနေရာပါ ဒီနေရာပါတော့ ကိုးကွယ်ယုံကြည်မှု ဆိုတာထက် ဗုဒ္ဓဘာသာကို အခြား ဘာသာဝင်တွေက လှောင်ပြောင်စရာ ဖြစ်လာတာ” လို့ ဆရာတော်က မိန့်ကြားပါတယ်။
မြန်မာနိုင်ငံမှာ ရဟန်းသံဃာနဲ့ မယ်သီလရှင် ဦးရေပေါင်း ၆ သိန်း ဝန်းကျင် ရှိတယ်လို့ သိရပါတယ်။
MK-005
