မဲခေါင်၊ ဖေဖော်ဝါရီ ၂၆
အကြောင်းအမျိုးမျိုးကြောင့် ရန်ကုန်တိုင်းအတွင်း လာရောက်တည်းခိုနေထိုင်သူတွေရဲ့ မှတ်ပုံတင်ပါအချက်အလက်တွေကို စားရင်းပြုစုပြီး သက်ဆိုင်ရာမြို့နယ် ရပ်ကွက်အုပ်ချုပ်ရေးထံ လူစာရင်းအတိအကျ အစီအရင်ခံတင်ပြနေရတယ်လို့ ဟိုတယ်လုပ်ငန်းလုပ်ကိုင်နေသူတစ်ဦးက မဲခေါင်သတင်းဌာန ကိုပြောပါတယ်။
“ အဓိကထားပြီးစာရင်းပေးနေရတဲ့ မြို့နယ်အချို့ရှိတယ်။ မြေနီကုန်း၊ စမ်းချောင်း၊ ကြည့်မြင်တိုင်နဲ့ အလုံမြို့နယ်မှာရှိတဲ့ တည်းခိုခန်းကအစ ဟိုတယ်မိုတယ်နဲ့ အင်းတွေကအစ လာတည်းတဲ့စာရင်းတွေပေးရတယ်။ တချို့ဆို အချိန်ပိုင်းနေရင်တောင် မှတ်ပုံတင်ပေးပြီးမှနေလို့ရတဲ့ ပုံစံမျိုးဖြစ်နေပြီ။ ဒီလလောက်ကစပြီး PDF တွေရန်ကုန်ထဲဝင်လာပြီဆိုတဲ့သတင်းတွေထွက်လာတယ်။ အဲ့လိုထွက်ပြီးနောက်ပိုင်းမှာ ရန်ကုန်တစ်မြို့လုံးမှာ ဖွင့်နေတဲ့တည်းခိုခန်းဟိုတယ်ကအစ စာရင်းအတိအကျပေးရတယ်။ သူတို့လာစစ်လို့ စာရင်းနဲ့မကိုက်ရင်တော့ကိုယ်လည်းအဖမ်းခံပြီး စစ်ဆေးခံရမယ်လို့ပြောထားတယ်” လို့သူကပြောပါတယ်။
လာရောက်တည်းခိုသူစာရင်းကို ယခင်ကရပ်ကွက်အုပ်ချုပ်ရေးမှူးရုံးနဲ့ ရဲစခန်းများကိုသာ တည်းခိုသူများ၏ စာရင်းကိုပေးအပ်ရပြီး ယခုအခါ မြို့နယ်အထွေထွေအုပ်ချုပ်ရေးမှူးရုံးများမှလည်း စာရင်းများကို ကြည့်ရှုစစ်ဆေးပြီးနောက် ရန်ကုန်တိုင်းဒေသကြီး အစိုးရအဖွဲ့ရုံးသို့နောက်ဆုံးတင်ပို့ရတယ်လို့ တည်းခိုခန်းပိုင်ရှင်တစ်ဦးကပြောပါတယ်။
“ ၂၄ ရက်နေ့ညကပိုင်းကလာတည်းတဲ့ လူငယ်တစ်ယောက်ကို အုပ်ကြီးနဲ့ရဲတွေရိုက်ပြီးလာခေါ်တာဖြစ်သွားတယ်။ ဘာလို့ရိုက်ပြီးဖမ်းတာလည်းတော့သေချာမသိဘူး။ ညပိုင်း ၁၀ နာရီကျော်လောက်ပဲရှိသေးတယ်။ တည်းခိုခန်းပိုင်ရှင်တွေကိုတော့ဖမ်းဆီးတာတွေမရှိဘူး။ စစ်ကားနဲ့ဆိုင်ကယ်တွေပဲပါတယ်။ ရိုက်တာကတော့ ရပ်ကွက်အုပ်ကြီးကရိုက်ပြီး စစ်ကားပေါ်တင်သွားတာ” လို့ မျက်မြင်တွေ့သူတစ်ဦးကပြောပါတယ်။
ရန်ကုန်တိုင်းအတွင်း ဧည့်စာရင်းတိုင်ကြားရာတွင်လည်း စာရင်းအတိအကျနဲ့ တိုင်ကြားနေရပြီးသတင်းရတဲ့နေရာတွေကို အင်အားအလုံးအရင်းနဲ့ ဝင်ရောက်စစ်ဆေးနေကြပြီး ဧည့်စာရင်းတိုင်ကြားမှုမရှိတဲ့သူတွေကို ဖမ်းဆီးပြီးနောက် ငွေကြေးတောင်းခံပြီး ခံဝန်ရေးထိုးခိုင်းပြီးနောက် ပြန်လွှတ်ပေးမှုတွေ ရှိနေတယ်လို့ ဒေသခံတွေက ပြောပါတယ်။
MK-005
