မဲခေါင်၊ မေ ၅
ကရင်အမျိုးသား အစည်းအရုံး၊ ကော်သူးလေ အုပ်ချုပ်နယ်မြေ၊ ခလယ်လွီထူ-ညောင်လေးပင် ခရိုင်ထဲမှာ စစ်ကောင်စီတပ်က ပြည်သူ တစ်ဦးကို အကြောင်းမဲ့ သတ်ဖြတ်ပြီး ၂ ဦးကို ဖမ်းဆီးနှိပ်စက်ခဲ့တယ်လို့ KNU က ဒီနေ့ မေလ ၅ ရက်မှာ ထုတ်ပြန်ပါတယ်။
ကျောက်ကြီးမြို့နယ်၊ နတ်သံကွင်းမြို့၊ တံခွန်တိုင်ရပ်ကွက်နေ စောလေးလေးထူး ကို မေလ ၃ ရက်နေ့၊ ည ၇ နာရီခွဲ ဝန်းကျင် အလုပ်က ပြန်လာချိန် နတ်သံကွင်းဆေးရုံရှေ့မှာ စစ်တပ်က ပစ်သတ်ခဲ့တယ်လို့ ဆိုပါတယ်။
“ဘုံသတောက ကင်းလှည့် ပြန်လာတဲ့ စကစတွေ ပစ်တာ သေနတ်သံ တစ်ချက် ကြားတယ်။ သွားမကြည့်ရဲကြဘူး။ သွားကြည့်တဲ့အခါ ဆိုင်ကယ် ရပ်ထားတယ်။ နောက်ကျောကို ပစ်တာ၊ လူကဘေးမှာ မှောက်လျက်သေနေပြီ” လို့ ဒေသခံ တစ်ဦးရဲ့ ပြောဆိုမှုကို KNU က ကိုးကား ဖော်ပြပါတယ်။
စောလေးလေးထူး ကို ပစ္စတိုနဲ့ ပစ်သတ်တာဖြစ်ပြီး သူ့ရဲ့ လွယ်အိတ်ထဲမှာ ငွေအမြောက်အမြားပါရှိကာ လွယ်အိတ်နဲ့ ဖုန်းကို စစ်ကောင်စီတပ်က ယူသွားတယ်လို့လည်း ပြောဆိုပါတယ်။
ဒါ့အပြင် ဧပြီ ၂၅ ရက်မှာ ကျောက်ကြီးမြို့နယ်၊ ကျောက်မော်ဘုရားကြီးကျေးရွာက အသက် ၄၀ အရွယ် စောအယ်မူး ကို ခလရ (၅၇) က ဖမ်းဆီးပြီး ခလရ (၃၄၉) ကို ပို့ဆောင်ခဲ့တယ်လို့ သိရပါတယ်။
စောအယ်မူး ကို ကရင်အမျိုးသား လွတ်မြောက်ရေး တပ်မတော်ရဲ့ တပ်သား၊ စစ်ကောင်စီကို ဆန့်ကျင်သူ အဖြစ် စွပ်စွဲ ဖမ်းဆီးတာဖြစ်ပြီး မျက်နှာကို အဝတ်ပတ်ချည်ကာ တစ်ကိုယ်လုံး ဓာတ်ဆီလောင်း မီးရှို့ ကျင်ငယ်ရေနဲ့ ပန်းပြီးမှ ပြန်လွှတ်ပေးခဲ့တယ်လို့ သိရပါတယ်။
ဧပြီ ၂၂ ရက်နေ့မှာလည်း မူးမြို့နယ်၊ သပြေညွန့်ကျေးရွာက အသက် ၂၂ နှစ်အရွယ် စောလိုလို ကို စစ်ကောင်စီက တစ်လကြာ ဖမ်းဆီးထားရာက ထွက်ပြေး လွတ်မြောက်လာရာ ဖမ်းဆီးခံရချိန် အမျိုးမျိုး ညှဉ်းပန်းနှိပ်စက်ခဲ့တာကြောင့် အခုချိန်ထိ ဆေးကုသနေရတယ်လို့ KNU က ဆိုပါတယ်။
စစ်ကောင်စီတပ်ဟာ အခုနှစ် ဇန်နဝါရီလ ၁ ရက်နေ့ကနေ မတ်လ ၃၁ ရက်နေ့ အတွင်း KNU အုပ်ချုပ်နယ်မြေ အတွင်းက ရွာသားတွေကို သေနတ်နဲ့ အကြောင်းမဲ့ ပစ်ခတ်မှု ၈ ကြိမ်နဲ့ ရွာသားတွေကို ဖမ်းဆီး သတ်ဖြတ်မှု ၁၂ ကြိမ် ပြုလုပ်ခဲ့တယ်လို့ ထုတ်ပြန်ထားပါတယ်။
MK-009
#MeKongNews
#KNU
#ညောင်လေးပင်
#ဓားပြတိုက်