မဲခေါင်၊ ဇန်နဝါရီ ၂၄
ကရင်ပြည်နယ်၊ ကျုံဒိုးမြို့နယ်မှာ စစ်ကောင်စီတပ်က လက်နက်ကြီးနဲ့ ပစ်ခတ်မှုကြောင့် ကျုံဒိုးမြို့ပေါ် အပါအဝင် ကျေးရွာတွေက ဒေသခံ ၃,၀၀၀ ကျော် နေရပ်စွန့်ခွာ ထွက်ပြေးနေရတယ်လို့ သိရပါတယ်။
ကျုံဒိုးမြို့နယ်မှာ ဇန်နဝါရီ ဒုတိယ အပတ်ကစပြီး ညစဉ် လက်နက်ကြီး ပစ်ခတ်သံတွေ ကြားနေရာက ဒီကနေ့မှာ မြို့အနီးတဝိုက် နေအိမ်တချို့ လက်နက်ကြီး ထိမှန်တာတွေကြောင့် ပြည်သူတွေ စိုးရိမ်ထိတ်လန့်နေကြတယ်လို့လည်း ဆိုပါတယ်။
“အခု ကမ်းနားပိုင်း၊ လမ်းမပိုင်းက လူတွေ အကုန်ရှောင်ကုန်ပြီ။ ကျုံဒိုးကို လေယာဉ်လာမယ်တဲ့၊ အခြေအနေ မကောင်းဘူး။ တိုက်ပွဲက မဖြစ်ဘူး။ ခွေးတွေက ဘယ်ကနေ ပစ်နေမှန်းမသိ” လို့ ကျုံဒိုးဒေသခံနဲ့ နီးစပ်သူ တစ်ဦးက မဲခေါင်သတင်းကို ပြောပါတယ်။
ကျုံဒိုးမြို့နယ်ထဲမှာ စစ်ကောင်စီ လက်အောက်ခံ တပ်ရင်း (၅၄၅)၊ (၅၄၆) တို့ရှိပြီး အဲ့ဒီတပ်တွေကနေ လက်နက်ကြီးတွေ ပစ်နေတယ်လို့လည်း ဒေသခံတွေက ပြောပါတယ်။
လက်ရှိ ကျုံဒိုးမြို့နယ် ကမ်းနီ၊ ကမ်းမလိုက်၊ ကျောက်ဖျာရွာတွေဘက်ကို လက်နက်ကြီးတွေနဲ့ ပစ်ခတ်နေပြီး ရွာကလေး၊ မြေနီကုန်း၊ ကော့ဘိန်း၊ ကော့ပေါက်၊ မိဂလုံ၊ ရွာကလေး စတဲ့ ကျေးရွာတွေနဲ့ မြို့အနီးတဝိုက် ကျေးရွာတွေ၊ မြို့ပေါ် ကမ်းနားလမ်းနဲ့ လမ်းမဘေးက ဒေသခံတွေ နေရပ်စွန့်ခွာ ထွက်ပြေးနေရတယ်လို့ သိရပါတယ်။
ကျုံဒိုးမြို့မှာ သာမဏေကျော် စာမေးပွဲ ရှိနေတာကြောင့် တိုက်ပွဲ မဖြစ်ဖို့အတွက် ကော့ဝါလဲကျေးရွာ အေးချမ်းသာယာကျောင်း ဆရာတော်က မေတ္တာရပ်ခံထားခဲ့ပြီး အခုလ ၂၇ ရက်နေ့မှာ နှစ်စဉ်ကျင်းပနေကျ ကျုံဒိုး မီးပုံပွဲ စတင်တော့မှာ ဖြစ်ပေမယ့် အခုလို လက်နက်ကြီး ပစ်ခတ်မှုတွေကြောင့် ဒေသခံတွေ စိုးရိမ်ထိတ်လန့် နေကြရတယ်လို့ ဒေသခံ တစ်ဦးက ပြောပါတယ်။
ဇန်နဝါရီ ၂၀ ရက်နေ့ကလည်း လက်နက်ကြီး ပစ်ခတ်မှုကြောင့် မြေနီကုန်းကျေးရွာက အသက် ၁၄ နှစ်အရွယ် မိန်းကလေး တစ်ဦး လက်နက်ကြီး ထိမှန် သေဆုံးခဲ့တယ်လို့ ဒေသခံတွေက ပြောပါတယ်။
ပြီးခဲ့တဲ့ ဒီဇင်ဘာလက ကော့ကရိတ်မြို့နယ် အတွင်း စစ်တပ်ရဲ့လက်နက်ကြီး ပစ်ခတ်မှုတွေကြောင့် ဒေသခံ နေအိမ်တွေ ထိမှန်ခဲ့ပြီး ပြည်သူတစ်ဦး သေဆုံးခဲ့ပါသေးတယ်။
ဒါ့အပြင် ဒီဇင်ဘာလက ဖြစ်ပွားခဲ့တဲ့ ကော့ကရိတ်မြို့နယ် တိုက်ပွဲတွေရဲ့ နောက်ဆက်တွဲ အဖြစ် စစ်တပ်ရဲ့ လက်နက်ကြီး ပစ်ခတ်မှုဟာ ကော့ကရိတ်အနီးက ကျုံဒိုးမြို့နဲ့ ကျေးရွာတွေထိကိုပါ ရောက်ရှိလာလို့ စစ်မျက်နှာ ကျယ်ပြန့်လာနိုင်တယ်လို့ စစ်ရေးနဲ့နီးစပ်တဲ့ သတင်းအရင်းအမြစ်တွေက ဆိုပါတယ်။
ဒီနေ့မနက်မှာတော့ ကျုံဒိုးမြို့ (၅၄၅) တပ်ရင်းကို ဒေသခံ KNLA ပူးပေါင်းတပ်ဖွဲ့တွေ ဝင်ရောက် တိုက်ခိုက်နေတယ်လို့ သတင်းတွေ ထွက်ပေါ်နေပေမယ့် မဲခေါင်သတင်း အနေနဲ့ သီးခြား အတည်ပြုနိုင်တာ မရှိသေးပါဘူး။
မနေ့ည ၉ နာရီဝန်းကျင်မှာလည်း ဘုရားသုံးဆူမြို့နယ်ထဲက စစ်ကောင်စီ လက်အောက်ခံ ထွေအုပ်၊ လဝက၊ စည်ပင်နဲ့ စရဖ ရုံး ၄ ရုံး မီးလောင်ပြာကျခဲ့ပြီးဖနာက် စစ်ကောင်စီတပ်နဲ့ KNLA ပူးပေါင်းတပ်တွေကြား စစ်ရေး အခြေအနေ တင်းမာလျက်ရှိတယ်လို့ ဒေသခံတွေက ပြောပါတယ်။
MK-009
