မဲခေါင်၊ နိုဝင်ဘာ ၂၅

စစ်အာဏာသိမ်းပြီး ၃ နှစ်အတွင်း အဆိုးရွားဆုံးအခြေအနေရောက်လာတဲ့ မြန်မာနိုင်ငံရေးပဋိပက္ခမှာ ငြိမ်းချမ်းရေးစကားဝိုင်းဖြေရှင်းနိုင်ရေး NUG နဲ့ ဒီမိုကရေစီထောက်ခံအင်အားစုကိုယ်စားလှယ်တွေ၊ တိုင်းရင်းသား လက်နက်ကိုင်အဖွဲ့အစည်း EAOs ကိုယ်စားလှယ်တွေဟာ စစ်ကောင်စီအတွက် ကြားဝင်ညှိနှိုင်းပေးတဲ့ ကိုယ် စားလှယ်တွေနဲ့ ဂျာကာတာမှာ တွေ့ဆုံဆွေးနွေးခဲ့တာ အပြုသဘောဆောင်တဲ့ ဆွေးနွေးမှု လုပ်နိုင်ခဲ့ကြောင်း အင်ဒိုနီးရှားနိုင်ငံခြားရေးဝန်ကြီးဌာနက နိုဝင်ဘာ ၂၄ ရက်နေ့မှာ ထုတ်ပြန်သွားပါတယ်။

ဒီအစည်းအဝေးကို နိုဝင်ဘာ ၂၀ ရက်နေ့ကနေ ၂၂ ရက်နေ့အထိ ဂျာကာတာမှာ ပြုလုပ်ခဲ့တာဖြစ်ပြီး လက်ရှိ အာဆီယံအလှည်ကျဥက္ကဌတာဝန်ယူထားတဲ့ အင်ဒိုနီးရှားနိုင်ငံရဲ့ မြန်မာ့အရေး အထူးသံတမန်အန်ဂူရက်ချ်ဆွာဂျာ ရာက ထုတ်ပြန်ပြောဆိုတာဖြစ်ပါတယ်။

ဒီထုတ်ပြန်ချက်မှာ ဘယ်သူတွေ ပါဝင်ခဲ့ပြီး ဘယ်လို ဆွေးနွေးမှုတွေက အကောင်းမြင်စရာဆိုတာကို ထည့်သွင်းဖော်ပြခြင်းမရှိခဲ့ပေမယ့် ဆွာဂျာရာက “အင်ဒိုနီးရှားဟာ မြန်မာပြည်သူ တွေကို ဆက်လက်ကူညီဖို့ ကတိပြုပါတယ်။ မြန်မာနိုင်ငံအတွက် တာရှည်ခံငြိမ်းချမ်းတည်ငြိမ်ရေးအတွက် ပြီးပြည့်စုံတဲ့ နိုင်ငံရေးအဖြေကို ရှာဖွေနိုင်ဖို့ အားစိုက်ကြိုးပမ်းခဲ့တာပါ” လို့ ပြောဆိုသွားခဲ့ပါတယ်။

အင်ဒိုနီးရှား နိုင်ငံခြားရေးဝန်ကြီးဌာနက ဒီတွေ့ဆုံဆွေးနွေးမှုက သဘောထားကွဲလွဲနေတဲ့ သက်ဆိုင်သူပါတီ အားလုံးပါဝင်တဲ့ စားပွဲဝိုင်းထိုင် အဖြေရှာခြင်းလမ်းစဉ်အတွက် အဓိက ရည်ရွယ်ကြောင်း၊ မြန်မာနိုင်ငံမှာ အကြမ်းဖက်မှုတွေ လျော့ကျစေဖို့နဲ့ လူသားချင်းစာနာမှုဆိုင်ရာ အကူအညီတွေ ဒုက္ခရောက်ပြည်သူတွေထံ ရောက်ရှိရေးအတွက် ဖြစ်ကြောင်း၊ ပဏာမ ဆွေးနွေးမှုအဆင့်ဖြစ်ပေမယ့် အပြုသဘောဆောင်တဲ့ ရလဒ်ကို ရရှိခဲ့တယ်လို့ နိုဝင်ဘာ ၂၄ ရက်နေ့မှာ ထုတ်ပြန်သွားတာဖြစ်ပါတယ်။

Photo- AFP

Ref: straitstimes
MKF-001

#MeKongNews

#စစ်ကောင်စီ

#တော်လှန်ရေး

#ဂျာကာတာ

#အင်ဒို

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)