မဲခေါင်၊ ဧပြီ ၉
ကချင်ပြည်နယ်၊ ဗန်းမော်ခရိုင်၊ လွယ်ဂျယ်မြို့မှာ ယမန်နေ့ ဧပြီလ ၈ ရက်နေ့ည ၁၀ နာရီခန့်က စစ်ကောင်စီ စခန်းထဲကျန်နေတဲ့ စစ်ကောင်စီတွေ တရုတ်ဘက် ထွက်ပြေးသွားတာကြောင့် စစ်ကောင်စီ ကင်းစင်နယ်မြေဖြစ်သွားပြီလို့ ဒေသခံတွေနဲ့ KIA ရှေ့တန်းသတင်းရင်းမြစ်တွေဆီက သိရပါတယ်။
မြန်မာ-တရုတ်နယ်စပ် ကုန်သွယ်ရေးစခန်းရှိတဲ့ လွယ်ဂျယ်မြို့မှာ နောက်ဆုံးကျန်တဲ့ စစ်ကောင်စီစခန်းဟာ ခလရ-၁၄၂ ဖြစ်ပြီး အဲ့ဒီတပ်က လူတွေအကုန်လုံး တရုတ်နိုင်ငံထဲ ဝင်ပြေးသွားလို့ စစ်ကောင်စီကင်းစင် နယ်မြေဖြစ်သွားတာပါ။
“ လွယ်ဂျယ် စစ်ကောင်စီတပ်ထဲက စစ်ကောင်စီ စစ်သည် ၆၃ ယောက် ကားကြီး ၂ စီးနဲ့ မနေ့ည ၁၀ နာရီ အချိန်လောက် တရုတ်ဘက်ခြမ်း ရှောင်ဝင်သွားပြီ။” လို့ KIA ရှေ့တန်းသတင်းရင်းမြစ် တစ်ဦးက ပြောပါတယ်။
ဒီနေ့ မနက် မှာတော့ စစ်ကောင်စီတပ်ထဲ KIA နဲ့ ပူးပေါင်း တပ်ဖွဲ့တွေ ဝင်ရောက်ပြီး ရှင်းလင်းလိုက်ပြီ လို့ သူက ပြောပါတယ်။
“ ‘နယ်စပ် တံခါးပေါက်ကြီး မဝင်ခိုင်းပါဘူး။ KIA နဲ့ ပူးပေါင်း အဖွဲ့ ကလည်း အဲဒီ ချောင်းရှိတဲ့ဘက်ပဲ လမ်းဖွင့်ထားပေးတာတဲ့။ တံခါးပေါက် အကြီးဘက်က အကုန်စောင့်ထားလိုက်ပြီလေ။” လို့ ဒေသခံ အမျိုးသမီး တစ်ဦးက ပြောပါတယ်။
တရုတ်ဘက်က ခိုးပေါက် တံခါးပေါက်ကနေ ဝင်ခိုင်းပြီး လာခေါ်ယူသွားပုံရတယ်လို့ သူက ပြောပါတယ်။
ပြီးခဲ့တဲ့ မတ်လ ၂၉ ရက်နေ့ကစ လွယ်ဂျယ်ကို KIA နဲ့ ပူးပေါင်း တော်လှန်ရေး တက်ဖွဲ့တွေက ဝိုင်ရံ ပိတ်ဆို့ထားရာ ဌာနဆိုင်ရာ ဝန်ထမ်းတွေနဲ့ စစ်တပ်၊ ရဲ အရာရှိပိုင်းတွေက တရုတ်သူဌေးတွေရဲ့ ကားနဲ့ ပြီးခဲ့တဲ့ ရက်ပိုင်းတွေမှာ တောင်ပေါ်လမ်းကနေ ဗန်းမော်ဘက် ထွက်သွားတာဖြစ်ပြီး စစ်တပ်မှာ ကျန်နေခဲ့တဲ့ စစ်ကောင်စီတွေက ယမန်နေ့ညက တိတ်တဆိတ် ထွက်ခွာကာ တရုတ်နယ်စပ် လားရင်းဘက် ခိုးပေါက်ကနေ ရှောင်ဝင်သွားတာ လို့ ဆိုပါတယ်။
CJ-008