မဲခေါင်၊ အောက်တိုဘာ ၁၆
ကရင်နီပြည်နယ်၊ ဒီးမော့ဆို အနောက်ခြမ်းမှာရှိတဲ့ စစ်ရှောင်စခန်းတွေကို မနေ့ညပိုင်းက စစ်ကောင်စီတပ် လက်နက်ကြီးနဲ့ ပစ်ခတ်လို့ စစ်ဘေးရှာင်တွေ ထွက်ပြေးနေရတယ်လို့ စစ်ရှောင် ကူညီနေသူ တစ်ဦးက မဲခေါင်သတင်းဌာနကို ပြောပါတယ်။
အောက်တိုဘာ ၁၅ ရက်၊ ည ၇ နာရီခန့်က ဒီးမော့ဆို အနောက်ခြမ်းက စစ်ရှောင်စခန်းရှိနတဲ့ ကျေးရွာတွေကို စစ်ကောင်စီက လက်နက်ကြီး ၇ လုံးထက်မနည်း ပစ်ခတ်ခဲ့တယ်လို့ ဆိုပါတယ်။
“ထုံးစံအတိုင်း ပစ်တယ်လို့ပဲ ပြောရမလား။ ကျွန်တော်က ခရီးလွန်နေလို့ ဒီနေ့လယ်မှ အဲ့ကို ရောက်မယ်။ လောလောဆယ် ထိတော့ ယာယီတဲ တစ်လုံးလောက်ပဲ အထိအခိုက် ရှိတယ်လို့ သိရတယ်။ အတိအကျတော့ မသိရသေးဘူး” လို့ သူကရှင်းပြပါတယ်။
စစ်ကောင်စီရဲ့ လက်နက်ကြီး ပစ်ခတ်မှုကြောင့် စစ်ဘေးရှောင်တွေ တစ်ညလုံးနီးပါး ဗုံးခိုကျင်းတွေနဲ့ တောတောင်တွေထဲမှာ တိမ်းရှောင်ခဲ့ရတယ်လို့ သိရပါတယ်။
ဒီးမော့ဆို အနောက်ခြမ်းမှာ တိုက်ပွဲဖြစ်တာ မရှိပေမယ့် စစ်ရှောင် စခန်းတွေကို စစ်ကောင်စီက ညစဥ်နီးပါး လက်နက်ကြီးနဲ့ ပစ်ခတ်လေ့ရှိရာ စက်တင်ဘာလ ၁၄ ရက်၊ ည ၁၂ နာရီခန့်ကလည်း လက်နက်ကြီးနဲ့ ပစ်ခတ်ခဲ့တယ်လို့ စစ်ရှောင် ကူညီနေသူက ပြောပါတယ်။
Mk-007
#MekongNews
#ဒီးမော့ဆို
#စစ်ဘေးရှာင်
#လက်နက်ကြီး
