မဲခေါင်၊ ဧပြီ ၂၉
ကချင်ပြည်နယ်၊ မြစ်ကြီးနားခရိုင်၊ ဧရာဝတီမြစ် ပထမမြစ်ကျဉ်းရဲ့ မြစ်ညာဘက် ၁၄ မိုင်ခန့်အကွာမှာ ရှိတဲ့ ဆင်ဘိုမြို့ အနီးက စစ်ကောင်စီ ခလရ – ၁၄၁ တပ်စခန်းကို ဒီနေ့ ဧပြီ ၂၉ ရက် မနက်ပိုင်းက အပြီးသတ် ရှင်းလင်း သိမ်းယူလိုက်ပြီ ဖြစ်ကြောင်း KIA ရှေ့တန်း အသိုင်းအဝိုင်းဆီက သိရပါတယ်။
“ ဒီမနက် ၇ နာရီကျော်လောက်မှာ အကုန်ရှင်းလင်းရေး လုပ်ပြီးပြီ။ အဲဒီ စခန်းကို ပိတ်ဆို့ထားတာ ကြာပြီ။ ဆွမ်ပရာဘွမ်နဲ့ အတူတူပဲ။ ၁ လ ကျော် ၂ လ လောက် ရှိပြီ ထင်တယ်။ ကျနော်တို့ဘက်ကလည်း အသင့် နေရာ ချထားတာ ကြာပြီလေ။ တောင့်မခံနိုင်တော့လို့ သူတို့ဘာသာ ထွက်သွားတာ” လို့ ရှေ့တန်း အသိုင်းအဝိုင်းက သတင်းရင်းမြစ် တစ်ဦးက ပြောပါတယ်။
နှစ်ဖက် ထိခိုက်သေဆုံးမှုနဲ့ သိမ်းပိုက်ရရှိထားတဲ့ လက်နက်ခဲယမ်း စစ်အသုံးအဆောင် ပစ္စည်းတွေ ဘယ်လောက်လဲ ဆိုတာတော့ မသိရသေးဘူးလို့ သူက ပြောပါတယ်။
နောက်ထပ် သတင်း ရင်းမြစ် တစ်ဦးက လည်း အဲဒီ စစ်ကောင်စီ စခန်းမှာ ရှမ်းနီ ပြည်သူ့စစ်အပါအဝင် စစ်ကောင်စီ အင်အား ၂၀၀ ခန့်ရှိတယ်လို့ ပြောပါတယ်။
“ ဧပြီလ ၂၈ ရက်ညမှာ စစ်ကောင်စီ တပ်ရင်းမှူး နဲ့ တပ်ဖွဲ့ဝင်တွေ စုဝေးနေတဲ့ တပ်စခန်းဝင်းထဲ စစ်ကောင်စီက လေယာဉ်ဗုံး လာကြဲမိသွားလို့ အတုံးအရုံး ထိခိုက် ဒဏ်ရာရ၊ သေဆုံး ကုန်လို့ ဖရိုဖရဲ ထွက်ပြေးကုန်တာ။” လို့ သူက ပြောပါတယ်။
၂ လကျော် ၃ လ နီးပါး ပိတ်ဆို့ထားတဲ့ ဆင်ဘို ခလရ – ၁၄၁ ကို ဒီနေ့ ဧပြီ ၂၉ ရက်နေ့ မနက် ၇ နာရီကျော်ခန့်က အပြီးသတ် ရှင်းလင်း သိမ်းပိုက်နိုင်ခဲ့ပြီး ဗန်းမော် နွမ်းလန့် ခမရ – ၄၃၈ က တပ်ရင်းမှူးလည်း ဆင်ဘို ခလရ – ၁၄၁ ဘက် စစ်ကူသွားချိန် လေယာဉ်ဗုံးစထိမှန် သေဆုံးသွားတယ်လို့ သိရတယ် လို့ဆိုပါတယ်။
အဲဒီ စစ်ကောင်စီ ခလရ – ၁၄၁ က ဆင်ဘိုမြို့နဲ့ ၃ မိုင်လောက် အကွာမှာရှိပြီး ခု ဧပြီ ၂၅ ရက်နေ့က စစ်ကောင်စီဘက်က လေယာဉ်ဗုံးကြဲ တိုက်ခိုက်တာကြောင့် ဆင်ဘိုဘက်က မြင်သာရွာမှာ ကျရောက်ပေါက်ကွဲလို့ ဒေသခံ အမျိုးသားတစ်ဦး ဗုံးစ ထိမှန် သေဆုံးပြီး အသက် ၄ နှစ်အရွယ် ကလေးသူငယ်အပါအဝင် ဒေသခံ ပြည်သူ ၃ ဦး ထိခိုက်ဒဏ်ရာ ရရှိခဲ့ကြောင်း ဒေသခံတွေဆီက သိရပါတယ်။
CJ-008
