မဲခေါင်၊ ဧပြီ ၃၀
ရှမ်းပြည်မြောက်ပိုင်း၊ လားရှိုးမြို့မှာ လိုင်စင်မဲ့ ကားနဲ့ဆိုင်ကယ်တွေ ဖောင်းကြွနံပါတ်ပြား မဖြစ်မနေတပ်ရမယ်လို့ စစ်ကောင်စီက ညွှန်ကြားထားတယ်လို့ မြို့ခံတွေထံမှ သိရပါတယ်။
စစ်အုပ်ချုပ်ရေးသတ်မှတ်ထားတဲ့ လားရှိုးမြို့မှာ ပြီးခဲ့တဲ့ ဧပြီ ၂၆ ရက် နေ့ ညနေ ၅ နာရီကျော်က လိုင်စင်မဲ့ကားနဲ့ဆိုင်ကယ်တွေ စာရင်းပေးရန်နဲ့ ရပ်ကွက်ထောက်ခံစာယူရန်၊ ဖောင်းကြွနံပါတ်ပြား တပ်ရန်ကို ကားနဲ့လှည့်လည်ပြောကြားခဲ့ပြီ ဧပြီ ၂၇ ရက်မနက် ၆ နာရီကစကာ ယနေ့အထိစစ်ဆေးနေတာလို့ သိရပါတယ်။
“သူတို့ပြောတာတော့ ဗုံးခွဲ၊ လုယက်၊ ပြန်ပေးဆွဲတာတွေကို ကားတွေ ဆိုင်ကယ်တွေနဲ့ ကျုးလွန်တာဖြစ်လို့ အမှုတွေကို အမြန်ပေါ်အောင် ထိန်းချုပ်နိုင်အောင် လုပ်တာလို့ သိရတယ်၊ ဒါပေမယ့် ဖောင်းကြွနံပါတ်ပြားဆိုတာက လိုင်စင်ကားတွေမှ ကညနကပေးတာလေ၊ ဝစ်သောက်က ဘယ်လိုလုပ် ဖောင်းကြွ နံပါတ်ပြားရမလဲ၊ အပြင်ဆိုင်ကပဲ လုပ်ရတော့တာပေါ” လို့ လားရှိုး ရပ်ကွက် ၁၂ နေသူ တစ်ဦး က မဲခေါင်ကို ပြောပါတယ်။
ပြင်ပလုပ် ဖောင်းကြွနံပါတ်ပြား မှာ ကညန ထုတ်အတိုင်း အတုပြုလုပ်တာဖြစ်ပြီး ယခင်က နံပါတ်ပြား ၂ ခု တစ်စုံကို ကျပ် ၅ သောင်းခန့်သာရှိရာက ယင်းအမိန့်ကြောင့် ကညနတံဆိပ် ဖောင်းသီး တစ်စုံပါ လိုင်စင်ပြား ၂ ချပ်ကို ကျပ် ၆သောင်းခွဲအထိ မြင့်တက်လာတယ်လို့ သိရပါတယ်။
ဆိုင်ကယ် နံပါတ်ပြားက ကျပ် ၅ သောင်းရှိနေကာ လားရှိုးမြို့ပေါ်တွင် လိုင်စင်မဲ့ ကား ထောင်ကျော်နဲ့ ဆိုင်ကယ် ၂ ထောင်ကျော် ခန့် အနည်းဆုံးရှိနေတယ်လို့ သိရပါတယ်။
လက်ရှိမှာ ရပ်ကွက်ထောက်ခံချက်ကို ကားရဲ့ ဒက်ရှ်ဘုတ်ပေါ်မှာတင်ပြီး မောင်းနှင်ရကာ စစ်ဆေးပါက ယင်းစာရွက်နဲ့ ဖောင်းကြွနံပါတ်ပြားတွေကိုသာ ရှေ့နောက် စစ်ဆေးကြောင်း သိရပါတယ်။
“ ဒီရက်ပိုင်းတွေက စစ်ဆေးမှုတွေအရမ်းလုပ်နေတယ် ကားတွေသိမ်းထားတာလည်း မနည်းဘူး တစ်ချို့က ကဒ်ပြန်လုပ်ပြီးမှ ကားပြန်လားထုတ်တာ ပိုက်ဆံရှိတဲ့သူတွေကိုတော့ ပိုက်ဆံနဲ့ထုတ်ကြတယ် ယာဥ်ထိန်းရဲတွေလည်း ကြုံရင်ကြုံသလို မြို့ထဲမှာ စစ်ဆေးနေကြတယ်”လို့ လားရှိုးမြို့ခံတစ်ဦးက မဲခေါင်ကိုပြောပါတယ်။
စစ်ကောင်စီက တိုင်းရင်းသားလက်နက်ကိုင်တပ်ဖွဲ့တွေ မြို့ထဲကိုဝင်လာမှာ စိုရိမ်းတာကြောင့် ကားနံပါတ်ပြားတွေကို လုပ်ဆောင်ခိုင်းတာဖြစ်ပြီး တခြားမြို့နယ်က လာတဲ့သူတွေကိုတော့ မြို့နယ်ရပ်ကွက်ထောက်ခံစာပါရမယ်လို့ သူကဆိုပါတယ်။
ကားနံပါတ်ပြားကို မိမိနေထိုင်တဲ့ ရပ်ကွက်မှာ အိမ်နံပါတ်၊ နယ်မြေနံပါတ်နဲ့ ဌာနဆိုင်ရာတွေလည်း မိမိဌာနဆိုင်ရာနာမည် တံဆိပ်တုံတွေနဲ့ ဝန်ထမ်းတွေကို ထုတ်ပေးခဲ့ပါတယ်။
ယင်း ယာဉ်ထောက်ခံချက် ရဖို့အတွက် မိမိကားရဲ့ ဖောင်းကြွလိုင်စင်ပြားတပ်ပြီး ရှေ့၊ နောက်ပုံတွေနဲ့ မှတ်ပုံတင်၊ နေရပ်လိပ်စာများကိုပေးရကာ အချို့ရပ်ကွက်ရုံးတွေမှာ ယာဉ်ထောက်ခံချက် လက်မှတ်ကို ကျပ် ငွေ ၅ ထောင်နဲ့ ပေးယူရကြောင်း သိရပါတယ်။
စာရင်းမပေးထားတဲ့ယာဉ်တွေကို စစ်ဆေးတွေ့ရှိမယ်ဆိုရင် ယာဉ်ကို သိမ်းယူမယ့်အပြင် ယာဉ်မောင်းကိုပါ အရေးယူမယ်လို့ စစ်ကောင်စီက ခြိမ်းခြောက်ထားပါတယ်။
ဆိုင်ကယ်တွေကိုတော့ ထောက်ခံချက် မထုတ်ပေးဘဲ ရပ်ကွက်ရုံးက ထွေအုပ်ရုံးကို စာရင်းပြုစုပေးပို့ ထားတယ်လို့ သိရပါတယ်။
လားရှိုးမြို့ပေါ်မှာ လုပ်ငန်းရှင်နဲ့ ဆိုင်တွေကို စာပို့ပြီး ခြိမ်းခြောက်ငွေတောင်းခံတာ၊ ဗုံးခွဲတာ၊ သေနတ်နဲ့လာရောက်ပစ်သတ်တာ တွေရှိနေရာမှာ ကျူးလွန်သူတွေက ကားတွေ ဆိုင်ကယ်တွေကို အသုံးပြုပြီး ကျူးလွန်နေကြတာဖြစ်တယ်လို့ သိရပါတယ်။
MK-012၊ 011