မဲခေါင်၊ ဧပြီ ၈
ရှမ်းပြည်မြောက်ပိုင်း၊ မူဆယ်မှာ လတ်တလော တရုတ်နယ်စပ်ဘက်က မြန်မာ လုပ်သားတွေ နေ့တိုင်း မြန်မာဘက်ပြန်ပို့ခံရပြီး တရုတ်ဘက် ဝင်မယ့်သူတွေလည်း အနည်းဆုံး တရုတ်ငွေ ၅၀၀ ပြရကြောင်း နယ်စပ်ဒေသခံတွေဆီက သိရပါတယ်။
“ တခါသုံး တပတ်ကဒ်ရော၊ စာအုပ်အနီရော သက်တမ်း ကုန်နေတဲ့ လူတွေကို ဖမ်းပို့နေတာ နေတိုင်းပဲ။ အလုပ်မရှိရင်လည်း မရဘူး။ ခုက အလုပ်ရှာပေးတဲ့ ကုံးတေမှာပါ လိုက်ဖမ်းဝာ။ ဟိုတယ်တွေ မှာကောပဲ။ အလုပ်မရသေးလို့ ပုန်းနေရသူတွေလည်းများတယ်” လို့ နယ်စပ်ဒေသခံ တစ်ဦးကပြောပါတယ်။
နယ်စပ်ဖြတ်ကျော်ခွင့် စာအုပ်အနီ ရှိသူတွေကိုသာ တရုတ်နယ်စပ်ထဲမှာ တရားဝင်အလုပ်လုပ်ခွင့် ပြုပြီး ယာယီ နယ်စပ်ဖြတ်ကျော်ခွင့် တခါသုံး ကဒ်က ၇ ရက်သာ သက်တမ်းရှိပြီး တရားဝင် အလုပ်လုပ်ခွင့်မရှိကြပါဘူး။
မြန်မာလုပ်သားတွေဟာ လက်ရှိ မြန်မာနိုင်ငံမှာ ဖြစ်ပေါ်နေတဲ့ နိုင်ငံရေး အခြေအနေကြောင့် အလုပ်ရှားပါးပြီး တရုတ်နယ်စပ်ဘက်မှာ တခါသုံးကဒ်နဲ့ ဝင်ရောက်ကာ အလုပ်လုပ်ကြသလို ဝင်ပြီးရင်ပြန်မထွက်ကြတော့ဘူးလို့ ဆိုပါတယ်။
“ ဒီရွှေလီမှာ တရားဝင် သိရသလောက် မြန်မာလုပ်သား ၅ သိန်းထက် မနည်း ရှိလာတယ်။ ရွှေလီမှာ လူအဲ့လောက်အတွက် အလုပ်မပေးနိုင်ဘူးလေ။ အလုပ်မရတော့ မြန်မာနိုင်ငံသားတွေက ဟိုတယ်၊ တည်းခိုခန်းနဲ့ အိမ်ခန်းတွေ မငှားနိုင်ဘူး။ အဲဒီခါကျဝော့ လမ်းဘေးအိပ်ကြတာ” လို့ ရွှေလီရောက် မြန်မာနိုင်ငံသားတစ်ဦးက ပြောပါတယ်။
တရုတ်နိုင်ငံရဲ့ ဥပဒေနဲ့ မညီသလို မြို့ပြအင်္ဂါရပ်တွေနဲ့လည်း မညီဘဲ သရုပ်ပျက်တာကြောင့် ဖမ်းဆီးလာတာလို့ ဆိုပါတယ်။
“ တရုတ်ဘက် ဝင်ရင် တရုတ်ပိုက်ဆံအနည်းဆုံး ယွမ် ၅၀၀ မပါရင် မဝင်ချင်ဘူးဆိုတာ ဟုတ်တယ်။ တချို့က ပိုက်ဆံလည်း မပါလာဘူးဆိုတော့ ထမင်းလည်း မစားရ အဲလို ဒုက္ခရောက်လို့လေ။ အလုပ်ကလည်း မရှိဆိုတော့” လို့ ရွှေလီမှာ အလုပ်လုပ်နေတဲ့ မြန်မာအမျိုးသမီး တစ်ဦးက ပြောပါတယ်။
ဒါ့အပြင် တရုတ်နယ်စပ်မှာ ကိုဗစ်ရောဂါကာလ ကတည်းက နေထိုင်နေတဲ့ မြန်မာနိုင်ငံသားတွေကို တရုတ်ဘက်က နားလည်မှုနဲ့ ဧည့်စာရင်း QR Code လုပ်ပေးပြီး အလုပ်လုပ်ခွင့် ပေးထားပေမယ့် လက်ရှိမှာတော့ လာမယ့် မေလကုန် နောက်ဆုံးထားပြီး နေထိုင်ခွင့် သက်တမ်းကုန်လွန်နေတဲ့ မြန်မာနိုင်ငံသားတွေ နေရပ်ပြန်ပြီး စာရွက်စာတမ်း အသစ်လုပ်ပြီး ပြန်ဝင်လာဖို့ သတိပေးထားပါတယ်။
နေထိုင်ခွင့် သက်တမ်းလွန်တာဖြစ်ဖြစ်၊ အထောက်အထား အစုံအလင် မရှိတာဖြစ်ဖြစ် တရုတ်ဘက်က ဖမ်းဆီး မိပါက စစ်ဆေးပြီး မြန်မာဘက် ပြန်ပို့မယ့်အပြင် ပြစ်မှုပေါ်မူတည်ကာ တစ်နှစ် ကနေ ၅ နှစ် အထိ တရုတ်ပြည်ဝင်ခွင့် ပိတ်သွားမယ်လို့ ဆိုပါတယ်။
တရုတ် ဘက်ရော မြန်မာဘက်ရော လက်ရှိ နှစ်နိုင်ငံ နယ်စပ် ဥပဒေအရ နှစ်နိုင်ငံ နယ်နိမိတ် ထိစပ်နေတဲ့ ခရိုင်အတွင်းထဲက အိမ်ထောင်စု ကိုင်ဆောင်ထားသူတွေကိုသာ တရားဝင် နယ်စပ် ဖြတ်ကျော်ခွင့် စာအုပ် ထုတ်ပေးတာဖြစ်ပါတယ်။
Video Crd# CJ
CJ-008
