မဲခေါင်၊ ဇန်နဝါရီ ၂၃
ရှမ်းပြည်နယ်တောင်ပိုင်း၊ အင်းလေးဒေသအခြေပြု 1009(IPRD) တပ်ရင်းအတွက် အခြေခံတပ်သားသစ်သင်တန်းဆင်းပွဲနဲ့ သင်တန်းအသစ်တင်တာကို ပြုလုပ်နေကြောင်း ယင်းတပ်ရင်းတာဝန်ရှိသူတစ်ဦးထံက သိရပါတယ်။
“အားလုံးကတော့ ကိုယ့်ရဲ့နယ်မြေ ကိုယ့်ရဲ့အိမ်၊ ကိုယ့်ရဲ့အလုပ်တွေ စွန့်ခွာပြီးတော့မှ စစ်အာဏာရှင်စနစ်ကို တိုက်ထုတ်ဖို့ အတွက် ရောက်လာကြတဲ့ လူငယ်တွေပဲဖြစ်ပါတယ်” လို့ လက်ရှိ အမှတ် ၁၀၀၉ တပ်ရင်းရဲ့ ရုံးတာဝန်ခံတစ်ဦးဖြစ်သူ KiKi ကပြောပါတယ်။
သင်တန်းဆင်းသွားတဲ့ အမှတ်စဉ် ၆ မှာ အမျိုးသား ၂၀ အမျိုးသမီး ၁၀ အားလုံး အင်အား ၃၀ ဖြစ်ပြီး သင်တန်းကာလက ၄၅ ရက်ကြာမြင့်ခဲ့တယ်လို့ သိရပါတယ်။
လက်ရှိ သင်တန်းအမှတ်စဉ် ၇ မှာတော့ အမျိုးသား ၂၅ ဦးနဲ့ အမျိုးသမီး ၅ ဦး ပေါင်း ၃၀ ဦးဖြစ်ပြီး သင်တန်းတက်နေသူတွေရဲ့အသက်တွေက ၁၈ နှစ်ကနေ ၂၅ နှစ်အတွင်း ဖြစ်ပြီး ဇန်နဝါရီ ၂၀ က သင်တန်းစတင်နေတယ်လို့သူကပြောပါတယ်။
သူတို့ အဓိက လိုအပ်ချက်ကတော့ စစ်ပွဲအတွက် လက်နက်ခဲယမ်းနဲ့ ရဲဘော်တွေရဲ့ အသုံးအဆောင်၊စရိတ်တွေ ဖြစ်တယ်လို့ဆိုပါတယ်။
ရဲဘော်တစ်ယောက်အတွက် ရှေ့တန်းတစ်ခါထွက်ရင် အနည်းဆုံး သိန်းရာချီရှိမှ ရတယ်လို့လဲ ပြောပါတယ်။ တပ်ရင်းအနေနဲ့ အောင်နိုင်မှုတွေရှိခဲ့သလိုပေးဆပ်မှုတွေလည်း အများကြီးရှိခဲ့တယ်လို့ လည်း ပြောပါတယ်။
ယင်း တပ်ရင်းရဲ့ တပ်ရင်းမှူး အင်းဆားကူးက တော့ “ကျွန်တော်တို့တပ်ရင်းတပ်ဖွဲ့မှာကတော့ ဒီ အဖက်ဖက်ပေါ့ ကျန်းမာရေး၊CDMတွေပါတယ်၊ ၊ကျောင်းသား၊ ကျောင်းသူ CDM ကျောင်း ဆရာ၊ ဆရာမတွေပါတယ်၊ နိုင်ရာတာဝန်ယူကြတယ်၊ ရုံးပိုင်း၊ ဆေးပိုင်း၊ ထောက်ပို့ပိုင်းနဲ့ တချို့ကတော့ တိုက်ခိုက်ရေးပိုင်းမှာသွားကြတယ်၊ တစ်ဖက်မှာလည်း ဒရုန်းအသင်းအနေနဲ့တိုက်ခိုက်ရေးနည်းပညာကိုလည်းပါဝင်တာတွေရှိတယ်၊ ဒီတပ်ရင်းမှာတော့ လူငယ်လူရွယ်တွေများတယ်၊ တပ်ရင်းကိုဦးဆောင်ပြီးသွားနေတဲ့အချိန်မှာ အခက်အခဲတော့ အများကြီးရှိတယ်၊ သို့သော်ငြားလည်း ဒီတော်လှန်ရေးမှာ တစိတ်တဒေသပါဝင်တယ်ဆိုတဲ့ အထာနဲ့ ကြိုးစားတဲ့အတွက် ဒီနေ့ဒီအချိန်မှာအင်အား ၁၀၀ကျော်နဲ့ မြေပြင်မှာ ဒေသခံတပ်ဖွဲ့ညီနောင်တပ်ရင်းတပ်ဖွဲ့တွေနဲ့ ပူးပေါင်းပြီး တော့ တိုက်ပွဲဝင်နေပါတယ်”လို့ ပြောပါတယ်။
ယင်းတပ်ရင်းရဲ့ လိုအပ်ချက်တွေကို ဖြည့်ဆီးနိုင်ဖို့ အင်းလေးတော်လှန်တိုက်တေး မြူးဇစ်ဗီဒီယို ရောင်းချမှုကို ပြုလုပ်နေပြီး အစောင် ၄၀၀၀ အနက် ၂၈၀၀ ပဲရောင်းရသေးကာ စောင်ရေ ၁၂၀၀ ကျန်သေးတာဖြစ်လို့ တစ်စောင် ၅၀၀၀ နှုန်းနဲ့ ဝယ်ယူအားပေးကြဖို့ယင်းတပ်ရင်းကရဲဘော် နိုင်းနိုင်းက ထပ်မံ၍ ပြောကြားခဲ့ပါတယ်။
အင်းလေးတွင် ရေပေါ်၊ မြေပေါ်၊ ရေတစ်ဝက်ကုန်းတစ်ဝက် ရွာပေါင်း ၄၄၅ ရွာကို ကိုယ်စားပြုပြီး စစ်အာဏာရှင်ဖြုတ်ချရေးနွေဦးတော်လှန်ရေးတွင်ပါဝင်တဲ့ တစ်ခုတည်းသော အင်းလေးဒေသကိုယ်စားပြု တော်လှန်ရေးတပ်အဖြစ် 1009(IPRD) ဟာ လက်ရှိ ကရင်နီဖက်မှာ တိုက်ပွဲဝင်နေသလို စစ်ဘေးရှောင်တွေကို ဘေးလွတ်ရာ ကယ်ပို့နေကြောင်း သိရှိရပါတယ်။
MK – 012
#MeKongNews
#အင်းလေး
#သင်တန်း
#တပ်သား
#ရှမ်းတောင်