မဲခေါင်၊ ဇန်နဝါရီ ၂၂
ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးဟဲယာရွာမ မူလတန်းကျောင်းမှာ ပြုလုပ်တဲ့ ပညာရေးစုံညီပွဲမှာ ရှမ်းပြည်တိုင်းရင်းသားရေးရာဝန်ကြီးဖြစ်တဲ့ ဦးအောင်ကြည်ဝင်းရဲ့တူတော်စပ်သူ ကျေးရွာအုပ်ချုပ်ရေးမှူး က လောင်းကစားဝိုင်းတွေ ထည့်သွင်းပြုလုပ်နေတယ်လို့ ဒေသခံတွေက ပြောပါတယ်။
ပညာရေးစုံညီပွဲတော်မှာ လောင်းကစားဝိုင်းတွေ ထည့်သွင်းခဲ့တာဟာ ကလေးတွေရဲ့ စာရိတ္တကို ထိခိုက်စေတယ်လို့ ဒေသခံတွေက ဝေဖန်ထောက်ပြကြပါတယ်။
ယင်းကိစ္စနဲ့ပတ်သက်ပြီး လူထုအတွက်တရားမျှတမှု ဆောင်ရွက်ရေးအဖွဲ့ (Justice Movement for Community-Innlay) က ဒါရိုက်တာ ယုလှိုင်သင်းက “တကယ်က ကျောင်းသားစုံညီပွဲတော်နဲ့ လောင်းကစားနဲ့ဘာဆိုင်သလဲ၊ ကလေးတွေ စာရိတ္တပိုင်းအတုယူမှားနိင်တယ်၊စစ်တပ်က အာဏာသိမ်းပြီးကတဲက အင်းလေးဒေသမှာ လောင်းကစားဝိုင်းနဲ့မူးယစ်ဆေးဝါး ပိုပြီးကျယ်ပြန့်လာတယ်၊ အမိန့်အရလုပ်နေရသလိုပဲ၊ အခုလဲ သတင်ပေးတဲ့သူတွေ ဘယ်သူလဲဆိုတာ ရွာမှာစုံစမ်းမှုတွေလုပ်နေတာရွာလူထုက အရမ်းကြောက်နေကြတယ်” လို့ ပြောပါတယ်။
အဲဒီရွာမ အုပ်ကြီးရဲ့အမျိုးသမီးဟာ လက်ရှိ စစ်ကောင်စီခန့် ပြည်နယ်တိုင်းရင်းသားရေးရာဝန်ကြီး ဦးအောင်ကြည်ဝင်းရဲ့တူမတော်စပ်ပြီး ယခင်အုပ်ချုပ်ရေးမှူး နှုတ်ထွက်သွားတဲ့နောက်မှာ ခန့်အပ်ခဲ့တာပါ။
အဲ့ဒီအုပ်ချုပ်ရေးမှူးကြောင့် ရွာမမှာနိုင်ငံရေးအရ တက်ကြွလှုပ်ရှားတဲ့သူတွေ၊ အဖမ်းခံရတဲ့သူတွေက အဖမ်းခံရ၊ ထွက်ပြေးတဲ့သူတွေကထွက်ပြေးရနဲ့ ရွာသားတွေလဲ အမြဲ စိုးရိမ်ထိန့်လန့်နေရတယ်လို့ ဒေါ်ယုလှိုင်သင်းက ပြောပါတယ်။
ယင်းရွာ ပညာရေးစုံညီပွဲကို ပြီးခဲ့တဲ့ ၁၂ ရက်က ၁၆ ရက်အထိ ပြုလုပ်ခဲ့တာဖြစ်ပြီး ယခုထိလဲလောင်းကစားဝိုင်းကို ရွာမဈေးမှာ ပြုလုပ်နေဆဲဖြစ်တယ်လို့သိရပါတယ်။
CJ-012
#MeKongNews
#အင်းလေး
#ရွာမ
#ဟဲယာရွာ
#တိုင်းရင်းသား
#ဝန်ကြီး