မဲခေါင်၊ ဩဂုတ် ၂၄
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသမှာ စစ်ကောင်စီ လက်အောက်ခံ ရဲနဲ့ PNO ပြည်သူ့စစ်က ဒေသခံတွေကို ဖမ်းဆီး ငွေညှစ်နေတယ်လို့ အင်းလေး ဒေသခံတွေက ပြောပါတယ်။
အဲ့ဒီလို ဖမ်းဆီး ငွေညှစ်ရာမှာ မူးယစ်ဆေးဝါး သာမက PDF နဲ့ အဆက်သွယ် ရှိတယ်ဆိုပြီး ခြိမ်းခြောက် ငွေညှစ်နေတယ်လို့ အင်းလေး အနောက်ဘက်ကမ်းနေ ဒေသခံ တစ်ဦးက ပြောပါတယ်။
ပြီးခဲ့တဲ့ ဇူလိုင်လကုန်ပိုင်းမှာ ကျေးပေါခုံကျေးရွာအုပ်စုရှိ ကျေးရွာ တစ်ရွာမှာ ရဲနဲ့ လွယ်မောရွာ အခြေစိုက် PNO ပြည်သူ့စစ်အဖွဲ့က ဒေသခံ ၂ ဦးကို ဖမ်းဆီးပြီး ငွေညှစ်တာကြောင့် သိန်း ၈၀ နဲ့ ပြန်ရွေးခဲ့ရတယ်လို့ ဒေသခံတွေက ဆိုပါတယ်။
“သူတို့ပြောတာက ဒီအိမ်က အရင်တုန်းက မူးယစ်ဆေးဝါး ရောင်းဖူးလို့ လာဖမ်းတာတဲ့၊ လာဖမ်းတဲ့ အချိန်မှာ ဘာမူးယစ်ဆေးဝါးမှ မတွေ့ဘူး။ အဲ့ဒီအိမ်က မူးယစ်ဆေးဝါး ရောင်းတာလည်း မဟုတ်ဘူး။ အဲ့ဒါကို အိမ်မှာရှိတဲ့ လူ ၂ ယောက်ကို ဖမ်းသွားတာ၊ လမ်းတဝက်မှာ သိန်း ၈၀ နဲ့ ပြန်လာရွေးခိုင်းလို့ သူတို့ရောက်တဲ့နေရာ လမ်းပေါ်မှာပဲ သိန်း ၈၀ လိုက်ပေးမှ ပြန်လွှတ်ပေးတယ်” လို့ ဖြစ်စဉ်ကို သိရှိတဲ့ ဒေသခံ တစ်ဦးက ပြောပါတယ်။
ရဲတပ်ဖွဲ့ ဖမ်းဆီး ငွေညှစ်နိုင်ဖို့ PNO ပြည်သူ့စစ်နဲ့ အင်းလေး ပျူစောထီးတွေက အဓိက လမ်းကြောင်းရှာပေးတာ၊ သတင်းအချက်အလက် ပေးတာတွေ ပြုလုပ်နေယ်လို့လည်း ဒေသခံတွေက ပြောပါတယ်။
“ပြည်သူ့စစ်တွေ ပျူစောထီးတွေက ဘယ်ရွာမှာ ဘယ်သူတွေက မူးယစ်မှုနဲ့ ထောင်ကျဖူးတယ်။ ဘယ်သူဌေးက မူးယစ်ဆေးဝါး ရှူဖူးတဲ့သူရဲ့ အမျိုး ဖြစ်တယ်။ ဘယ်သူက ယာမ ရှူဖူးတယ် အဲ့လိုသိတော့ အဲ့လို လုပ်ဖူးတဲ့ အိမ်တွေ လုပ်ဖူးတဲ့ သူတွေရဲ့ ဆွေမျိုးတွေကို အဓိက ပစ်မှတ်ထားပြီး ဖမ်းဆီး ငွေညှစ်တာပေ့ါ။ သူတို့က ရဲတွေကို ခေါ်လာ လမ်းပြတယ်။ ရဲတွေက လက်ထိပ်ခတ် ဖမ်းသွားတယ်။ ပြီးမှ သူတို့က ကြားထဲက ဝင်ညှိပေးသလိုနဲ့ ငွေဘယ်လောက် ဘယ်လောက်နဲ့ လိုက်ရွေးဆိုပြီးတော့ လုပ်စားကြတယ်” လို့ နောက်ထပ် ဒေသခံ တစ်ဦးက ပြောပါတယ်။
ပြီးခဲ့လ ဩဂုတ်လ ၈ ရက်နေ့ကလည်း အင်းလေးဒေသ၊ အရှေ့ဘက်ကမ်းက ကျေးရွာ တစ်ရွာမှာ PNO ပြည်သူ့စစ်က ဒေသခံ တစ်ဦးရဲ့ ခရမ်းချဉ်သီးခြံထဲ ဝင်ရောက်ပြီး ခြံထဲမှာ အလုပ်လုပ်နေတဲ့ ခြံပိုင်ရှင်ကို ငွေ ၈ သိန်း တောင်းခဲ့တယ်လို့ ဖြစ်စဉ်ကို သိရှိသူ ဒေသခံတွေက သတင်းပေးပို့ပါတယ်။
“ခြံပိုင်ရှင်က ခြံထဲမှာ အလုပ်လုပ်နေတာ။ အဲ့ဒါ ဦးကုလား ခေါင်းဆောင်တဲ့ PNO ပြည်သူ့စစ်တွေက သေနတ် တွေနဲ့ ရောက်လာပြီးတော့ ခြံရှင်က အရင်က ယာမ ရှူဖူးတယ်လို့ ပြောပြီး ငွေ ၈ သိန်းတောင်းတယ်။ သေနတ်တွေကိုလည်း မောင်းတင်ပြီး ခြိမ်းခြောက်တော့ ခြံရှင်က ကြောက်ကြောက်နဲ့ ပေးရသေးတယ်” လို့ ဒေသခံ တစ်ဦးက ပြောပါတယ်။
PNO ပြည်သူ့စစ်နဲ့ စစ်ကောင်စီပ အကြောင်းအမျိုးမျိုးပြပြီး ပြည်သူကို ငွေညှစ်ရာမှာ မူးယစ်ဆေးဝါးမှု သိန်း ၆၀ နဲ့အထက် တောင်းပြီး လူမှုကွန်ရက်ပေါ်မှာ နိုင်ငံရေး ပိုစ့်တင်တာ မျှဝေတာတွေကိုတော့ သိန်း ၂၀ နဲ့ ၃၀ ကြား တောင်းလေ့ရှိတယ်လို့ နောက်ထပ် အင်းလေး ဒေသခံ အမျိုးသမီး တစ်ဦးက ပြောပါတယ်။
“အဲ့ဒီ ပျူစောထီးနဲ့ PNO ပြည်သူ့စစ်တွေက စစ်ကောင်စီကို လမ်းပြပြီး ခေါ်လာလို့ စစ်ကောင်စီတွေက အင်းထဲမှာ သောင်းကျန်းနိုင်တာ။ သူတို့ အဖွဲ့တွေကလည်း စစ်ကောင်စီ အားကိုးနဲ့ အင်းထဲမှာ လူပြန်ပေးဆွဲပြီး ငွေတွေ တောင်းစားနေတာ အခုထိပဲ” လို့ အင်းလေး ဒေသခံ တစ်ဦးက ပြောပါတယ်။
စစ်တပ် အာဏာသိမ်းပြီးနောက်ပိုင်း PNO ပြည်သူ့စစ်နဲ့ ပျူစောထီးတွေဟာ အင်းလေးဒေသမှာ စစ်ကောင်စီနဲ့ ပူးပေါင်းပြီး ပြည်သူလူထုကို ဖမ်းဆီးကာ မတရား ငွေညှစ်တာတွေ ပြုလုပ်နေတယ်လို့ ပြီးခဲ့တဲ့လက ထုတ်ပြန်တဲ့ Justice Movement for Community-InnLay (JMC-Innlay) အဖွဲ့ရဲ့ အစီရင်ခံစာမှာ ဖော်ပြထားပါတယ်။
CJ-002
#MeKongNews
#အင်းလေး
#PNO_ပြည်သူ့စစ်
#မူးယစ်ဆေးဝါး
