မဲခေါင်၊ မတ် ၁၃
ရှမ်းပြည်မြောက်ပိုင်း၊ သီပေါ-ကျောက်မဲ ကားလမ်းကို ဒီနေ့ မတ်လ ၁၃ ရက် မနက်ပိုင်းက စကာ ပိတ်လိုက်လို့ သီပေါတိုးဂိတ်မှာ ကားတွေ စုပြုံရပ်ထားရတယ်လို ဒေသခံ သတင်းရင်းမြစ်ထံက သိရပါတယ်။
ယခင်က သီပေါဘက်ကို သွားတဲ့ ကားလေးတွေ ကျိုးကျနေတဲ့ ကျင်သီတံတားအထိ သွားလို့ရနေပေမယ့် ဒီနေ့မနက်မှာတော့ သွားခွင့်မရတော့ဘဲ သီပေါဘက်က ကျောက်မဲဘက်ကို သွားတဲ့ကားလေးတွေကို လှည့်ပြန်ခိုင်းလို့ သီပေါတိုးဂိတ်မှာ ကားလေးတွေ တန်းစီရပ်နေရတယ်လို့ သူက ပြောပါတယ်။
“ပလောင်က ပေးမသွားတာ၊ တိုက်ပွဲတွေဖြစ်တော့မယ့် အနေထားလို့ ထင်တယ်၊ ပြီးတော့ SSPP နဲ့ဟိုဖက်ဒီဖက် ကတုတ်ကျင်းတွေ အခိုင်အမာတူးနေကြတာမှာ စစ်တပ်လဲတူးနေတော့ ဘယ်အချိန်စစ်မီးတောက်မလဲ လူတွေစိုးရိမ်နေကြတယ်၊ စာမေးပွဲတွေကလဲ မပြီးသေးတော့ တဖက်နဲ့တဖက် ထိန်းနေကြဟန်တူတယ်၊ ကလေးတွေ စာမေးပွဲပြီးပြီဆိုရင်တော့ သုံးပွင့်ဆိုင် စစ်တွေဖြစ်ကြတော့မယ်`လို့ သူက ပြောပါတယ်။
လားရှိုးဘက်က ဆင်းလာတဲ့ ကားလေးတွေဟာ ကျိုးကျနေတဲ့ ကျင်သီတံတား ဟိုဘက်ကမ်း ဒီဘက်ကမ်း ကားချင်းချိန်းပြီး လူနဲ့ပစ္စည်း သယ်နေကြတာမှာ ခုလို သီပေါအထွက် ကို TNLA က ပိတ်လိုက်တဲ့အတွက် ကျောက်မဲ-မန္တလေးကို ဆက်လာလို့ မရတော့လို့ အခက်အခဲတွေများစွာ ကြုံတွေ့နေရတယ်လို့ သိရပါတယ်။
ယင်းကျင်သီတံတား ကျိုးကျနေပြီး ပြန်လည်ပြင်ဆင်တာမရှိတာကြောင့် သီပေါကနေ ၃ မိုင်ခန့်အကွာမှာ AAA ကုမ္ပဏီက ဂေါ်ဒန်ကျောက်တွေကို သယ်ယူဖို့ ကျင်သီတံတားကနေ ၂ မိုင်ခန့်အကွာမှာ ရုံးဖွင့်ပြီး တံတားဟိုဘက် ဒီဖက် ကဲ့ပြီး သယ်ယူနေကြတာ ဖြစ်ပြီး ယင်းကုမ္ပဏိက ကားတွေကလွဲလို့ ကျန်ကားကြီးကားသေးတွေ သွားလာခွင့်မရတော့တာလို့ ဆိုပါတယ်။
ရက်ပိုင်းအတွင်း ကျောက်မဲ-သီပေါကြား မန္တလေး-လားရှိုး ပြည်ထောင်စုလမ်းမကြီးရဲ့ဘေး တစ်ဖက်တစ်ချက်မှာ TNLA၊ SSPP တို့ အခိုင်အမာ ကတုတ်ကျင်းတွေတူးနေကြသလို စစ်ကောင်စီကလည်း အခြေချ စကခ(၁)နဲ့ခမရ ၅၀၁၊ ၅၀၂ တွေမှာ လဲ ဘက်ဟိုးတွေနဲ့ ကတုတ်ကျင်းတွေတူးနေကြတယ်လို့ သိရပါတယ်။
ထို့အတွက် ကိုယ်စီအင်အားအများအပြား ဖြည့်နေကြတာတွေ့မြင်နေရတာတွေအပြင် ခုလို လမ်းပိတ်လိုက်တာဟာ တိုက်ပွဲတွေ အချိန်မရွေးဖြစ်လာနိုင်တယ်လို့ ဒေသခံတွေက သုံးသပ်ကာ စိုးရိမ်ထိတ်လန့်နေကြတယ်လို့ သိရပါတယ်။
MK-012