မဲခေါင်၊ သြဂုတ် ၇
ရှမ်းပြည်နယ် တောင်ပိုင်းက ထွက်ရှိတဲ့ ဂေါ်ဖီထုပ် ဈေးတွေ ထိုးကျနေတာကြောင့် တောင်သူတွေ အရှုံးပေါ် နေကြတယ်လို့ ဒေသတွင်း စားဖိုဆောင် သီးနှံ ပွဲရုံတွေထံက သိရပါတယ်။
ကရင်ပြည်နယ်၊ မြဝတီမြို့နဲ့ မွန်ပြည်နယ် ဘီးလင်းမြို့မှာ ဩဂုတ်လ ၅ ရက်နေ့က မိုးသည်းထန်စွာ ရွာသွန်းမှုနဲ့ အတူ ရေကြီးနေတာကြောင့် လမ်းပန်းဆက်သွယ်ရေး ခက်ခဲပြီး အခုလို ဈေးတွေ ထိုးကျလာတာပါ။
တောင်ကြီးမြို့ ပွဲရုံပိုင်ရှင် တစ်ဦးက “ကားတွေက ဘယ်လိုမှ သွားလို့ မရတော့ဘူး။ ကုန်ကားတွေ မှောက်ကုန်တယ်။ တခြားဟာတွေလည်း ဈေးကျပေမယ့် ဂေါ်ဖီထုပ်က သိသိသာသာကို ဈေးကျတာ။ ဒါပေမယ့် ခဏပါပဲ။ မိုးကုန်ပြီး လမ်းကောင်းလာရင် ပြန်တက်မှာပါ” လို့ ပြောပါတယ်။
အရင်က ဂေါ်ဖီထုပ် တစ်ထုတ် ၅၀၀ ကျပ်နဲ့ ၁,၀၀၀ ကျပ်ကြား ဈေးရပေမယ့် လက်ရှိ ၂၀၀ ကျပ်ခန့်သာ ပေါက်ဈေး ရှိတော့တယ်လို့ ဆိုပါတယ်။
ဒီနှစ်ထဲမှာ မြေဩဇာနဲ့ ပိုးသတ်ဆေး စျေး ၃ ဆနီးပါး တက်လာတာကြောင့် ဂေါ်ဖီထုပ် ဈေးကျတာဟာ များစွာ ဆုံးရှုံးနစ်နာမှု ဖြစ်တယ်လို့ တီကျစ်မြို့ ဒေသခံ တောင်သူ တစ်ဦးက ပြောပါတယ်။
“ဈေးကျတာထက် ဈေးကို မရှိတာ။ ၂၀၀ (ကျပ်) တောင်မှ ဘယ်သူမှ မဝယ်ကြတော့ဘူး။ ကျနော်တို့ နိုင်ငံရေး မကောင်း၊ ကုန်ဈေးနှုန်းတက်တဲ့ကြားက ငွေတိုးယူပြီး စိုက်ထားတာ။ ဒီလိုဈေးနဲ့ဆိုရင် အတိုးပေါ် အတိုး ဆင့်တော့မယ်” လို့ သူကပြောပါတယ်။
ရှမ်းပြည်နယ် တောင်ပိုင်း နောင်တရား၊ တီကျစ်၊ အောင်ပန်း၊ ရွာငံ၊ ပင်းတယ စတဲ့ ဒေသတွေမှာ ဂေါ်ဖီထုပ်တွေ စိုက်ပျိုးကြပြီး အဲဒီ ဒေသတွေအားလုံးက တောင်သူတွေ အရှုံးပေါ်နေကြတယ်လို့ ပွဲရုံပိုင်ရှင်တွေက ပြောပါတယ်။
CJ-007
#Mekongnews
#ရှမ်းတောင်
#ဂေါ်ဖီထုပ်
#မြေသြဇာ_ပိုးသတ်ဆေး
