မဲခေါင်၊ ဧပြီ ၁၁
ကချင်ပြည်နယ် ၊ ဖားကန့် နဲ့ ကားမိုင်းကြားရှိ ဖားကန့်လမ်းပေါ်က နန့်ယားစစ်ကောင်စီစခန်းက စစ်ကောင်စီတပ်နဲ့ ရှမ်းနီ ပြည်သူ့စစ် ပူးပေါင်း အဖွဲ့ အားလုံ အလံဖြူထောင် လက်နက်ချပြီး ထွက်ပြေးသွားကြောင်း KIA ရှေ့တန်း အသိုင်းအဝိုင်းဆီက သိရပါတယ်။
“ အလံဖြူထောင် လက်နက်ချသွားတာ။ စစ်ကောင်စီ စစ်သားတွေရော၊ ရှမ်းနီ ပြည်သူ့ စစ်တွေရောပဲ။ အဲဒီ စခန်းမှာ ရှိနေတဲ့သူတွေ အကုန် လက်နက်ချသွားတာ။ အင်အားက ၅၀ လောက်ပဲ ရှိမယ်။” လို့ KIA အရာရှိ တစ်ဦးက ပြောပါတယ်။
စစ်ဆေးရေးဂိတ် တပ်စခန်းကို ဧပြီလ ၁၁ ရက်နေ့ မနက်ပိုင်း ၇ နာရီ ၁၀ မိနစ်ခန့်က KIA တပ်မဟာ ၉ နဲ့ ပူးပေါင်း တော်လှန်ရေးမဟာမိတ်တပ်ဖွဲ့တွေက ရှင်းလင်းရေးလုပ်ပြီး အပြီးအစီး သိမ်းပိုက်လိုက်တာ လို့ သူကပြောပါတယ်။
“ အဲဒီစခန်းထဲ မနေ့ည ၁၀ နာရီခန့် ကတည်းက ဝင်တိုက်နေပြီ။ စစ်ကောင်စီတွေက အလံဖြူထောင်ပြီး ထွက်သွားတာ။ ဒီမနက် ၇ နာရီ ကျော်မှ စခန်းကို ရှင်းလင်းရေး လုပ်လိုက်တာ။ အကုန် ရှင်းသွားပြီ” လို့ နောက်ထပ် သတင်း ရင်းမြစ် တစ်ဦးက ပြောပါတယ်။
ထွက်ပြေးသွားတဲ့ စစ်ကောင်စီ အယောက် ၃၀ ခန့်ကိုလည်း KIA နဲ့ ပူးပေါင်း တပ်ဖွဲ့တွေက ဖမ်းမိထားတယ်လို့ KIA ရှေ့တန်း နဲ့ နီးစပ်သူတွေဆီက သိရပါတယ်။
အဲဒီ နန့်ယား စစ်ကောင်စီက ခလရ – ၁၂၀ နဲ့ ရှမ်းနီ ပြည်သူ့စစ်တွေ ပူးပေါင်းထားပြီး ပုံမှန်အားဖြစ် ဖားကန့် နဲ့ မြစ်ကြီးနားကြား ခရီးသွားနဲ့ ကားတွေကို ဌာနဆိုင်ရာတွေနဲ့ ပူးပေါင်းပြီး စစ်ဆေးရေးလုပ်တဲ့ စုပေါင်း စစ်ဆေးရေးဂိတ် တပ်စခန်းဖြစ်တယ်လို့ ဆိုပါတယ်။
CJ-008