မဲခေါင်၊ နိုဝင်ဘာ ၇
ရှမ်းပြည်နယ် တောင်ပိုင်း၊ ပင်လောင်းမြို့နယ် အတွင်း ရောက်ရှိနေတဲ့ စစ်ဘေးရှောင် ပြည်သူတွေ အတွက် ဆောင်းရာသီ အကြို ရောက်လာလို့ အနွေးထည်တွေ စတင်လိုအပ်လာပြီး ကူညီဖို့ မေတ္တာရပ်ခံတယ်လို့ စစ်ဘေးရှောင်တွေကို ကူညီနေသူ တစ်ဦးက ပြောပါတယ်။
လက်ရှိ ပင်လောင်းမြို့နယ်မှ တစ်ရက်ပြီး တစ်ရက် ပိုအေးလာပြီ ဖြစ်တဲ့အတွက် စစ်ဘေးရှောင် ပြည်သူတွေ အတွက် စောင်တွေ အနွေးထည်တွေ လိုအပ်နေပြီလို့ သူကပြောပါတယ်။
“စောင်အထူတွေ အနွေးထည် အင်္ကျီတွေ ကူညီဖို့ လိုတယ်ဗျ။ ပင်လောင်းမှာက အခုအချိန် ခိုက်ခိုက်တုန်အောင် တော်တော်အေးနေပြီ။ သူတို့က မိုးကာနဲ့မိုးတဲ့ တဲတွေမှာနေရတော့ ပိုပြီးတော့ လိုအပ်တယ်။ အနွေးထည်တွေ ပိုနေတာတွေဖြစ်ဖြစ်၊ စုပေါင်းပြီးဖြစ်ဖြစ် ကူညီဖို့လိုတယ်” လို့ စစ်ဘေးရှောင် ကူညီနေသူ တစ်ဦးက ပြောပါတယ်။
လက်ရှိ မိုးရာသီနဲ့ ဆောင်းရာသီ အကူးအပြောင်း ကာလ ဖြစ်တဲ့အတွက် ရာသီတုပ်ကွေး ဖျားနာမှု များပြားနေတယ်လို့ ဆိုပါတယ်။
“ညဘက်ဆို ပင်လောင်းမြို့နယ် အပူချိန်က ၁၇ – ၁၈ အထိ ပဲရှိတော့ ညဘက်နဲ့ မနက်ခင်းဆို တော်တော်အေးနေပြီလေ။ ဒါကြောင့် စစ်ဘေးရှောင်တွေကို လူသားချင်း ကိုယ်ချင်းစာပြီး အနွေးထည်တွေ စောင်အထူတွေကို ကူညီကြဖို့ တိုက်တွန်းချင်တယ်”လို့ ပင်လောင်းမြို့နေ ဒေသခံ လူငယ် တစ်ဦးက ပြောပါတယ်။
လက်ရှိ ပင်လောင်းမြို့နယ်အတွင်း ဆေးဝါးနဲ့ စားနပ်ရိက္ခာ သယ်ယူရာမှာ စစ်ကောင်စီနဲ့ PNO ပြည်သူ့စစ်က တင်းကြပ်စွာ စစ်ဆေးတာ၊ ငွေတောင်း ဒဏ်ငွေရိုက်တာတွေကြောင့် ဆေးဝါးစျေး မြင့်တက်နေပြီး သယ်ယူဖို့ ခက်ခဲနေပါတယ်။
ကရင်နီပြည်နယ်က တိုက်ပွဲတွေနဲ့ ပင်လောင်းမြို့နယ် တောင်ပိုင်း နယ်စပ်ဘက် တိုက်ပွဲတွေကြောင့် အဲ့ဒီဒေသက ပြည်သူတွေဟာ ပင်လောင်းမြို့နယ်ထဲ စစ်ဘေးရှောင်လာရာ လက်ရှိ စစ်ဘေးရှောင် ပြည်သူတွေ ၃,၀၀၀ ကျော် ရှိနေဆဲ ဖြစ်ပါတယ်။
CJ-002
#MekongNews
#ပင်လောင်းမြို့နယ်
#စစ်ဘေးရှောင်
#အနွေးထည်