မဲခေါင်၊ ဧပြီ ၂

မြန်မာနိုင်ငံအနှံ့က နိုင်ငံရေးအကျဥ်းသားတွေအပေါ် လုံလောက်တဲ့ ကျန်းမာရေးစောင့်ရှောက်မှုတွေ ရရှိစေဖို့အတွက် “ အသက်တွေကို ပိတ်မထားနဲ့ ဖွင့်ပေး” ဆိုတဲ့ ကမ်ပိန်းကို မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက်ရဲ့ အဖွဲ့ဝင်တွေက ဧပြီလ ၂ ရက်နေ့မှာ ပြုလုပ်ခဲ့တယ်လို့ သိရပါတယ်။

ကမ်ပိန်းပြုလုပ်ဖြစ်တာကတော့ အကျဥ်းထောင်တွေထဲမှာ အချိန်မှီဆေးဝါးကုသခွင့်မရလို့ သေဆုံးခဲ့ရတဲ့ နိုင်ကျဥ်းတွေ ထပ်မရှိစေရေး၊ အရေးပေါ်လူနာတွေကို ပြင်ပဆေးရုံတွေမှာ ကုသခွင့်ပြုရေးနဲ့ ထောင်အတွင်း ဆေးဝါးလုံလောက်စွာထားရှိစေရေးတွေကို ရည်ရွယ်တယ်လို့ ဆိုပါတယ်။

“ ထောင်တွေက နိုင်ငံခြားဆေးတွေ သွင်းခွင့်ကို ပိတ်ပင်ထားတယ်။ တခါတလေ သွင်းခွင့်ရရင်တောင် ကန့်သတ်တာတွေများတယ်။ ဆေးကို ကြာရှည်မှီဝဲနေရတဲ့သူတွေအတွက်ဆို အရမ်းကို ဒုက္ခရောက်စေတယ်ပေါ့နော်” လို့ အဖွဲ့ တာဝန်ရှိသူက ပြောပါတယ်။

နိုင်ငံရေးအကျဥ်းသူ အကျဥ်းသား ၇ ဦးက ၂၀၂၄ ခုနှစ်အတွင်း အကျဥ်းထောင်မှာ ဆေးဝါးလုံလောက်မှုမရှိတာ၊ ပြင်ပဆေးရုံကို ဆေးကုသခွင့်နောက်ကျတာတွေကြောင့် အချိန်မတန်ဘဲ အသက်ဆုံးရှုံးခဲ့ရတယ်လို့ သိရပါတယ်။

အကျဥ်းထောင်အတွင်းရှိ အကျဥ်းသားတွေရဲ့ ကျန်းမာရေးစောင့်ရှောက်မှုတွေရရှိစေဖို့အတွက် ပြင်ပက နိုင်ငံတကာအဖွဲ့အစည်းတွေနဲ့ လူအခွင့်အရေးအဖွဲ့အစည်းတွေက စစ်ကောင်စီတပ်နဲ့ အကျဥ်းဦးစီးဌာနတွေကို ဖိအားပေးဖို့ကိုလည်း တောင်းဆိုထားပါတယ်။

CJ-004

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)