မဲခေါင်၊ ဧပြီ ၁၇

ရှမ်းပြည်နယ်၊ တောင်ကြီးမြို့၊ ရတနာသီရိရပ်ကွက်မှာ စစ်မှုထမ်း အကျုံးဝင်သူ အမျိုးသား အယောက် ၂၀ ကို မဲနှိုက်ခွင့်မပေးဘဲ ချက်ချင်း စစ်မှုထမ်းဆင့်ခေါ်စာနဲ့ ရောက်လာတယ်လို့ ရပ်ကွက်နေ ပြည်သူတွေက ပြောပါတယ်။

မတ်လ ၁၇ ရက်နေ့က အကျုံးဝင်သူတွေ မဲနှိုက်ကြဖို့ အုပ်ချုပ်ရေးမှူး ဦးမောင်မောင်ဝင်းက တစ်ရပ်ကွက်လုံး လိုက်လံကြေညာခဲ့ပြီး နောက်ရက် ၁၈ ရက်နေ့မှာပဲ မဲနှိုက်ဖို့ သွားကြတဲ့အချိန်မှာ မဲပေါက်ပြီးသား ဖြစ်နေတယ်လို့ ဆိုပါတယ်။

စစ်မှုထမ်း အကျုံးဝင်သူနဲ့ နီးစပ်သူ တစ်ဦးက “ကာယာကံရှင်တွေက သိလည်းမသိ၊ နှိုက်လည်း မနှိုက်ရဘဲ မဲပေါက်နေတာပါ။ မလွဲသာလို့ မဖြစ်မနေ ထမ်းရမယ်ဆိုလည်း ထမ်းမယ်။ ဒါပေမယ့် ပွင့်လင်းမြင်သာမှု ရှိစေချင်တယ်။ ကိုယ်တိုင် မဲနှိုက်ခွင့် ရချင်တယ်။ ပေါက်တာမပေါက်တာကို ကိုယ့်ကြမ္မာကိုယ် ဖန်တီးခွင့် ရချင်တယ်” လို့ ပြောပါတယ်။

မဲပေါက်သူ အားလုံးက မနက်ဖြန် (ဧပြီ ၁၂) နောက်ဆုံးထားကာ တောင်ကြီးမြို့၊ အရှေ့ပိုင်းတိုင်း စစ်ဌာနချုပ် (ရပခ)ဝင်းက စစ်ဆေးရုံမှာ ဆေးစစ်ကြဖို့ ညွှန်ကြားထားပြီး သင်္ကြန်ကာလအပြီး ချက်ချင်း စစ်မှုထမ်း ခေါ်ယူမယ်လို့ နီးစပ်သူတွေဆီက သိရပါတယ်။

ဒါ့အပြင် သတ်မှတ်ရက်အမီ ဆေးမစစ်တဲ့သူတွေကိုလည်း ဖမ်းဝရမ်းထုတ်မှာ ဖြစ်ပြီး ထွက်ပြေးတဲ့သူတွေကို ဖမ်းဆီး ထောင်ချမယ်လို့ အုပ်ချုပ်ရေးမှူးက ထိန်းချုပ်ထားပါတယ်။

ရာအိမ်မှူးနဲ့ နီးစပ်သူ တစ်ဦးက “ပြေးချင်တာပေါ့ အကုန်လုံးက အခြေခံ လူတန်းစားတွေလေ။ ချမ်းသာသူ တစ်ယောက်မှ မပါဘူး။ ဘယ်က ပိုက်ဆံနဲ့ ယူပြေးကြမလဲ” လို့ ပြောပါတယ်။

အခု ဆင့်ခေါ်ခံရတဲ့ အယောက် ၂၀ ဟာ ရတနာသီရီရပ်ကွက်အတွက် တစ်နှစ်စာ ဖြစ်ပြီး ၁၅ ယောက်ကို အရင်ခေါ်ယူမှာ ဖြစ်ကာ နောက်ထပ် ၅ ဦးကတော့ အရံဖြစ်တယ်လို့ အုပ်ချုပ်ရေးမှူးနဲ့ နီးစပ်သူတွေဆီက သိရပါတယ်။

MK-014

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)