မဲခေါင်၊ ဇူလိုင် ၂၉

ရှမ်းပြည်နယ်ရဲ့ မြို့တော်၊ တောင်ကြီးမြို့မှာ မိုးသည်းထန်စွာ ရွာသွန်းမှုကြောင့် မြို့ရှောင်လမ်း နေရာ တချို့ ပျက်စီးနေလို့ ဒေသခံတွေ သွားလာရေး အခက်အခဲ ဖြစ်နေတယ်လို့ မြို့ခံတွေက ပြောပါတယ်။

ဇူလိုင်လ ၂၀ ရက်နေ့ကစပြီး တောင်ကြီးမြို့မှာ တစ်ပတ်ကျော်ကြာ မိုးသည်းထန်စွာ ရွာသွန်းတာကြောင့် လမ်းပိုင်းနေရာတွေ ပျက်စီးခဲ့တာလို့ လင်းကွင်းကျေးရွာမှာ နေထိုင်သူ တစ်ဦးက ပြောပါတယ်။

“မိုးကမရွာတာ ကြာပြီလေ။ မိုးဦးမရွာဘဲ အခုမှ ဆက်တိုက်ရွာတော့ ရေစီးတွေများပြီး လမ်းပျက်တာပေါ့။ အခု ပြင်ဆင်မှုကို ယာယီ ကိုယ်ထူကိုယ်ထ လုပ်ထားပေမယ့် ကားကြီးတွေသွားရင် ခက်ခဲတာပေါ့။ ကား ၂ စီး ထိပ်တိုက်တွေ့ရင် စောင့်ပေးနေရတော့ ခရီးမတွင်တော့ဘူး” လို့ သူကပြောပါတယ်။

လက်ရှိမှာတော့ လမ်းပိုင်းပျက်စီးနေတဲ့ နေရာတွေကို သွားလာရ လွယ်ကူအောင် ဒေသခံတွေက သဲအိတ်တွေ၊ မြေတွေဖို့ပြီး ပျဉ်ချပ်တွေ ခင်းပေးထားတယ်လို့ သူက ဆက်ပြောပြပါတယ်။

မိုးရွာသွန်းမှုကြောင့် မြို့ရှောင်လမ်းအပြင် တောင်ကြီးမြို့၊ ကံကြီးရပ်ကွက်မှာ လမ်းတချို့ ပျက်စီးသွားပါသေးတယ်။

တောင်ကြီးမြို့၊ မြို့ရှောင်လမ်းဟာ ညို့မီး၊ ဆင်တောင်၊ ဇလဲ၊ ကံကြီး၊ ရွှေညောင် စတဲ့ ဒေသတွေကို ဆက်သွယ်ထားပြီး ၂၀၁၉ ခုနှစ်၊ မေလက အမျိုးသား ဒီမိုကရေစီ အဖွဲ့ချုပ်ပါတီ-NLD အစိုးရ လက်ထက်က စတင် ဖောက်လုပ်ခဲ့တာ ဖြစ်ပါတယ်။

ဒါပေမယ့် NLD လက်ထက်က မပြီးစီးခဲ့ဘဲ စစ်ကောင်စီက ဆက်လက် ဖောက်လုပ်ခဲ့ရာ လက်ရှိ ပျက်စီးနေတဲ့ နေရာတွေဟာ စစ်ကောင်စီ ဖောက်လုပ်ခဲ့တဲ့ နေရာတွေဖြစ်ပြီး အရည်အသွေး မမီတာနဲ့ ပြုပြင်ထိန်းသိမ်းမှု အားနည်းတာကြောင့် အခုလို ပျက်စီးရတာ ဖြစ်တယ်လို့ ဒေသခံတွေက ဝေဖန်ပြောဆိုပါတယ်။

CJ-007

#Mekongnews

#တောင်ကြီးမြို့

#မြို့ရှောင်လမ်း

#NLD

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)