မဲခေါင်၊ ဇူလိုင် ၂၈
ရှမ်းပြည်နယ်ရဲ့ မြို့တော်၊ တောင်ကြီးမြို့လယ် ဟိုတယ် တစ်ခုမှာ တည်းခိုနေတဲ့ ကရင်နီ ဒေသခံတွေကို စစ်တပ်က ဧည့်စာရင်း စစ်ပြီး ငွေတောင်းနေတယ်လို့ ဟိုတယ်၊ တည်းခိုခန်းတွေနဲ့ နီးစပ်သူတွေက ပြောပါတယ်။
ဇူလိုင်လ ၂၅ ရက်နေ့၊ ညက ကရင်နီပြည်နယ်၊ လွိုင်ကော်မြို့ကနေ လာရောက်ပြီး တောင်ကြီးမြို့လယ်ခေါင် ဟိုတယ် တစ်ခုမှာ တည်းခိုခဲ့သူ တစ်ဦးက မှတ်ပုံတင်မှာ လွိုင်ကော် ဖြစ်နေတာကြောင့် ငွေကျပ် ၂၀,၀၀၀ ပေးလိုက်ရတယ်လို့ ပြောပါတယ်။
“တံခါးလာခေါက်ပြီး မှတ်ပုံတင် စစ်တယ်။ သူ့တို့အခေါ် ဧည့်စာရင်း စစ်တာပေါ့။ အဲဒီမှာ ၂ မျဉ်းစောင်း ဖြစ်နေလို့ ပိုက်ဆံ ၅၀,၀၀၀ ပေးရမယ် ပြောတယ်။ ကျနော်တို့လည်း အဲလောက် မပါဘူးပြောပြီး ဈေးဆစ်တာနဲ့ ၂၀,၀၀၀ ပဲ ပေးလိုက်ရတယ်” လို့ သူကပြောပါတယ်။
တောင်းတဲ့ငွေ မပေးပါက PDF တွေ ဆက်စပ်တယ်ဆိုပြီး ဖမ်းဆီးမယ်လို့ ခြိမ်းခြောက်ကာ အဓမ္မ တောင်းခံ ခဲ့တာလို့ သူက ရှင်းပြပါတယ်။
အလားတူ ဇူလိုင်လ ၁၇ ရက်နေ့ကလည်း တောင်ကြီးမြို့စွန် ရပ်ကွက်က တည်းခိုခန်း တစ်ခုမှာ လွိုင်ကော်မြို့ ကနေ ရောက်လာတဲ့ ဇနီးမောင်နှံ ၂ ဦးကို ခြိမ်းခြောက်ပြီး ငွေကျပ် ၃၀,၀၀၀ တောင်းခံခဲ့တယ်လို့ နီးစပ်သူတွေက ပြောပါတယ်။
ငွေတောင်းခံရတဲ့ ဇနီးမောင်နှံနဲ့ နီးစပ်သူ တစ်ဦးက “အသိထဲကပဲ သူတို့ အဲမှာတည်းနေတုန်း ဧည့်စာရင်း စစ်တာ အကြောင်းပြပြီး ပိုက်ဆံ တောင်းသွားတာ။ ၃၀,၀၀၀ ပေးရတာတော့ သေချာတယ်။ တည်းခိုခန်း နာမည်တော့ သူတို့ ပြဿနာ ရှာမှာစိုးလို့ ပြောပြလို့ မရဘူး။ အခုက ၂ မျဉ်းစောင်း ဆိုတာနဲ့ တောင်းနေတာ” လို့ ပြောပါတယ်။
ရှမ်းပြည်နယ် တောင်ပိုင်း၊ ဖယ်ခုံမြို့နယ်၊ မိုးဗြဲမြို့နဲ့ ကရင်နီပြည်နယ်၊ ဖားဆောင်းမြို့နယ် တွေမှာ တိုက်ပွဲ ပြင်းထန်လာတဲ့ ဇွန်လက စပြီး တောင်ကြီးမြို့မှာ စစ်ဘေးရှောင်တွေ များလာရာ စစ်တပ်က အခုလို စစ်ဆေးပြီး ခြိမ်းခြောက် ငွေတောင်းနေတာပါ။
CJ-007
#MeKongNews
#တောင်ကြီးမြို့
#ဧည့်စာရင်း
#ကရင်နီပြည်နယ်
