မဲခေါင်၊ ဇန်နဝါရီ ၂၆

တော်လှန်ရေးအဖွဲ့တွေ ထိန်းချုပ်ထားတဲ့ ရှမ်းပြည်နယ်တောင်ပိုင်း၊ ဆီဆိုင်မြို့ကို စစ်ကောင်စီက လေကြောင်းက ဗုံးတွေဆက်တိုက်ကြဲနေတာကြောင့် ဒေသခံတွေ စစ်ဘေးရှောင်မရဘဲ ပိတ်မိနေတယ်လို့ သိရပါတယ်။

PNLO က ဇန်နဝါရီ ၂၅ ရက် မနက် ၉ နာရီနောက်ဆုံးထားပြီး တိမ်းရှောင်ကြဖို့ သတိပေးတဲ့အတွက် ဒေသခံ ၈၀ ရာခိုင်နှုန်းလောက် တောင်ကြီး၊ ဟိုပုံး၊ ညောင်ရွှေ၊ အောင်ပန်းတို့ကို ရှောင်တိမ်းသွားကြပေမယ့် ဆိုင်ကယ်၊ ကား အဆင်သင့်မရှိတဲ့ ဒေသခံတွေနဲ့ ဖုန်းလိုင်းအဆက်အသွယ် မရတဲ့သူတွေ၊ မီးဖြတ်ထားတဲ့အတွက် ဖုန်းအားမရှိတဲ့သူတွေ အချိန်မီ တိမ်းရှောင်နိုင်ခြင်းမရှိဘဲ ကျန်နေခဲ့တာပါ။

“လေယာဥ်ကဆက်တိုက်လာနေတော့ မထွက်ရဲတာလည်းရှိတယ်။ လာခေါ်ဖို့ဖုန်းဆက်ထားပြီးမှ တကယ်သွားခေါ်တော့ လိုင်းပြတ်ကုန်လို့ မခေါ်ခဲ့နိုင်တဲ့သူတွေလည်းရှိတယ်။ ကျမတို့မနေ့ကတရက်တည်း ၂ ခါဆင်းခေါ်ပေးတယ်။ နောက်တကြိမ်မှာကျ မြို့ထဲရောက်နေတဲ့အချိန်ကို လေယာဥ်လာတော့ ထပ်ဆင်းခေါ်လို့ မရတော့ဘူး” လို့ တောင်ကြီးမြို့ကနေ ဆီဆိုင်ဒေသခံတွေ စစ်ရှောင်ဖို့ အကြိုအပို့ ကူညီပေးနေသူတစ်ဦးက ပြောပါတယ်။

မနေ့ ဇန်နဝါရီ ၂၅ ရက်ကစပြီး စစ်ကောင်စီက ဆီဆိုင်မြို့ကို လေကြောင်းကနေ ဗုံးအလုံး ၁၀၀ ကျော်နဲ့ အကြိမ် ၂၀ ကျော် တိုက်ခိုက်ခဲ့တယ်လို့ သိရပါတယ်။ မြေပြင်အခြေအနေမှာတော့ ဆီဆိုင်မြို့ထဲမှာ စစ်ကောင်စီ၊ ပအိုဝ်းပြည်သူ့စစ်(PNA)တွေရှိနေတယ်လို့ သိရပါတယ်။

တောင်ကြီးမြို့၊ ဟိုပုံးမြို့ရှိတပ်တွေကနေ ဆီဆိုင်မြို့ကို စစ်အင်အားဖြည့်တင်းနေသလို နမ့်စန်လေတပ်နဲ့ မိတ္ထီလာရှမ်းတဲ လေတပ်ကနေ ဂျက်ဖိုက်တာတွေနဲ့ စစ်ကောင်စီက လေကြောင်းတိုက်ခိုက်မှုတွေ ပြုလုပ်နေတာဖြစ်ပါတယ်။

စစ်ကောင်စီဂိတ်တွေက ဆီဆိုင် – တောင်ကြီးလမ်းကို တခါတရံ ၄ မိုင်ကနေပိတ်ထားပြီး ဆီဆိုင်စစ်ရှောင်တွေကို ပေးမဖြတ်တာတွေရှိသလို PNLA ထိန်းချုပ်နယ်မြေ မောက်မယ်ဘက်ကိုလည်း ပေးမသွားဘူးလို့ ကိုယ်တိုင်ကြုံတွေ့လာရတဲ့ ဒေသခံတစ်ဦးက အခုလိုပြောပြပါတယ်။

“ဒုက္ခရောက်လို့ပြေးပါတယ်ဆို ဗမာစစ်တပ်က ပေးမဖြတ်ဘူး။ မောက်မယ်ဘက်ကနေ သွားတာပါ မောက်မယ်ကိုရှောင်မှာလည်းမဟုတ်ဘူး။ အဲ့တာကို ပန်တောင်ဂိတ်က လုံးဝပေးမဖြတ်တာပါ။ လှည့်ပြန်လာရတယ်။ ကိုယ့်မြို့မှာကိုယ်သေခိုင်းနေသလိုပဲ”

ဒီနေ့ နေ့လယ် ၁ နာရီခွဲခန့်က တိုက်ပွဲဖြစ်ပွားခြင်းမရှိတဲ့ စစ်ရှောင်အများစုနေထိုင်တဲ့ ရေဖြူရွာထဲကို လွိုင်လင်လေးအခြေစိုက် စစ်ကောင်စီတပ် ခလရ-၅၃၀ က လက်နက်ကြီးပစ်ခတ်တာကြောင့် အမျိုးသမီးငယ်တစ်ဦး ထိမှန်ဒဏ်ရာရခဲ့ပါတယ်။

လက်ရှိအချိန်မှာတော့ ဆီဆိုင်မြို့ကို လက်နက်ကြီးနဲ့ ဆက်တိုက်ပစ်ခတ်နေပြီး လွယ်ဆံဆစ်ရွာထဲ စစ်ကောင်စီတပ်တွေ တပ်စွဲနေပြီး လက်နက်ကြီးပစ်ဖို့ ပြင်ဆင်နေကြတယ်လို့ ဒေသခံတွေဆီက သိရပါတယ်။

တိုက်ပွဲဖြစ်ပွားနေတဲ့ ဆီဆိုင်မြို့နဲ့ အနီးတဝိုက်ရွာတွေအပြင် ဆိုက်ခေါင်၊ ဘန်းယဥ်မြို့က ဒေသခံတွေကလည်း တိုက်ပွဲကူးစက်လာမှာ စိုးရိမ်နေကြတဲ့အတွက် တချို့ဒေသခံတွေ တောင်ကြီးကို ကြိုတင်စစ်ရှောင်နေကြတယ်လို့ သိရပါတယ်။

CJ-001

#MeKongNews

#ဆီဆိုင်

#စစ်ကောင်စီ

#PNLA

#PNA

#စစ်ရှောင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)