မဲခေါင်၊ ဖေဖော်ဝါရီ ၉
ရှမ်းပြည်နဲ့ ကချင်ပြည်နယ်မှာ အများဆုံးရှိတဲ့ လီဆူးလူငယ်တွေက စစ်အာဏာရှင်စနစ်အမြစ်ပြတ်ရေးနဲ့ ဖက်ဒရယ်ဒီမိုကရေစီအရေးအတွက် လီဆူလူငယ်အစည်းအရုံး ( Lisu Youth Congress- LYC) ကို ဖွဲ့စည်းလိုက်တယ်လို့ ဒီကနေ့ ဖေဖော်ဝါရီလ ၈ ရက်နေ့မှာပဲ လီဆူလူငယ်အစည်းအရုံးရဲ့ ဖေ့ဘုတ်စ်စာမျက်နှာက ထုတ်ပြန်လိုက်ပါတယ်။
လီဆူလူငယ်အစည်းအရုံးဖွဲ့စည်းရတဲ့ ရည်ရွယ်ချက်မည်သည့်အာဏာရှင်စနစ်ကို အမြစ်ပြတ်တိုက်ရန်၊ လူမျိုးကြီးဝါဒတွေကို တိုက်ဖျက်ရန်၊ ပြည်သူလူထုတွေကို ဂုတ်သွေးစုပ်နေတဲ့ အရင်းရှင်စနစ်ကို တိုက်ဖျက်ရန်၊ လူမျိုးရေး၊ ဘာသာရေး၊ လိင်စိတ်ခံယူမှု ကွဲပြားမှုတို့အပေါ် ဖိနှိပ်ချုပ် ချယ်မှုတွေကို တိုက်ဖျက်ရန်နဲ့ လီဆူးလူမျိုးတို့ ကိုယ်ပိုင်ပြဌာန်းခွင့်ရရှိရန်၊ ရသင့်ရထိုက်တဲ့ အခွင့်အရေးတွေရရှိဖို့ကိုလီဆူလူထုကို ကိုယ်စားပြုနိုင်ဖို့လည်းရည်ရွယ်သလို သဘောထားတူညီတဲ့ နိုင်ငံရေးအဖွဲ့အစည်း တွေ တော်လှန်ရေးအင်အားစုတွေနဲ့ ချိတ်ဆက်ပြီးတော့ နိုင်ငံရေးလှုပ်ရှားမှုတွေလုပ်ဆောင်သွား မယ်လို့ ထုတ်ပြန်ချက်မှာပါရှိပါတယ်။
ယင်း လီဆူလူငယ်များဖွဲ့စည်းမှုနဲ့စပ်လျဥ်း၍ လီဆူလူကြီးတစ်ဦးက’အားပေးတယ်၊ လူကြီးတွေရဲ့ မပြီးဆုံးသေးတဲ့တာဝန်ကို လူငယ်တွေက သွေးသစ်လောင်းပြီး သမိုင်းတာဝန်ကို လက်ဆင့်ကမ်းယူတာဖြစ်လို့ ဂုဏ်ယူတယ်’ လို့ပြောကြားပါတယ်။
ကချင်လူမျိုးအနွယ်ထဲတွင်ပါဝင်သည့် လီဆူလူမျိုးကို လီဆူး ၊ လီရှော ဟု ခေါ်ကြငည်များရှိခဲ့ရာ တရုတ်နွယ်တွေနဲ့ ရောနှောခံရသဖြင့် လီဆူလူမျိုးနွယ် ခိုလုံလီရှောများကို တရုတ်နွယ်ဟု သတ်မှတ်ခံရတာတွေရှိနေသလို ယင်းရောထွေးသတ်မှတ်ခံရမှုကြောင့် ၂၀၂၀ ရွေးကောက်ပွဲအပါအဝင် ရွေးကောက်ပွဲများမှာ မဲပေးခွင့်မရခဲ့တဲ့ လီဆူ လူမျိုးအများအပြားရှိခဲ့တယ်လို့ သူကပြောပါတယ်။
‘ခိုလုံဆိုတာ ရှမ်းလို ဟိုဆိုတာ ဦးခေါင်း လုံဆိုတာ ကြီးတာကိုပြောတာ ကျမတို့ရိုးရာခေါင်းပေါင်းကြီးကို အစွဲပြုခေါ်တာ အဲတာကနေ ခိုလုံဖြစ်ပြီး တရုတ်နွယ်လို့ယူဆတာ ခိုလုံလာတဲ့ တရုတ်တွေပေါ့ဒီလို၊ အမှန်တော့ ကျမတို့က လီဆူနွယ်တွေပါ’ လို့ နမ့်ခမ်းက လီဆူ တိုင်းရင်းသူတစ်ဦးကပြောပါတယ်။
လီဆူတိုင်းရင်းသားများဟာ မြန်မာနိုင်ငံအတွင်း ကချင်ပြည်နယ်၊ ရှမ်းပြည်နယ် မြောက်ပိုင်း၊ တောင်ပိုင်းနဲ့ မိုးကုတ်တို့မှာ အနေများကြပြီး ယခုဖွဲ့စည်းတဲ့ လူငယ်အဖွဲ့မှာ ပြည်ပကလူငယ်တွေလဲ ပါဝင်တယ်လို့သိရပါတယ်။
MK-012
#MeKongNews
#လီဆူ
#တိုင်းရင်းသား
#ဖွဲ့စည်း
#စစ်အာဏာရှင်
