မဲခေါင်၊ နိုဝင်ဘာ ၃
စစ်ကိုင်းတိုင်း အထက်ပိုင်းမှာရှိတဲ့ မြို့နယ်အများအပြားက စစ်ကောင်စီတပ်စခန်းတွေကို တိုင်းရင်းသားလက်နက်ကိုင်တပ်ဖွဲ့ – ERO တွေနဲ့ ပြည်သူ့ကာကွယ်ရေးတပ်ဖွဲ့ – PDF ပူးပေါင်းတပ်တွေက ဒီနေ့ နိုဝင်ဘာလ ၃ရက်မနက်မှာ စတင်တိုက်ခိုက်နေပြီလို့ စစ်ရေးသတင်းရင်းမြစ်တွေက မဲခေါက်ကို ပြောပါတယ်။
စစ်ကိုင်းတိုင်းအထက်ပိုင်းက ကောလင်း၊ ဝန်းသို၊ ပင်လည်ဘူး၊ ချပ်သင်း၊ ကသာ၊ ဗန်းမောက်၊ ထီးချိုင့်၊ ကန့်ဘလူ၊ ဇီးကုန်း၊ ကျွန်းလှ စတဲ့မြို့တွေမှာ ထိုးစစ်ဆင်တိုက်ခိုက်နေတာဖြစ်ပြီး စစ်ကောင်စီစခန့် တချို့ကိုလည်း စတင်ချေမှုန်းနိုင်ပြီလို့ စစ်ရေးသတင်းရင်းမြစ်တစ်ဦးက မဲခေါင်ကို ပြောပါတယ်။
“စခန်းတချို့ရနေပြီဖြစ်ပါတယ်။ ကောလင်းမှာလည်း မြို့ပေါ်မှာ တိုက်နေပြီ။ ကျွန်းလှမှာ စစ်တပ်က မနက်က Mi 35 နဲ့လာပစ်သွားတယ်။ ပင်လည်ဘူးက ထွေအုပ်နဲ့ ရဲစခန်းပဲကျန်တော့တယ်လို့ သတင်းရတယ်။ ဝန်းသိုမှာလည်း စစ်တပ်က ဟောင်ဝစ်ဇာတွေ တောက်လျှောက်ပြန်ပစ်နေပါတယ်” လို့ သူက ပြောပါတယ်။
တိုင်းရင်းသားလက်နက်ကိုင်တပ်ဖွဲ့ တစ်ဖွဲ့ဖြစ်တဲ့ ရခိုင့်တပ်တော် – AA ကလည်း သူတို့တပ်တွေကို စစ်ကိုင်းတိုင်း အထက်ပိုင်းကို ပို့ဆောင်ထားပြီး တိုက်ပွဲတွေမှာ ပါဝင်တိုက်ခိုက်နေပြီး လို့ ထုတ်ပြန်ထားပါတယ်။
အဲဒီဘက်မှာရှိတဲ့ ချပ်သင်းမြို့ နယ်မြေရဲစခန်းကို မနေ့ နိုဝင်ဘာလ ၂ရက်က PDF တပ်ဖွဲ့က ဝင်ရောက်တိုက်ခိုက်ချေမှုန်းခဲ့ပါတယ်။
ဒီမနက် တိုက်ပွဲတွေကြောင့် ကောလင်းမြို့ပေါ်မှာ ပြည်သူအများအပြား ပိတ်မိနေပြီး ပိတ်မိနေတဲ့ ပြည်သူတွေကို ပြည်သူ့ကာကွယ်ရေးတပ်တွေက ကယ်ထုတ်နေတယ်လို့ ကောလင်းမြို့ခံတစ်ဦးက ပြောပါတယ်။
ရှမ်းပြည်မြောက်ပိုင်းမှာ ညီနောင်မဟာမိတ် ၃ဖွဲ့ ဦးဆောင်တဲ့ ပြည်သူ့ကာကွယ်ရေးတပ်တွေက စစ်ကောင်စီစခန်းတွေ ၁၀၂၇ စစ်ဆင်ရေးဆင်နွဲပြီး ဆက်တိုက်ခိုက်သိမ်းပိုက်နေသလို ကချင်ပြည်နယ်နဲ့ ရှမ်းမြောက်အစပ်က စစ်ကောင်စီတပ်စခန်းတွေကို လည်း KIA က တိုက်ခိုက်သိမ်းပိုက်နေပါတယ်။
ပြီးခဲ့တဲ့ သီတင်းပတ်အတွင်း စစ်ကောင်စီစခန်း ၁၀၀ ခန့်ကို တော်လှန်ရေးတပ်ဖွဲ့တွေက သိမ်းပိုက်ထားပြီး စစ်ကောင်စီတပ်သား အမြောက်အများကို ဖမ်းဆီးရမိထားသလို လက်နက်ခဲယမ်းအများအပြားလည်း သိမ်းဆည်းရမိထားပါတယ်။
MK – 004
#MeKongNews
#စစ်ကိုင်းတိုင်း
#ကောလင်း
#ပင်လည်ဘူး
#ဝန်းသို
#ကန့်ဘလူ
#ချပ်သင်း
