မဲခေါင်၊ ဧပြီ ၅
ကရင်ပြည်နယ်၊ မြဝတီမြို့မှာရှိတဲ့ ခြေလျင်တပ်ရင်း ၂၇၅ ၊ သင်္ဃန်းညီနောင် ဗျူဟာကုန်းနဲ့ ကော့ကရိတ်မြို့မှာရှိတဲ့ ခြေလျင်တပ်ရင်း ၉၇ တို့ကို KNLA နဲ့ PDF ပူးပေါင်းတပ်တို့က ဧပြီလ ၅ ရက်နေ့မှာ ဝင်ရောက်တိုက်ခိုက်နေပြီး တိုက်ပွဲတွေ ပြင်းထန်နေတယ်လို့ မြေပြင်သတင်းရင်းမြစ်ဆီက သိရပါတယ်။
ဒီလိုဝင်ရောက်တိုက်ခိုက်နေရာမှာ စစ်ကောင်စီရဲ့ ခမရ-၃၇၅ ဗျူဟာကုန်းကို ဒီနေ့မှာ KNLA နဲ့ PDF တွေက သိမ်းပိုက်လိုက်တယ်လို့ သိရပါတယ်။
အဲ့ဒီဗျူဟာကုန်းဟာ သင်္ကန်းညီနောင်အခြေစိုက် ခမရ-၃၅၅ နဲ့ ၃၅၆ တပ်ရင်းတွေပါ နောက်ဆုတ်ပြီး ခံစစ်ပြင်ထားတဲ့ ဗျူဟာစခန်းကုန်းဖြစ်ပါတယ်။
“ မနက်ကတည်းက Y 12 တွေနဲ့ ဆက်တိုက်လာကြဲနေတာ၊ ခွေး(စကစ)တချို့က ပြေးကုန်ပြီ၊ တချို့က ထိုင်းကိုပြေးတယ်၊ ၉၇ က အထိုင်တပ်ရင်းဖြစ်ပြီး တပ်ရင်းကြီးတယ်။ ရသွားရင်လည်း အတော်မိုက်သွားပြီ” လို့ ရှေ့တန်းသတင်းရင်းမြစ်တစ်ဦးက ပြောပါတယ်။
ခုလက်ရှိအချိန်အထိ တိုက်ပွဲပြင်းထန်နေကာ စစ်ကောင်စီတပ်က Y 12 လေယာဥ်တွေသုံးပြီး ဗုံးကြဲတိုက်ခိုက်နေတဲ့အပြင် လက်နက်ကြီးတွေ၊ ဒရုန်းတွေ နဲ့ ကျေးရွာတွေဖက်ကို ရမ်းသမ်းပစ်ခတ်တာတွေ ပြုလုပ်နေတယ်လို့ သိရပါတယ်။
“ တပ်ရင်း ၂၇၅ က ရွာတွေကို လက်နက်ကြီးတွေနဲ့ပစ်လို့ ရွာတွေ မီးလောင်ကုန်ပြီ။ သင်္ဃန်းညီနောင်မှာ လေယာဥ်တောက်လျောက်ကြဲနေတယ်။ အခုဆန်ဆိုင်တလျောက် မီးလောင်ကုန်ပြီ။ အိမ်တွေကော။” လို့ စစ်ဘေးရှောင်နေတဲ့ ဒေသခံ တဦးက ပြောပါတယ်။
နှစ်ဖက်ထိတွေ့တိုက်ပွဲအတွင်း စစ်ကောင်စီတပ်ရဲ့ ခလရ ၂၇၅ တပ်ကနေ ၁၅ ဦး သေဆုံးပြီး သင်္ဃန်းညီနောင် ဗျူဟာကုန်း ကနေ အရာရှိအပါအဝင် ၁၃ ဦး ၊ စုစုပေါင်း ၂၈ ဦး သေဆုံးခဲ့တယ်လို့ ကနဦးသိရပါတယ်။
ခုလက်ရှိအချိန်အထိ စစ်ကောင်စီတပ်ရဲ့ လေကြောင်းကနေ ဗုံးကြဲမှု၊ လက်နက်ကြီးနဲ့ ရမ်းသမ်းပစ်ခတ်မှုတွေကြောင့် နေအိမ်အများအပြားမီးလောင်ပျက်စီးနေရတယ်လို့ သိရပါတယ်။
Photo-KIC
CJ-004
