မဲခေါင်၊ ဧပြီ ၁၁
ကရင်ပြည်နယ်၊ မြဝတီမြို့မှာ နောက်ဆုံးကျန်တဲ့ ခလရ-၂၇၅ စစ်ကောင်စီစခန်းကို ကရင်အမျိုးသားလွတ်မြောက်ရေးတပ်မတော် (K.N.L.A) နဲ့ ပူးပေါင်းအဖွဲ့တွေက ဒီနေ့မနက်ပိုင်းမှာ အပြီးသတ်သိမ်းပိုက်လိုက်ပြီလို့ KNU က ထုတ်ပြန်ပါတယ်။
အဲ့ဒီစခန်းကို လက်နက်ချအညံခံရန် ရာဇသံပေးသော်လည်း လက်နက်မချတာကြောင့် ဧပြီ ၈ ရက်မှာ KNLA ဦးဆောင်တဲ့ ပူးပေါင်းအဖွဲ့တွေက စတင်တိုက်ခိုက်ပြီး ဒီနေ့မှာ သိမ်းပိုက်လိုက်တာဖြစ်ပါတယ်။
ခလရ-၂၇၅ စခန်းမှာ စစ်ကောင်စီတပ်ဖွဲ့ဝင် နှစ်ရာခန့်ဟာ လက်နက်တွေနဲ့အတူ ထိုင်း-မြန်မာချစ်ကြည်ရေးတံတားကနေ ထိုင်းဖက်ကို ခိုလှုံဖို့ ထိုင်းအာဏာပိုင်တွေနဲ့ ညှိနှိုင်းနေကြောင်း ဒေသတွင်း သတင်းအရ သိရပါတယ်။
လက်ရှိမှာ စစ်ကောင်စီတပ်လုံးဝကင်းစင်သွားတဲ့ မြဝတီမြို့ကို စစ်ကောင်စီက လေကြောင်းကနေ ဗုံးတွေကြဲချနေတယ်လို့ သိရပါတယ်။
KNLA သိမ်းပိုက်လိုက်တဲ့ စခန်းကနေ လက်နက်ခဲယမ်းအများအပြားသိမ်းမိပြီး နယ်မြေရှင်းလင်းရေး လုပ်ဆောင်မှာ ဖြစ်တာကြောင့် ပြည်သူတွေ မကြောက်လန့်ဖို့လည်း KNU က သတိပေးထုတ်ပြန်ထားပါတယ်။