မဲခေါင်၊ ဧပြီ ၁၈
ကရင်ပြည်နယ်၊ မြဝတီမြို့ကို နိုင်ငံတော်အဆင့် စစ်ဆင်ရေးဖော်ဆောင်ဖို့ ပို့လိုက်တဲ့ စစ်ကောင်စီရဲ့ “အောင်ဇေယျ” စစ်ကြောင်းကို KNLA၊ KNDO နဲ့ PDF တို့က ရှေ့ဆက်မတိုးနိုင်အောင် ဖြတ်တောက်ထားတယ်လို့ ကရင်အမျိုးသားအစည်းအရုံး (KNU) က ထုတ်ပြန်အသိပေးပါတယ်။
ကရင်အမျိုးသားလွတ်မြောက်ရေးတပ်မတော် (K.N.L.A)၊ ကရင်အမျိုးသားကာကွယ်ရေး တပ်ဖွဲ့ (K.N.D.O) နဲ့ ပြည်သူ့ကာကွယ်ရေးတပ်ဖွဲ့ (PDF) တို့က မြဝတီမြို့မှာ နောက်ဆုံးကျန်တဲ့ ခလရ−၂၇၅ တပ်စခန်းကို ဧပြီ ၁၁ ရက်မှာ တိုက်ခိုက်သိမ်းပိုက်လိုက်ပြီးနောက် စစ်ကောင်စီတပ်တွေ မြဝတီမြို့ကို “အောင်ဇေယျ” အမည်ဖြင့် နိုင်ငံတော်အဆင့် စစ်ဆင်ရေးဖော်ဆောင်ခဲ့တယ်လို့ KNU က ဆိုပါတယ်။
ထိုးစစ်ဆင်လာတဲ့ စစ်ကောင်စီတပ်ကို ပူးပေါင်းတပ်တွေက လမ်းတစ်လျှောက် အဆက်မပြတ်ဖြတ်တောက် တိုက်ခိုက်ခဲ့ပြီး သံချပ်ကာယာဥ်အပါအဝင် စစ်သုံးကားအချို့နဲ့ စစ်ကောင်စီတပ်ဖွဲ့တင် ရာချီသေဆုံးတယ်လို့ KNU ထုတ်ပြန်ချက်က ဆိုပါတယ်။
အကျအဆုံးနဲ့ ထိခိုက်မှုများတဲ့ စစ်ကောင်စီတပ်ဟာ ရှေ့ဆက်မတိုးနိုင်ဘဲ ဒေါနတောင်တန်း အနောက်ဘက်တောင်ခြေမှာ ရပ်တန့်နေတယ်လို့ ဆိုပါတယ်။
ထိုးစစ်ဆင်လာတဲ့ စစ်ကောင်စီတပ်တွေဟာ သူတို့ လာရာလမ်း တစ်လျှောက်မှာလည်း စစ်ရေးပစ်မှတ်မဟုတ်တဲ့ အရပ်သားများနေထိုင်ရာ နေရာတွေကို လက်နက်ကြီးနဲ့ပစ်တာ၊ လေကြောင်းတိုက်ခိုက်တာတွေကြောင့် အရပ်သားပြည်သူတွေ ထိခိုက်မှုရှိခဲ့တယ်လို့ ဆိုပါတယ်။