မဲခေါင်၊ ဧပြီ ၁၀
ရှမ်းပြည်တောင်ပိုင်း၊ မိုင်းနောင်မြို့နယ်နဲ့ ကျေးသီးမြို့နယ်ထဲက ကျေးရွာတစ်ချို့မှာ ရှမ်းပြည်တိုးတက်ရေးပါတီ (SSPP) က စစ်မှုမထမ်းရသူတွေကို တစ်အိမ်ကျပ် ၃ သောင်း လစဥ်ပေးဆောင်ရမယ်လို့ ကောက်ခံနေကြောင်း မိုင်းနောင်ကျေးရွာအုပ်ချုပ်ရေးမှူး တစ်ဦးက ပြောပါတယ်။
“ ပြီးခဲ့တဲ့မတ်လမှာ တစ်ချို့ကျေးရွာတွေမှာ စစ်မူထမ်းဖို့မလိုဘူး။ ဒါပေမဲ့ လစဉ်ကြေးတော့ ပေးရမယ်တဲ့။ တစ်ချို့မရှိတဲ့ မိသားစုတွေကတော့ မပေးနိုင်ဘူး။ မတ်လထဲမှာတော့ ပိုက်ဆံ ၂ ကြိမ်ပေးရတယ်။ တစ်ခါကို တစ်ရွာသိန်း ၃၀ လောက်ကျတယ်။ ကျွန်တော်တို့ရွာအိမ်ခြေက ၃၀ ကျော်ပဲရှိတယ်။ တစ်ခါကောက်ရင် ၁၀ သိန်းတောင်မရဘူ” လို့ မဲခေါင်ကိုပြောပါတယ်။
SSPP က တစ်လတစ်အိမ် ၃ သောင်းပေးဆောင်ခိုင်းပေမယ့် အောက်ခြေတပ်သားအများစုကတော့ မကြာခဏပိုက်ဆံလာကောက်ပြီး ဆန်တွေကိုလည်း ပေးရတယ်လို့ သူက ပြောပါတယ်။
စစ်မှုထမ်းဖို့မသွားရတဲ့ ကျေးရွာတော်တော်များဟာ မှုးယစ်သုံးစွဲတဲ့သူတွေ များတာကြောင့် စစ်မှုထမ်းဖို့မခေါ်ပဲ ပိုက်ဆံကောက်ခံပြီး တစ်ချို့ကျေးရွာတွေမှာ စစ်သားစုဆောင်းတယ်လို့ ကျေးသီးဒေသခံတစ်ဦးက ပြောပါတယ်။
“ ပြီးခဲ့တဲ့လက တစ်ရွာကို ၁၀ ယောက်ခေါ်တယ်။ ဘိန်းသမားတွေများလို့ သွားတဲ့သူတွေမရှိတော့ ရွာသူကြီးတွေနဲ့ သွားတောင်းပန်တယ်။ သူတို့လည်း ဘိန်းသမားတွေမရချင်တော့ ပိုက်ဆံတောင်းတာ လတိုင်းပေးရမယ်ဆိုရင်တော့ မရှိတဲ့သူတွေ အခက်တွေ့တယ်” လို့ပြောပါတယ်။
ကျေးသီးနဲ့ မိုင်းနောင်မြို့နယ်မှာ စစ်ကောင်စီတပ်၊ ရှမ်းပြည်တိုးတက်ရေးပါတီ SSPP နဲ့ ရှမ်းပြည်ပြန်လည်ထူထောင်ရေးကောင်စီ RCSS တို့ လှုပ်ရှားပြီး အဲ့ဒေသတွေမှာ အရင်နှစ်ကတည်းက RCSS တပ်ဖွဲ့က ဖမ်းဆီမှုတွေ၊ အခွန်ကောက်မှုတွေ ရှိပါတယ်။
ဒီဖြစ်စဉ်နဲ့ပတ်သက်ပြီး SSPP ပြောရေဆိုခွင့်ရှိသူ ဒုဗိုလ်မှူးကြီး စိုင်းဆုကို မဲခေါင်သတင်းဌာနက ဖုန်းဆက်သွယ်ပေးမယ့် ဖုန်းဆက်သွယ်လို့မရခဲ့ပါဘူး။
MK 011
