မဲခေါင်၊ ဖေဖော်ဝါရီ ၂၇
ရခိုင်ပြည်နယ်၊ ပုဏ္ဏားကျွန်းမြို့မ ရဲစခန်းမှ ရဲတပ်ဖွဲ့ဝင် ၂၃ ယောက်ဟာ ရက္ခိုင့်တပ်တော် (AA) ထံ လက်နက်ချအလင်းဝင်လာတယ်လို့ AA က ဒီနေ့ ဖေဖော်ဝါရီ ၂၇ ရက်နေ့မှာ ထုတ်ပြန်ပါတယ်။
ရဲအုပ်ကျော်စိုးအောင် ဦးဆောင်ပြီး အလင်းဝင်လာတဲ့ ရဲ ၂၃ ယောက်ကို စစ်ကောင်စီက စစ်ကူမပေးနိုင်ခြင်း၊ ရိက္ခာမလုံလောက်တာတွေကြောင့် အလင်းဝင်ရောက်တာလို့ ရုပ်သံနဲ့တကွ ထုတ်ပြန်တဲ့ AA ရဲ့ ထုတ်ပြန်ချက်မှာ ရဲအုပ်ကျော်စိုးအောင်က ပြောပါတယ်။
“နောက်တစ်ခုက ကျနော်တို့ဆီမှာလည်း စားဝတ်နေရေး အနေအထားနဲ့ ရိက္ခာကမရှိပါဘူး။ ကျနော်တို့ဆီမှာ ရေရှည်အတွက် ရိက္ခာတောင့်ခံနိုင်ခြင်းမရှိတဲ့အတွက် ကျနော်တို့ လာရောက်ပူးပေါင်းရခြင်းဖြစ်ပါတယ်။ လာရောက်အလင်းဝင်ရခြင်းဖြစ်ပါတယ်” လို့ သူက ပြောပြပါတယ်။
စစ်ကောင်စီဟာ ရခိုင်ပြည်နယ်ကို ၂ နှစ်တာဝန်ထမ်းဆောင်ပြီး ပြောင်းရွေ့မယ်လို့ ကတိပေးထားပေမယ့် တာဝန်ထမ်းချိန် ၃ နှစ်ပြည့်သွားပေမယ့် ပြောင်းရွေ့မပေးတာတွေကြောင့်လည်း အခုလို အလင်းဝင်ရတာလို့ ဆိုပါတယ်။
ရခိုင်ပြည်နယ်အတွင်း တိုက်ပွဲတွေမှာ စစ်ကောင်စီတပ်အမျာအပြား လက်နက်ချအညံခံတာ၊ အိမ်နီးချင်း ဘင်္ဂလားဒေ့ရှ်နဲ့ အိန္ဒိယနိုင်ငံတွေကို ထွက်ပြေးသွားတာတွေလည်း ရှိပါတယ်။
ချင်းပြည်နယ် ပလက်ဝမြို့အပါအဝင် ရခိုင်ပြည်နယ်အတွင်း AA သိမ်းပိုက်ထားတဲ့ မြို့ ၇ မြို့ထိရှိပြီး တိုက်ပွဲတွေလည်း ဆက်လက်ဖြစ်ပွားနေပါတယ်။
