မဲခေါင်၊ မတ် ၁၁
ရှမ်းပြည်တောင်ပိုင်း၊ ပင်လောင်းမြို့နယ်တွင် စစ်ကောင်စီနဲ့လက်အောက်ခံ PNO ပြည်သူ့စစ်တွေနဲ့ ရှမ်းတောင် PDF တပ်ဖွဲ့တွေ တိုက်ပွဲ ပြင်းထန်နေတယ်လို့ သတင်းအရင်းအမြစ်တွေထံက သိရပါတယ်။
စစ်ကောင်စီတပ်နဲ့ PNO တပ်ရင်း ၇ တို့ ဟာ ဗန့်မောင်ရွာ စာသင်ကျောင်းကို လာရောက် တပ်စွဲပြီးနောက် ကျေးရွာလူထုကို တိုက်ပွဲမဖြစ်လိုရင် ကျပ်ငွေ သိန်း ၁၀၀ ပေးရမယ်လို့ တောင်းခံခဲ့တယ်လို့ သိရပါတယ်။
မနက် ၁၀ နာရီအချိန်မှာ PDF တပ်ရင်းတွေ အဲဒီ စာသင်ကျောင်းကို ဝင်ရောက်တိုက်ခိုက်တယ်လို့ သိရပြီး PNO အကျအဆုံးများတယ်လို့သိရပေမယ့် PDF တပ်ဖွဲ့တွေဆီက ထုတ်ပြန်ချက်မရှိသေးလို့ အတည်မပြုနိုင်သေးပါဘူး။
PDF တပ်တွေရဲ့ တိုက်ခိုက်မှုကြောင့် စစ်ကောင်စီနဲ့အပေါင်းပါတွေဟာ နောင်ဝိုးဘက်ကို ဆုတ်ခွာသွားပြီး လက်နက်ကြီးနဲ့ပစ်ခတ်လို့ လွယ်ကျိန်းကျေးရွာဘက်ကျရောက် ပေါက်ကွဲတာမှာ ကျေးရွာလူထုကတော့ ရရာပစ္စည်းတွေနဲ့ ထွက်ပြေးနေကြပါတယ်။
ယင်းတိုက်ပွဲကို PDF တပ်ဖွဲ့တွေဖြစ်တဲ့ အင်းလေးပြည်သူ့ကာကွယ်ရေး ၁၀၀၉ တပ်ရင်း၊ ဖယ်ခုံပြည်သူ့ကာကွယ်ရေး အမှတ် ၁၀၀၂ တပ်ရင်း၊ ဖယ်ခုံပြည်သူ့ကာကွယ်ရေး အမှတ် ၁၀၀၆ တပ်ရင်းတို့ပူးပေါင်းတိုက်ခိုက်ခဲ့တာလို့ သိရပါတယ်။
ပင်လောင်းမြို့နယ်မှာ မြို့ပေါ် ၁၀ ရပ်ကွက်နဲ့ ကျေးရွာ ၄၄၆ ရွာရှိပြီး လူဦးရေ ၁ သိန်းကျော်ရှိရာ အဲဒီထဲက အခု တိုက်ပွဲတွေဖြစ်တဲ့နေရာက ရွာ ၅ ရွာမှာ လူဦးရေ ၁ သောင်းနီးပါးခန့် ပင်လောင်းမြို့ပေါ်၊ နောင်တယားနဲ့ညောင်ရွှေဘက်ကို စစ်ဘေးရှောင်ကြရတယ်လို့ သိရပါတယ်။
MK-012