မဲခေါင်၊ ဇန်နဝါရီ ၂၉
စစ်အာဏာရှင်ချုပ်ငြိမ်းပြီး ဖက်ဒရယ်ဒီမိုကရေစီစနစ်ပေါ်ပေါက်လာရေးအတွက် ဘဝတူညီနောင်မဟာမိတ်တွေနဲ့ လက်တွဲဆင်နွဲသွားမယ်ဆိုတဲ့ PNLO ရဲ့ ထုတ်ပြန်ချက်ကိုထောက်ခံပြီး ပူးပေါင်းဆောင်ရွက်သွားမယ်လို့ ပအိုဝ်းအမျိုးသား ဖက်ဒရယ်ကောင်စီ – PNFC က ဇန်နဝါရီလ ၂၇ရက်မှာ ထုတ်ပြန်ပါတယ်။
PNFC အနေနဲ့ လူမျိုးပေါင်းစုံပြည်သူတွေကို ကာကွယ်ဖို့လိုအပ်ချက်မှတပါး ပအိုဝ်းအမျိုးသားအချင်းချင်းကြားမှာဖြစ်စေ၊ တိုင်းရင်းသားအချင်းချင်းကြားမှာဖြစ်စေ၊ လက်နက်ကိုင် ပဋိပက္ခကို အတတ်နိုင်ဆုံး ရှောင်ရှားပြီး ငြိမ်းချမ်းတဲ့နည်းနဲ့ ညှိနှိုင်းအဖြေရှာရေးနည်းကို အတတ်နိုင်ဆုံး လက်ကိုင်ကျင့်သုံးနေကြောင်း၊ အရင်ပအိုဝ်းခေါင်းဆောင်တွေအကြား ၁၁ နှစ်ကြာ သွေးချောင်းစီးခဲ့ရပြီးနောက်မှ အခုလိုမူကို ချမှတ်လုပ်ဆောင်နေတာဖြစ်ကြောင်း၊ လက်ရှိတွင်လည်း စစ်အုပ်စုက ပအိုဝ်းလူမျိုး အချင်းချင်းကြား သပ်လျိုသွေးခွဲ ဖြိုခွဲလျက်ရှိနေတာကြောင့် ပအိုဝ်းသံဃာတော်တွေနဲ့ ပြည်သူအပေါင်းက ဝိုင်း၀န်းတားဆီး ကာကွယ်ပေးကြဖို့တိုက်တွန်းလိုကြောင်း PNFC ရဲ့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် ပအိုဝ်းဒေသအတွင်းက စစ်သား၊ ရဲနဲ့ ပြည်သူ့စစ်တွေအနေနဲ့ ဘက်ပြောင်းခိုလှုံလာဖို့လဲ ဖိတ်ခေါ်ပါကြောင်းနဲ့ PNLO/PNLA ရဲ့ထုတ်ပြန်ကြေငြာချက် (၁/၂၀၂၄)ပါ ဖော်ပြချက်တွေကို အလေးအနက်ထောက်ခံကာ PNLO/PNLA နဲ့ ပူးပေါင်းဆောင်ရွက်သွားမယ်လို့ ထုတ်ပြန်ချက်မှာ ဖော်ပြထားပါတယ်။
ဒီလိုပူပေါင်းဆောင်ရွက်သွားမှာနဲ့ ပတ်သက်လို့ PNFC ပြောခွင့်ရပုဂ္ဂိုလ် ခွန်ဝေထူးက “ အဓိကရည်ရွယ်ချက်ကတော့ ကျနော်တို့ ဒီတော်လှန်ရေးရဲ့ အဓိက အချက်သည် စစ်အာဏာရှင်စနစ်ချုပ်ငြိမ်းရေးဖြစ်တယ်။ စစ်အာဏာရှင်စနစ်ကို ကျနော်တို့ အပြီးတိုင် ဖယ်ရှားနိုင်ဖို့အတွက် ဖြစ်ပြီးတော့မှ အဖိနှိပ်ခံပြည်သူလူထု တောင့်တတဲ့ ဒီမိုကရေစီအခွင့်အရေးကို အခြေခံပြီးတော့ ဖက်ဒရယ်စနစ်နဲ့ထူထောင်တဲ့ ဖက်ဒရယ်အုပ်ချုပ်ရေးစနစ်နဲ့ထူထောင် မယ့်ဖက်ဒရယ်ပြည်ထောင်စုကို တည်ထောင်ကြရမှာဖြစ်တယ” လို့ ဆိုပါတယ်?
ဒါ့အပြင် စနစ်တစ်ခုနဲ့တစ်ခု အကူးအပြောင်းမှာ အုပ်ချုပ်ရေးလစ်ဟာမှုဆိုတာမျိုး မဖြစ်ရအောင်၊ ပအိုဝ်းဒေသတွင်း စစ်အာဏာရှင်စနစ်ကို တိုက်ရင်းနဲ့ ရရှိလာတဲ့ နယ်မြေလွတ်မြောက်နယ်မြေတွေမှာ အုပ်ချုပ်ရေး၊ တည်ငြိမ်းအေးချမ်းရေး ပြည်သူတွေလိုအပ်တဲ့ လုံခြုံရေး၊ လူသားချင်းစာနာထောက်ထားမှုအကူအညီပေးရေး စတဲ့ကဏ္ဍတွေမှာ PNFC နဲ့ PNLO တို့ ပူးပေါင်းဆောင်ရွက်သွားမယ်လို့ သူက ပြောပါတယ်။
“ကျနော်တို့လက်ခံထားတဲ့ မူကတော့ ပြည်နယ်ပေါင်းစု ပြည်ထောင်စုကို ကျနော်တို့ တည်ဆောက်တဲ့နေရာမှာ ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဌာန်းခွင့်ရှိတဲ့ ပအိုဝ်းပြည်နယ်ပေါ်ပေါက်ရေးကို မျှော်မှန်းထားတာဖြစ်လို့ ပအိုဝ်းအမျိုးသားသွေးစည်းညီညွတ်ရေးကို အခြေခံပြီးတော့ PNLO နဲ့ PNFC ကြားမှာ အခုကတည်းက ပူးပေါင်းဆောင်ရွက်သွားမယ်ဆိုတာ ထုတ်ပြန်ကြေငြာတာဖြစ်ပါတယ်” ခွန်ဝေထူးက ဆက်ပြောပါတယ်။
PNFC အနေနဲ့ စစ်ရေးဆိုင်ရာစုဖွဲ့မှုကို တပ်နယ် ၃ ခုဖြင့်တည်ဆောက်ထားပြီး တပ်နယ်(၁) ကို သထုံခရိုင်၊ တပ်နယ်(၂)ကို ဖားအံခရိုင်၊ တပ်နယ်(၃)ကို ရှမ်း – ကရင်နီနယ်စပ် အထိုင်ချလှုပ်ရှားလျက်ရှိပါတယ်။
MK – 012
#MeKongNews
#PNLO
#PNFC
#ပအိုဝ်းပြည်နယ်