ပုဂ္ဂလိက ဆေးရုံတွေဖြစ်တဲ့ မြို့တော်ဆေးရုံ၊ နန်းတော်ဆေးရုံ၊ ထက်နေလင်းဆေးရုံ၊ ကံ့ကော်ဆေးရုံ၊ စိန်ပန်းဆေးရုံ အစရှိတဲ့ ဆေးရုံ တွေကို ၂၀၂၂ ခုနှစ်၊ ဒီဇင်ဘာလ ၃၁ ရက်နေ့ နောက်ဆုံးထားပြီး၂၀၂၃ ခုနှစ် ဇန်နဝါရီလ ၁ ရက်နေ့မှစတင်ကာ အနည်းဆုံး ၄ လ ပိတ်ဖို့ စစ်တပ်က အမိန့်ပေးခဲ့တာလို့ သိရပါတယ်။
အဲဒီ ဆေးရုံတွေဟာ CDM လှုပ်ရှားမှုမှာ ပါဝင်ခဲ့တဲ့ ဆရာဝန်ကြီးတွေ၊ ကျန်းမာရေး ဝန်ထမ်းတွေကို လက်ခံလို့ ဆိုပြီး အခုလို ပိတ်ခိုင်းတာ ဖြစ်တယ်လို့ ဆရာဝန်တစ်ဦးက ပြောပါတယ်။
ဒါကြောင့် အရေးပေါ်လူနာ အသစ်တွေကို ဝမ်းနည်းစွာနဲ့ လက်မခံနိုင်တော့တဲ့အကြောင်း အဲဒီ ဆေးရုံတွေက ငြင်းဆိုနေတယ်လို့ ကနဦး သိရှိရပါတယ်။
အဲဒါတော့ သေချာတယ် ပြောတယ်။ အဓိကက CDM တွေကို နှိပ်ကွပ်ချင်တာပါ။ မနေ့က အတွင်းလူနာတွေကို မပိတ်ခံရတဲ့ ပုဂ္ဂလိက ဆေးရုံတွေကို ရွှေ့နေတယ်။ ပြင်ပလူနာတွေလည်း မနေ့က စပြီး လက်မခံတော့ဘူး။ ဝန်ထမ်းတွေလည်း အလုပ်လက်မဲ့ဖြစ်ကုန်လို့ ငိုနေကြတယ်ကြားတယ်
လို့ ဆရာဝန်တစ်ဦးက ပြောပါတယ်။
ထက်နေလင်းဆေးရုံကတော့ လိုင်စင် မရှိသေးတာကြောင့် ပိတ်သိမ်းတာဖြစ်ပြီး ကျန်တဲ့ ဆေးရုံတွေကတော့ CDM ဆရာဝန်တွေ ကို လက်ခံ ဆေးကုသခွင့် ပေးခဲ့တာကြောင့် ပိတ်ခိုင်းတာလို့ သိရပါတယ်။
ဒီဇင်ဘာလ ၂၄ ရက်က မြို့တော်ဆေးရုံမှ ဆရာဝန် တစ်ဦးကို စစ်တပ်က သေနတ်ထောက် ဖမ်းဆီးခဲ့ပြီး ဒီဇင်ဘာ ၂၅ ရက်နေ့မှာ နန်းတော်ဆေးရုံမှ တာဝန်ကျ ဆရာဝန် ၂ ဦးကို စစ်တပ်က လူနာယောင်ဆောင်ကာ အဓမ္မ ဖမ်းဆီးခဲ့ပြီးနောက် အခုလို ဆေးရုံတွေ ပိတ်သိမ်းခဲ့တာလို့ သိရပါတယ်။
ပြီးခဲ့တဲ့ ၂ လအတွင်း မန္တလေးမှာ အခြားဆရာဝန်တွေ၊ အထူးကုဆရာဝန်တွေ၊ သူနာပြုတွေ၊ ဆေးဝါးကျွမ်းကျင် ပညာရှင်တွေ စုစုပေါင်း ၁၀ ဦးထက်မနည်းကို စစ်ကောင်စီက ဆက်တိုက် ဖမ်းဆီးခဲ့ပါတယ်။
စစ်တပ်အာဏာသိမ်းပြီးတဲ့နောက် အကြမ်းမဖက် အာဏာဖီဆန်ရေး လှုပ်ရှားမှု-CDM မှာ အစောဆုံး ပါဝင်ခဲ့တဲ့ ဆရာဝန် ၅၅၇ ဦးကို စစ်ကောင်စီရဲ့ ကျန်းမာရေးဝန်ကြီးဌာန ဝန်ထမ်းအဖြစ်ကနေ ထုတ်ပယ်ထားပါတယ်။
ဒ့ါအပြင် စစ်ကောင်စီ လက်အောက်ခံ မြန်မာနိုင်ငံ ဆေးကောင်စီကလည်း ဆေးကုသခွင့်လိုင်စင်-ဆမ လက်မှတ်ကို တစ်နှစ်တိတိ ရုပ်သိမ်းလိုက်တယ်လို့ ကြေညာထားပါတယ်။
