ပြီးခဲ့တဲ့ ၂ လ ကျော်က ပြည်တွင်း ကြက်သွန်နီ လက်လီဈေး တစ်ပိဿာ ၆,၀၀၀ ကျပ်အထိ စံချိန်တင် မြင့်တက်ခဲ့တာကြောင့် တရုတ်ကြက်သွန်နီတွေ တရားမဝင် ဝင်ရောက်လာရာက လက်ရှိ ပြည်တွင်းမှာ စိုက်ပျိုးထားတဲ့ သီးနှံပေါ်ချိန်မှာ လက်လီဈေး တစ်ပိဿာ ကျပ် ၃,၅၀၀ အထိ ဈေးကျဆင်းခဲ့တာ ဖြစ်ပါတယ်။
တရုတ်က ဝင်နေတုန်းက ဈေးက တအားကောင်းနေတာ။ အခု ပြည်တွင်းက စိုက်ထားတာတွေ တစ်ချို့တစ်ဝက် ပေါ်ချိန် ရောက်နေပြီ။ တစ်ချို့လည်း နောက်လလောက်ဆို ထွက်တော့မှာ။ အဲ့အချိန်ကျမှ ဈေးက ကျလာတာ။ စိုက်စရိတ်က တအားကြီး မြင့်ပြီး စိုက်ထားရတာ။ တောင်သူက မျော်မှန်းဈေးအတိုင်း မရရင်တော့ အရှုံးပေါ်ပြီ။ အန္တရာယ်ကြားကနေ စိုက်ပျိုးထားရတာ။ အခုက ထိန်းချုပ်မှု ဘာမှမရှိတော့ တောင်သူ သီးနှံပေါ်ချိန်မရောက်ခင် ကြိုစီမံပေးတာ မရှိတော့ အခုလိုမျိုးအဖြစ်တွေက ကြက်သွန်စိုက်တဲ့ တောင်သူမှ မဟုတ်ပါဘူး အခြား သီးနှံစိုက်တဲ့ သူတွေလည်း တော်တော်စိတ်ပျက်နေကြပြီ
လို့ အောင်လံမြို့နယ်က ကြက်သွန်နီစိုက်တောင်သူတစ်ဦးက ပြောပါတယ်။
လက်ရှိ အလယ်လတ်တန်းစား မြေဆီ တစ်အိပ်ကို ကျပ် ၁ သိန်းခွဲ နီးပါး ဝယ်ယူ အသုံးပြုနေရပြီး တစ်ဧက စိုက်ပျိုးခ အဖြစ် ကျပ် ၂ သိန်းခွဲ ပေးကာ ငှားရမ်းနေရပေမဲ့ အလုပ်သမား ရှားပါးလို့ တောင်သူတွေ အခက်ခဲ ရှိနေတယ်လို သိရပါတယ်။
အခုလို စိုက်ပျိုးစရိတ်တွေ ကြီးမြင့်ခဲ့တာကြောင့် တောင်သူတွေ အနေနဲ့ ကြက်သွန်နီ တစ်ပိဿာ အနည်းဆုံး ကျပ် ၁,၅၀၀ ဈေးရရှိမှသာ အဆင်ပြေမှာ ဖြစ်ပြီး ဒီဈေးအောက် ကျဆင်းပါက အရှုံးပေါ်တယ်လို့ တောင်သူတွေက ပြောပါတယ်။
အရင်က ကြက်သွန်နီ တစ်ဧက စိုက်ပျိုးစရိတ် ကျပ် ၁၂ သိန်း ဝန်းကျင်သာ ကုန်ကျပေမယ့် လက်ရှိ တစ်ဧကကို ကျပ်သိန်း ၃၀ နီးပါး ကုန်ကျပြီး အခုနှစ် ရာသီဥတု ဖောက်ပြန်မှုကြောင့် ပိုးကျလို့ ပိုးသတ်ဆေး စရိတ် ထပ်ကုန်တယ်လို့ ဆိုပါတယ်။
ဈေးကွက်ထဲမှာ ဈေးကကောင်းပေမယ့် တောင်သူရတဲ့ဈေးက နည်းရတဲ့အကြောင်းက အရင်လို နယ်ဆင်းပြီး မဝယ်ရဲတော့ဘူး။ မကွေးတို့ မန္တလေးတို့မှာက နယ်မြေ မအေးချမ်းတော့ အသက်ရင်းပြီး မသွားတော့ဘူး။ ကြားက ပွဲစားအဆင့်ဆင့်နဲ့လုပ်ရတော့ ဈေးက စားသုံးသူလက်ထဲ ရောက်လာတဲ့အချိန်မှာ ဈေးက ပိုကြီးသွားတာ။ လမ်းပန်းဆက်သွယ်ရေးတွေက မကောင်းတော့ ကုန်သည်ကြီးတွေက နယ်မဆင်းရဲကြတော့တာလည်း ပါတယ်
လို့ ရန်ကုန်မြို့ ဘုရင့်နောင်ပွဲရုံက ကြက်သွန်ကုန်သည်တစ်ဦးက သုံးသပ်ပါတယ်။
လက်ရှိ ကြက်သွန်နီ အဓိက ထွက်တဲ့ မကွေးတိုင်းနဲ့ မန္တလေးတိုင်းတို့မှာ နယ်မြေ မတည်ငြိမ်မှုကြောင့် အထွက်နှုန်း ကျဆင်းနေပေမယ့် ပြည်ပကို တင်ပို့နေတဲ့ အတွက် ပြည်တွင်းထွက် ကြက်သွန်နီ ဈေးနှုန်း မတည်မငြိမ် ဖြစ်နေတယ်လို့ သိရပါတယ်။
