မဲခေါင်၊ ဇွန် ၂၉
ဂေါက်ရိုက်သူက မဝင်ရသတ်မှတ်ထားသည့်နေရာသို့ ကယ်ရီကားကို မောင်းနှင်သွားသည့် ကိစ္စနှင့် ပတ်သက်ပြီး Amazing လုပ်ငန်းစုပိုင်ရှင် ခရိုနီ အောင်မျိုးမင်းဒင်က တာချီလိတ်ဂေါက်ကွင်းက ဝန်ထမ်းများကို ဥပဒေမဲ့ပြစ်ဒဏ်ပေးခဲ့ကြောင်း ဒေသခံများထံမှ သိရသည်။
မဝင်ရသတ်မှတ်နေရာသို့ ကယ်ရီကားဝန်သွားသည့်အတွက် ဇွန်လ ၂၃ရက်မှ စကာ ဝန်ထမ်းအယောက် ၅၀ကို လုပ်အားခမပေးဘဲ ဂေါက်ကွင်းသန့်ရှင်းရေး ရက် ၁၄ လုပ်ဆောင်ရန် ပြစ်ဒဏ်ချမှတ်ခဲ့ခြင်းဖြစ်ကြောင်း ဂေါက်ကွင်းဝန်ထမ်းများနှင့် နီးစပ်သူတစ်ဦးက ပြောသည်။
“ပြီးခဲ့တဲ့နေ့က ဂေါက်ဖါက ဂေါက်ကယ်ရီကားကို ကိုယ့်ဟာကိုမောင်းပြီး မဝင်ရလို့သတ်မှတ်ထားတဲ့ နေရာတွေကို ဝင်မိတာ အဲ့ဒါကို ဂေါက်ဖါတွေကို မပြောဘဲ အဲ့ဒီနေ့က ကယ်ရီလိုက်တဲ့သူ အယောက် ၅၀ ကို ၁၄ရက် ဂေါက်ကွင်းသန့်ရှင်းရေးလုပ်ခိုင်းတယ်။ အရင် ရီဂျီးနားထိုင်းတွေတုန်းက အဲ့လို အပစ်ပေးတာမရှိဘူး၊ သူ့လက်ထက်မှ ကယ်ရီတွေကို ခေါင်းပုံဖြတ်ပြီး ကယ်ရီခတွေအပြည့်မပေးတာတွေလဲရှိတယ်” ဟု ၎င်းကပြောသည်။
လုပ်အားခမရသည့် ကယ်ရီများသည် စားဝတ်နေရေးအတွက် ခက်ခဲပြီး အိမ်ခန်းခပေးရန်ပင် အခက်အခဲ ဖြစ်နေကြောင်း၊ ဦးအောင်မျိုးမင်းဒင် တာချီလိတ်ဂေါက်ကွင်းကို ထိုင်းလုပ်ငန်းစု ရဂျီးနားထံမှ လက်လွှဲရယူပြီးနောက်ပိုင်း လုပ်ခလစာ ခေါင်းပုံဖြတ်မှုများ၊ မတရားခိုင်းစေမှုများ ကြုံလာရကြောင်း ဂေါက်ကွင်းအလုပ်သမားများထံမှ သိရသည်။
“ဂေါက်ကွင်းကို သူတို့ရကတည်းက ကယ်ရီတွေကိုလဲ မလုပ်ချင်ရင်ထွက်ဆိုပြီး စည်းကမ်းအမျိုးမျိုးထုတ်ပြီး အနိုင်ကျင့်တာ၊ ပြီးခဲ့တဲ့ ၂ လလောက်ကလဲ သူ့တပည့်တစ်ယောက်နဲ့ ဂေါက်ကွင်းဝန်ထမ်းတစ်ယောက် စကားများရန်ဖြစ်တာကို စခန်းမှာ အမှုတွေဖွင့်ပြီး အချုပ်ထဲ ၂ လလောက်ထည့်ထားတယ်။ ပြီးတော့ အလုပ်ထုတ်ပစ်တယ်” ဟု ဂေါက်ကွင်းကယ်ရီများနှင့် နီးစပ်သူတစ်ဦးက ပြောသည်။
တာချီလိတ် ဂေါက်ကွင်းကို ၂၀၀၀ ခုနှစ်ပါတ်ဝန်းကျင်ကတည်းက ထိုင်းလုပ်ငန်းရှင်များက ရီဂျီးနားဂေါက်ကလပ်အမည်ဖြင့် ဖွင့်လှစ်လုပ်ကိုင်ခဲ့ခြင်း ဖြစ်ပြီး အာဏာသိမ်းပြီးနောက်ပိုင်း စစ်ခေါင်းဆောင်မင်းအောင်လှိုင်အရှိန်အဝါဖြင့် Amazing လုပ်ငန်းစုပိုင်ရှင် ခရိုနီအောင်မျိုးမင်းဒင်က လက်လွှဲပြောင်းရယူခဲ့ခြင်းဖြစ်သည်။
အောင်မျိုးမင်းဒင်သည် Adventure Myanmar Group နှင့် Amazing Group of Companies တို့၏ တည်ထောင်သူဖြစ်ပြီး၊ အကြီးစားအကျင့်ပျက်ခရိုနီကြီးတစ်ဦး ဖြစ်ကြောင်း Justice for Myanmar က ဖော်ပြထားသည်။
အောင်မျိုးမင်းဒင်သည် စစ်ရာဇဝတ်ကောင်နှင့် စစ်အုပ်စုခေါင်းဆောင် မင်းအောင်လှိုင်၏ မိသားစုနှင့်နီးကပ်သည့် ပတ်သက်ဆက်နွှယ်မှုများ ရှိပြီး မင်းအောင်လှိုင်၏ ဇနီးဖြစ်သူ ကြူကြူလှ၏ ကျောင်းသားဟောင်းတစ်ဦးဖြစ်ခဲ့ကြောင်း သိရသည်။
ပုံအညွန်း – အာဆီယံ အသက် ၃၀ အထက် မသမာသူစာရင်းဝင် အောင်မျိုးမင်းဒင်အား JFM က ဖော်ပြထားပုံ
#MeKongNews
#တာချီလိတ်
#တာချီလိတ်ဂေါက်ကွင်း
#အောင်မျိုးမင်းဒင်
#Amazing
