မဲခေါင်၊ ဇူလိုင် ၃
ပြီးခဲ့သည့် ခရစ္စမတ်ရက်က ခရီးသည် ၃၈ ဦးသေဆုံးခဲ့သည့် အဇာဘိုင်ဂျန်ခရီးသည်တင်လေယာဉ် Embraer 190 ပျက်ကျမှုတွင် ရုရှားဘက်မှ ပစ်ချခဲ့သည်ဆိုသည့် စွပ်စွဲချက်မှာ ပိုမိုခိုင်လုံလာပြီး နောက်ဆုံးတွင် ပစ်ချမိန့်ပေးသည့် အသံဖိုင်ကိုပင် အဇာဘိုင်ဂျန်မီဒီယာများက ရရှိဖော်ပြနေပြီဖြစ်သည်။
ယင်းလေယာဉ်သည် ခရီးသည် ၆၇ ဦးကို တင်ဆောင်ကာ အဇာဘိုင်ဂျန်နိုင်ငံ၊ ဘာကူမြို့မှ ရုရှားနိုင်ငံ၊ ဂရိုဇနီမြို့သို့ ပျံသန်းရာတွင် ကက်စ်ပီယံပင်လယ်ကို ဖြတ်ကျော်ပြီးနောက် ကာဇက်စတန်နိုင်ငံ အက္ကတူ လေဆိပ်အနီး ပျက်ကျသွားခဲ့ရာ ရုရှားလေကြောင်းရန် ကာကွယ်ရေးစနစ်ကြောင့် ပျက်ကျသည်ဟု ဦးစွာ ယူဆခဲ့ကြသည်။
အဇာဘိုင်ဂျန်အစိုးရမှ ထိုလေယာဉ်ပျက်ကျမှုအတွက် စုံစမ်းစစ်ဆေးခဲ့ရာတွင် ရုရှားစစ်တပ်မှ ယူကရိန်း ဒရုန်းမဟုတ်မှန်း သိသိကြီးနှင့် မြေပြင်မှဝေဟင်ပစ် လေကြောင်းကာကွယ်ရေး ဒုံးကျည် Pantsir-S ဖြင့် ပစ်ချခဲ့ခြင်းဖြစ်ကြောင်း၊ လူတစ်ဦးက “ဟလို အဇီမတ် ၃၃၈၊ အကွာအဝေး ၇၀၀၀၊ အမြင့် ၄၉၀၊ အရှိန် ၁၁၈၊ ဦးတည်ရာ ၂၃၀ သို့ ဝင်လာနေတဲ့ ပစ်မိန့်” ဟု အမိန့်ပေးသံအား “ပစ်ပြီ” ဟု တစ်ဦးက ဖြန်ဖြေသံ၊ ထို့နောက် ပစ်မှတ်လွဲသည်ဟုဆိုကာ အခြားတစ်ဦးက “နောက်တစ်လုံး ထပ်ပစ်” ဟု အမိန့်ပေးခဲ့ကြောင်း၊ ထိုအသံများထဲတွင် ပူးပေါင်းပါဝင်သူ တစ်ဦးမှာ ရုရှားလေကြောင်းရန် ကာကွယ်ရေးတပ်မှ ဗိုလ်ကြီး ဒီမီထရီပလာဒီချော့ ဆိုသူဖြစ်ကာ ပလာဒီချော့ကိုယ်တိုင် ပစ်မှတ်ထိသွားခဲ့သည်ကို အစီရင်ခံတင်ပြထားသည့် လက်ရေးမူစာရွက်ကိုပါ အဇာဘိုင်ဂျန်မီဒီယာ Minval က ရရှိ ဖော်ထုတ်တင်ပြသွားခြင်း ဖြစ်သည်။
ထိုနေ့မနက်ပိုင်းက ယူကရိန်းဘက်မှ ရုရှားထံသို့ ဒရုန်းများဖြင့် ပစ်ခတ်တိုက်ခိုက်မှု ရှိနေခဲ့ပြီး အဇာဘိုင်ဂျန်လေယာဉ်မှာမူ ဒရုန်းများသွားသည့် အရှိန်ထက် မြန်နှုန်း ၂ ဆ ကျော်မြင့်ပြီး ပျံသန်းနေသည်ကို သိရှိပါလျှက် အနီးအနား လေယာဉ်ကွင်းတစ်ခုတွင် ဆင်းသက်ရန် ကြိုးစားနေစဉ် ပစ်ချခဲ့ခြင်းဖြစ်သည်ဟု အဖြေထုတ်နိုင်ကြောင်း Minval မီဒီယာက ဖော်ပြသွားခဲ့သည်။
အဇာဘိုင်ဂျန်ခရီးသည်တင်လေယာဉ်ကို ရုရှားပစ်ချခြင်းမှာ ပထမဆုံးအကြိမ်မဟုတ်သေးဘဲ ထိုမတိုင်ခင် ၂၀၁၄ ခုနှစ်က ယူကရိန်းတွင် MH 17 ခရီးသည်တင်လေယာဉ်ကိုလည်း ပစ်ချခဲ့သေးသည်။
ကိုကလင်း
Ref:Thesun
#MeKongNews
#ရုရှား
#အဇာဘိုင်ဂျန်
#လေယာဉ်ပျက်ကျ
#ဘာကူမြို့
