မဲခေါင်၊ ဇွန် ၁၆
ကမ္ဘောဒီးယားနိုင်ငံခေါင်းဆောင်အဖြစ် နှစ်ပေါင်းများစွာ အုပ်ချုပ်ခဲ့ပြီး လက်ရှိတွင်မူ သားဖြစ်သူ ဟွမ်မာနက်အား ဝန်ကြီးချုပ်ရာထူးလွှဲပေးခဲ့ကာ အထက်လွှတ်တော် ဥက္ကဌရာထူး ရယူထားသူ ဟွမ်ဆန် က ထိုင်းဘက်မှ နယ်စပ်ဂိတ်တချို့အား ပိတ်ပင်ထားမှုကို ၂၄ နာရီအတွင်း ပြန်မဖွင့်လျှင် မိမိတို့ဘက်မှ နယ်စပ်ဂိတ်အားလုံး ပိတ်ပြီး ထိုင်းမှကုန်စည်များ လုံး၀ ဝင်ရောက်ခွင့်ပြုမည်မဟုတ်ကြောင်း ဇွန် ၁၆ ရက်မနက်တွင် ရာဇသံပေးလိုက်သည်။
ထိုင်းဘက်မှ နယ်စပ်လုံခြုံရေးအကြောင်းပြချက်ဖြင့် တချို့သော အရေးပါသည့် ကမ္ဘောဒီးယားနှင့် နယ်စပ်ဂိတ်များကို တစ်စိတ်တစ်ပိုင်း ပိတ်ထားမှုများရှိနေရာ ဦးစွာ ဂိတ်ပိတ်သူသည် ထိုင်းသာဖြစ်ကြောင်း၊ ထိုင်းဘက်မှ နယ်စပ်ဂိတ်အားလုံးကို ယခင်သဘောတူထားသည့်အတိုင်း မနက် ၆ နာရီမှ ည ၁၀ နာရီအထိ ပြန်မဖွင့်ပေးလျှင် ဇွန် ၁၆ ရက် မနက်ကတည်းက မိမိတို့ဘက်မှ ဂိတ်များအားလုံးကို ပိတ်ကာ ကုန်စည်ဖြတ်သန်းမှုပါ ပိတ်ရန် စီစဉ်ထားကြောင်း ဟွမ်ဆန်က ဆိုသည်။
သို့သော် ယနေ့မနက်တွင် သားဖြစ်သူ ဟွမ်မာနက်နှင့် ထိုင်းဝန်ကြီးချုပ် ပေထောင်တန်တို့ ဖုန်းဆက်ဆွေးနွေးမှုအပြီး နောက် ၂၄ နာရီ ထပ်မံ အချိန်ပေးခဲ့ခြင်းဖြစ်သည်ဟု ဟွမ်ဆန်က ရာဇသံပေး ကြေညာသွားခဲ့သည်။
ကိုကလင်း
Ref: The Nation
#MeKongNews
#ကမ္ဘောဒီယား
#ထိုင်းနိုင်ငံ
#နယ်စပ်ဂိတ်
#ဟွန်ဆန်
