မဲခေါင်၊ ဇွန် ၁၃
ဇွန် ၁၃ ရက် အာရုဏ်မတက်မီ အစ္စရေးဘက်မှ အီရန်ရှိ နျူကလီးယား ပစ်မှတ်များကို တိုက်ခိုက်ခဲ့မှု အပြီး မွန်းလွဲပိုင်းမှာပင် အီရန်ဘက်မှ Shahed ဒရုန်း ၁၀၀ ကျော်ဖြင့် အစ္စရေးနိုင်ငံဆီသို့ ပြန်လည် တုံ့ပြန် တိုက်ခိုက်လာပြီဖြစ်သည်။
အီရတ်တောင်ပိုင်းဒေသပေါ်မှ အီရန်၏ Shahed ဒရုန်းများ အစ္စရေးဆီ ဦးတည်ပျံသန်းနေသည့် ရုပ်သံ သက်သေများလည်း ထွက်ပေါ်လာပြီဖြစ်ကာ အစ္စရေးဘက်မှ လေကြောင်းရန် ကာကွယ်ရေး စနစ်ကို အဆင့်အမြင့်ဆုံးပြန်လည်ပြင်ဆင်ထားသလို နိုင်ငံတော်အရေးပေါ် အခြေအနေလည်း ကြေညာကာ လေကြောင်းလိုင်းအားလုံးလည်း ပိတ်ပြီး အရေးပါသော လေယာဉ်ကွင်းများမှ လေယာဉ်များကိုလည်း ရွှေ့ပြောင်းထားရှိလိုက်ပြီဟု သိရသည်။
အစ္စရေးသည် ဇွန် ၁၃ ရက် အာရုဏ်မတက်မီ အီရန်အား တိုက်ခိုက်မှုတွင် ဖိုက်တာဂျက်လေယာဉ် အစီး ၂၀၀ ကျော် အသုံးပြုခဲ့သလို အီရန်ရှိ ပစ်မှတ် ၁၀၀ ကျော်ကို တိုက်ခိုက်ခြင်းဖြစ်ကြောင်း အစ္စရေး စစ်တပ်မှ အတည်ပြုထုတ်ပြန်ခဲ့သည်။
ထိုတိုက်ခိုက်မှုတွင် တီဟီရန်မြို့တော် တောင်ဘက် ၂၂၅ ကီလို မီတာအကွာရှိ Natanz နျူကလီးယားဆိုက်ကို ထိမှန်ပျက်စီးစေသလို အစ္စလာမ္မစ်တော်လှန်ရေး အစောင့်တပ်မှ အီရန် ဗိုလ်ချုပ် ဟော့ဆိန်းဆလာမီ၊ လက်နက်ကိုင်တပ်ရင်းမှ ဗိုလ်ချုပ် မိုဟာမက် ဘာဂါရီအပါ အီရန် စစ်ဗိုလ်ချုပ်တချို့ သေဆုံးသလို နျူကလီးယားဆိုက်များမှ အီရန်သိပ္ပံပညာရှင် ၂ ဦးလည်း သေဆုံးခဲ့ကြောင်း အီရန် အစိုးရမီဒီယာမှ အတည်ပြုထုတ်ပြန်ခဲ့သည်။
အီရန် ခေါင်းဆောင် အလီခါမီနီက အစ္စရေး ကြမ္မာဆိုးနှင့် ကြိုံစေရမည်ဟု ကျိန်ဆိုကာ လက်တုံ့ပြန်မည် ဟု အတည်ပြုပြီးနောက် ပထမဆုံးအနေဖြင့် အစ္စရေး၏ လေကြောင်းရန် ကာကွယ်ရေးစနစ်ကို သွေးတိုးစမ်းမှုအဖြစ် Shahed ဒရုန်း ၁၀၀ ကျော်ဖြင့် ပြန်လည် တိုက်ခိုက်လိုက်ခြင်းဖြစ်သည်။ Shahed ဒရုန်းများသည် ယူကရိန်းစစ်ပွဲတွင် ရုရှားတပ်များ အသုံးပြုနေသော ဒရုန်းများဖြစ်သည်။
ကိုကလင်း
Ref: independent
#MeKongNews
#အစ္စရေး
#အီရန်
#ဒရုန်းတိုက်ခိုက်မှု
#နျူကလီးယား
