မဲခေါင်၊ စက်တင်ဘာ ၁၅
မြန်မာနိုင်ငံမှ အမျိုးသမီးငယ်များကို တရုတ်နိုင်ငံသို့ အငှားမယားအဖြစ် ရောင်းစားသည့် ဖြစ်ရပ်ပိုမို များပြားလာကြောင်း စစ်ခေါင်းဆောင်ဝန်ခံပြီးနောက် ပို့ဆောင်ရောင်းစားရန် စီစဉ်ခဲ့သူ ၉ ဦးကို ထောင်ဒါဏ် ၁၀ နှစ်မှ နှစ်၂၀ အထိ ချမှတ်ခဲ့ကြောင်း စစ်ကောင်စီက ထုတ်ပြန်ထားသည်။
စစ်ကောင်စီထိန်းချုပ်ထားသည့် ရှမ်းပြည်မြောက်ပိုင်း၊ မူဆယ်မြို့မှ တဆင့် တရုတ်နိုင်ငံသို့ အငှားမယားအဖြစ် ရောင်းစားနေသည့် ဖြစ်စဉ်များ တိုးပွားလာနေပြီး အများစုမှာ Social Media ကို အသုံးပြု၍ စည်းရုံးခေါ်ဆောင်ခြင်း ဖြစ်ကြောင်း စစ်ကောင်စီက ထုတ်ပြန်သည်။
ရှမ်းပြည်တောင်ပိုင်း၊ တောင်ကြီးမြို့တွင် နေထိုင်သူ အမျိုးသမီးတစ်ဦးကို တရုတ်ယောကျ်ားယူလျှင် တရုတ်ငွေ ယွမ် ၁၅၀၀၀ ရရှိမည်ဟု စည်းရုံးပြောဆိုကာ ပို့ဆောင်ရောင်းစားခဲ့ကြသည့် မူဆယ်မြို့နေ သိန်းဇော်လက် (ခ) ဆံရှည်၊ ရွှန်းပြည့်ဟိန်း (ခ) ကိုဟိန်း နှင့် စိုင်းအောင်သိန်းတို့ကို လူကုန်ကူးမှုတားဆီးနှိမ်နင်းရေးဥပဒေဖြင့် အလုပ်ကြမ်းနှင့် ထောင်ဒါဏ် နှစ် ၂၀ စီ ချမှတ်ခဲ့သည်ဟု စစ်ကောင်စီက ထုတ်ပြန်သည်။
ရန်ကုန်တိုင်း၊ ရွှေပြည်သာမြို့နယ် နေထိုင်သူ အမျိုးသမီးတစ်ဦးကိုလည်း တရုတ်ယောကျ်ားအတွက် အငှားမယားအဖြစ် ၆လမှ တစ်နှစ် နေထိုင်ပေးလျှင် ကျပ်သိန်း ၆၀ ရရှိမည်ဟု tiktok အကောင့်တစ်ခုမှ ချိတ်ဆက်လာပြီး မူဆယ်မြို့သို့ ပို့ဆောင်ခဲ့ကာ ရွှေလီမြို့ရှိ ပွဲစား ဒေါ်ပခမ်းမှ တဆင့် ရောင်းစားခဲ့ကြောင်း၊ တရုတ်ယောကျ်ားနှင့် တစ်လခန့် ပေါင်းသင်းနေထိုင်ရပြီး ငွေကြေးတစ်စုံတရာ မရရှိသဖြင့် ထွက်ပြေးလာခဲ့ရာတွင် မူဆယ်မြို့မှ စိုင်းအောင်သိန်းဆိုသူကို အကူအညီတောင်း၍ မြန်မာပြည်ပြန်ရောက်လာခဲ့ကြောင်း၊ ၎င်းက တရုတ်မှ မြန်မာပြည် ပြန်လာရန် ခေါ်ယူခ ယွမ် ၁၃၀၀၀ ကို တောင်းယူရာ မပေးနိုင်သဖြင့် မကြာခဏ ရိုက်နှက်ခြင်း၊ အဓမ္မပြုကျင့်ခြင်းတို့ကို ပြုလုပ်နေရာ ပါတ်ဝန်းကျင်မှ သိရှိ၍ စစ်ဆေးဖမ်းဆီးမိ၍ စိုင်းအောင်သိန်း၊ သက်သက်ဇော် (ခ) အန်တီ သက်နှင့် သက်သက်အေး (ခ) မသက်တို့ကို အလုပ်နှင့် ထောင်ဒါဏ် ၁၀ နှစ် ကျခံစေရန် ချမှတ်ခဲ့သည် ဟု ဆိုသည်။
ရှမ်းပြည်မြောက်ပိုင်း၊ ကွက်ခိုင်မြို့နေ အမျိုးသမီးငယ်တစ်ဦးကိုလည်း တရုတ်ဇနီးမယားအဖြစ် လုပ်ကိုင်ပါက တရုတ်ငွေ ယွမ် ၁၀၀၀၀ ရမည် ဟု ဆိုကာ ရွှေလီမြို့သို့ ပို့ဆောင်ခဲ့ပြီး မြန်မာနိုင်ငံသို့ ပြန်လာကာ နိုင်ငံကူးလက်မှတ် နှင့် ဗီဇာ ပြုလုပ်နေစဉ် စစ်ဆေးပေါ်ပေါက်၍ ပွဲစားဖြစ်သူ တရားခံ မအေးမြတ်မွန်ကို အလုပ်နှင့် ထောင်ဒါဏ် ၁၀ နှစ် စီ ချမှတ်ခဲ့ကြောင်း သိရသည်။
စစ်ကိုင်းတိုင်း၊ ထီးချိုင့်မြို့နေ အမျိုးသမီးတစ်ဦးကိုလည်း တရုတ်မယားအဖြစ်နေလျှင် ကျပ်သိန်း ၄၀၀ ရရှိမည် ဟု ပြောဆိုကာ ဝူဟန်မြို့မှ လာရောက်ခေါ်ဆောင်သည့် ပွဲစားဖြစ်သူ မသင်းသင်းစိုး နှင့် မအိဖြူစိုးတို့ကိုလည်း လူကုန်ကူးမှုတားဆီးရေးဥပဒေအရ အလုပ် နှင့် ထောင်ဒါဏ် ၁၅ နှစ်စီ ချမှတ်ခဲ့သည် ဟု သိရသည်။
စစ်ကောင်စီအာဏာသိမ်းပြီးနောက်ပိုင်း မြန်မာနိုင်ငံတွင် အလုပ်အကိုင်ရှားပါးပြီး ဝင်ငွေ နည်းပါးလာသည့်အတွက် ပြည်ပနိုင်ငံများသို့ သွားရောက်သူ များပြားလာနေသလို တရုတ်နိုင်ငံသို့ ပို့ဆောင်ရောင်းစားသည့် ဖြစ်စဉ်များမှာလည်း ပိုတိုးပွားလာနေသည်။
တရုတ်နယ်စပ် မူဆယ်မြို့တွင် လူကုန်ကူးခံရသည့် ဖြစ်စဉ် အများအပြား ရှိနေသည်မှာ ရှေးယခင်ကတည်းက ဖြစ်ပြီး ဆန္ဒအလျှောက် သွားရောက်သူများနှင့် တရုတ်အငှားမယားအဖြစ် လုပ်ကိုင်နေသူများလည်း ရှိနေ၍ တားဆီးရ ခက်ခဲပြီး အကူအညီတောင်း၍ ပြန်ခေါ်ယူရန်မှာလည်း နေရပ်လိပ်စာ အတိအကျ မသိရ၍ ခေါ်ယူနိုင်ခြင်း မရှိသည့် ဖြစ်စဉ်များလည်း ရှိသည်ဟု မူဆယ်မြို့ရှိ လူကုန်ကူးမှုကူညီပေးနေသူများထံမှ သိရသည်။
ဖေသန်း
#MeKongNews
#ရှမ်းပြည်မြောက်ပိုင်း
#လူကုန်ကူးမှု
#တရုတ်အဌားမယား
#မူဆယ်မြို့
