မဲခေါင်၊ စက်တင်ဘာ ၂၃
ရှမ်းပြည်မြောက်ပိုင်းတွင်ရှိသည့် သတ္တုတွင်းလုပ်ကွက် ၃၁ ခုတို့ကို စစ်ကောင်စီ၊ TNLA နှင့် MNDAA တို့က အများဆုံး အပြည့်အဝ ထိန်းချုပ်ထားသည်ဟု ISP-Myanmar က ယခုလအတွင်း ထုတ်ပြန်သည့် အစီရင်ခံစာတွင်ဖော်ပြချက်အရ သိရသည်။
သတ္တုတွင်းများအနက် စစ်ကောင်စီတပ်က လုပ်ကွက် ၁၀ ခု၊ ၃၂ ရာခိုင်နှုန်းခန့်ကို အပြည့်အဝ ထိန်းချုပ်ထားသည်။ ယင်းလုပ်ကွက်များသည် တန့်ယန်း၊ နောင်ချို၊ သီပေါနှင့် လားရှိုးမြို့နယ်များတွင်ရှိပြီး ကျောက်မီးသွေး၊ ထုံးကျောက်၊ ခဲ၊ ဂေါဒန်ကျောက်နှင့် ငွေသတ္တုများကို တူးဖော်နေသည်ဟု ISPကဆိုသည်။
“တန့်ယန်းမြို့နယ်ထဲမှာ ကျောက်မီးသွေးတူးဖော်နေသည့် လုပ်ကွက် ၄ ခုထက်မနည်းကို မြန်မာစစ်တပ်က ထိန်းချုပ်ထားပါတယ်။ အဲဒီဒေသမှာ UWSA တပ်ဖွဲ့တွေလည်း လှုပ်ရှားနေကြတယ်”ဟု ISP က အစီရင်ခံစာတွင် ပြောသည်။
ထို့အပြင် တအာင်းတပ်ဖွဲ့ (TNLA) က သတ္တုတွင်းလုပ်ကွက် ၉ ခု၊ ၂၉ ရာခိုင်နှုန်းကို အပြည့်အဝ ထိန်းချုပ်ထားသည်။ ယင်းလုပ်ကွက်များသည် နမ္မတူ၊ ကျောက်မဲ၊ နမ့်ခမ်းနှင့် မန်တုံမြို့နယ်များတွင် တည်ရှိပြီး ခဲ၊ ငွေ၊ ရွှေ၊ ဆီလီကွန်ကျောက်၊ စကျင်ကျောက်၊ သွပ်၊ ကြေးနီ၊ သလင်းကျောက်၊ ကျောက်မီးသွေးနှင့် နဝရတ်ကျောက်များထွက်ရှိသည်ဟုဆိုသည်။
ကိုးကန့်တပ်ဖွဲ့ (MNDAA) ကမူ လုပ်ကွက် ၈ ခု၊ ၂၆ ရာခိုင်နှုန်းနီးပါးကို အပြည့်အဝ ထိန်းချုပ်ထားသည်။ ကိုးကန့်တပ်ဖွဲ့ ထိန်းချုပ်သည့် သတ္တုတွင်း အများစုသည် သီပေါမြို့နယ်၊ နမ္မကျေးရွာအုပ်စုအတွင်းတွင် ရှိသည့် ကျောက်မီးသွေးလုပ်ကွက်များ ဖြစ်သည်။
ယင်းဒေသတွင် ရှမ်းတပ်တဖွဲ့ (SSPP/SSA) ကလည်း လှုပ်ရှားနေသဖြင့် ၂၀၂၅ ခုနှစ် နှစ်ဆန်းပိုင်း၌ ကျောက်မီးသွေးတွင်း ထိန်းချုပ်ရေးနှင့်ပတ်သက်ပြီး တိုက်ပွဲများဖြစ်ပွားခဲ့သေးသည်။
လက်ရှိတွင် ယင်းဒေသကို MNDAA က ဆက်လက်ထိန်းချုပ်ထားပြီး ထွက်ရှိသည့် ကျောက်မီးသွေးများကို သိန္နီ-ကွမ်းလုံ-ချင်းရွှေဟော် လမ်းကြောင်းမှ တရုတ်နိုင်ငံသို့ တင်ပို့နေသည်ဟု ISP ကဆိုသည်။
အဆိုပါ သတ္တုတွင်းလုပ်ကွက် ၃၁ ခုအနက် ၂၆ ခုကို ပြည်တွင်းကုမ္ပဏီများက တူးဖော်ခွင့်ရထားပြီး ကျန် ၅ ခုအား မည်သည့်ကုမ္ပဏီများက တူးဖော်နေသည်ကို မသိရကြောင်း ၊ သတ္တုတွင်း လုပ်ကွက် ၂၄ ခုသည် လက်ရှိအချိန်အထိ တူးဖော်မှုများ ဆက်လက်လုပ်ဆောင်နေသည်ဟု ဆိုသည်။
သတ္တုတွင်းလုပ်ကွက်များတွင် ကျောက်မီးသွေးတူးဖော်သည့် လုပ်ကွက်သည် အများဆုံးဖြစ်ပြီး ခဲသတ္တုတွင်းသည် ဒုတိယအများဆုံးနှင့် ရွှေသတ္တုတွင်းသည် တတိယအများဆုံး ဖြစ်သည်။ မြို့နယ်အလိုက် သတ္တုတွင်းအများဆုံးရှိသည့်နေရာသည် သီပေါမြို့နယ်ဖြစ်ပြီး လုပ်ကွက် ၇ ခုထက်မနည်း ရှိသည်ဟုဆိုသည်။
ရှမ်းမြောက်ရှိ သတ္တုတွင်းလုပ်ကွက် ၃၁ ခုတွင် အရေးပါမှုအဆင့် မြင့်မားသည့်လုပ်ကွက် ၂ ခုနှင့် အလယ်အလတ်အဆင့် အရေးပါသည့်လုပ်ကွက်များ စုစုပေါင်း ၁၅ ခုရှိသည်။ အရေးပါမှုအဆင့်မြင့်သည့် နမ္မတူသတ္တုတွင်းကို TNLA က ထိန်းချုပ်ထားပြီး မိုင်းမောသတ္တုတွင်းကို UWSA က ထိန်းချုပ်ထားသည်။
မိုင်းမောသတ္တုတွင်းသည် ကမ္ဘာ့သံဖြူထုတ်လုပ်မှုတွင် အရေးပါသည့် သတ္တုတွင်းတစ်ခုဖြစ်သည်။ မြန်မာနိုင်ငံသည် ကမ္ဘာ့သံဖြူကုန်ကြမ်းထုတ်လုပ်မှု၏ ၁၁ ရာခိုင်နှုန်းနီးပါးကို နှစ်စဉ်ထုတ်လုပ်ပေးနေပြီး ယင်းကုန်ကြမ်းအများစုကို မိုင်းမောသတ္တုတွင်းက ထုတ်လုပ်ပေးခြင်းဖြစ်သည်။
အလယ်အလတ်အဆင့် အရေးပါသည့် သတ္တုတွင်း ၁၀ ခုကိုမူ MNDAA က ၆ ခု၊ TNLA နှင့် KIA က ၃ ခုစီ၊ စစ်ကောင်စီတပ်က တစ်ခု ထိန်းချုပ်ထားကြောင်း ISP ကထုတ်ပြန်သည့် အစီအရင်ခံစာတွင်ဖော်ပြသည်။
#MeKongNews
#ရှမ်းမြောက်
#သတ္တုတွင်း
#စစ်ကောင်စီ
#တအာင်းတပ်
#ကိုးကန့်တပ်
