မဲခေါင်၊ အောက်တိုဘာ ၂၂
ရှမ်းပြည်တောင်ပိုင်း၊ လဲချား-မိုင်းနောင်လမ်းပေါ်ရှိ မက်လန်းစစ်ကောင်စီစစ်ဆေးရေးဂိတ်တွင် ည ၈ နာရီမှ မနက် ၆ နာရီအထိ ယာဉ်ဖြတ်သန်းခွင့် ပိတ်ပင်ထားသဖြင့် ကုန်စည် ကုန်စိမ်းပို့ဆောင်ရေးအတွက် မလိုအပ်ပဲ နှောင့်နှေးစေသည်ဟု သတင်းရင်းမြစ်များကပြောသည်။
ထို့အပြင် ဖြတ်သန်းသွားလာသည့် ကုန်တင်ယာဉ်များထံမှ ငွေကြေးတောင်းခံမှုများလည်း ရှိနေသဖြင့် ကုန်စည်ပို့ဆောင်ရေးနှင့် ခရီးသွားလာရေး အခက်အခဲများ ကြုံတွေ့နေရသည်ဟုလည်း သတင်းရင်းမြစ်များထံမှ သိရသည်။
အဆိုပါဂိတ်သည် ညပိုင်းယာဉ်သွားလာမှုကို အချိန်ကန့်သတ်ပိတ်ပင်ထားဆဲဖြစ်ပြီး မိုင်းနောင်၊ မိုင်းရှူးနှင့် အနီးဝန်းကျင်မြို့များသို့ ကုန်စိမ်းနှင့် စားသောက်ကုန်များ ပို့ဆောင်နေသည့် ကုန်သည်များအတွက် အဓိကအခက်အခဲ ဖြစ်ပေါ်စေကြောင်း သိရသည်။
အထူးသဖြင့် နံနက်စောစော ကုန်ပစ္စည်းများ သွားရောက်ပို့ဆောင်ရသည့် ယာဉ်များသည် ဂိတ်ဖွင့်ချိန်အထိ စောင့်ဆိုင်းနေရပြီး ဖြတ်သန်းခွင့်ရရှိရန် ငွေကျပ် ၃ သောင်းမှ ၄ သောင်းအထိ ပေးဆောင်ရသည့် ဖြစ်စဉ်များရှိကြောင်း ကိုယ်တိုင်ကြုံတွေ့ခဲ့ရသူများက ပြောသည်။
“ဒီဂိတ်မှာတော့ မနက် ၆ နာရီမထိုးမချင်း ကားတွေတန်းစီစောင့်နေရတယ်။ ကုန်စိမ်းကားတွေချည်းပဲ တန်းစီတာ အစီး ၆၀ ကျော်တယ်။ ဖွင့်ပြီဆိုတာနဲ့လည်း ငွေပေးရတာရှိတော့ ကုန်ပို့တဲ့သူတွေအတွက် အချိန်ရော ငွေရော ပိုကုန်တယ်” ဟု ငွေပေးဆောင်ခဲ့ရသူတစ်ဦးက ပြောသည်။
လဲချားမြို့သည် လဲချား-မိုင်းနောင်-မိုင်းရှူးနှင့် မိုင်းကိုင်၊ ကျေးသီး၊ မိုင်းရယ်မြို့များသို့ ဆက်သွယ်သည့် လမ်းကြောင်းပေါ်တွင် တည်ရှိပြီး ရှမ်းတောင်ဒေသထွက် သီးနှံနှင့် စားသောက်ကုန်များ ဖြန့်ဖြူးပို့ဆောင်ရာ၌ အရေးပါသည့် နေရာတစ်ခုဖြစ်သည်။
လဲချားမှတစ်ဆင့် မိုင်းကိုင်၊ မိုင်းနောင်၊ မိုင်းရှူးနှင့် ကျေးသီးမြို့များသို့ ကုန်စိမ်းနှင့် စားသောက်ကုန်များ နေ့စဉ်ပို့ဆောင်နေရသော်လည်း မက်လန်းဂိတ်၏ ညပိုင်းဖြတ်သန်းခွင့်ပိတ်ပင်မှုကြောင့် ကုန်စည်ပို့ဆောင်ချိန် နောက်ကျခြင်းနှင့် ခရီးစဉ်အချိန်ဇယား ပျက်ယွင်းခြင်းများ ဖြစ်ပေါ်နေကြောင်း သိရသည်။
“ဂိတ်ပိတ်ထားတော့ မနက်ပိုင်း ကုန်သွားပို့ရမယ့်ကားတွေ အားလုံး စောင့်နေရတယ်။ ကုန်စိမ်းဆိုတာ အချိန်ကြာလေ ဈေးကျလေဖြစ်လို့ ဈေးကွက်ကို နောက်ကျမှရောက်ရင် အရှုံးခံရောင်းရတာတွေရှိတယ်။ ဂိတ်ဖြတ်ဖို့ ငွေပါပေးရတော့ ကုန်သည်တွေအတွက် အခက်အခဲနှစ်ဆဖြစ်နေတယ်” ဟု ကုန်သည်တစ်ဦးက ပြောသည်။
ထို့ပြင် ဂိတ်တွင် စောင့်ဆိုင်းနေရခြင်းကြောင့် ကုန်သည်အချို့သည် နေအိမ်သို့ အချိန်မီပြန်မရောက်နိုင်ဘဲ လမ်းတစ်လျှောက် ညအိပ်စောင့်ဆိုင်းရသည့် အခြေအနေများလည်း ရှိနေကြောင်း ဒေသခံများက ပြောသည်။
“ကုန်စိမ်းတွေက အချိန်ကြာရင် လတ်ဆတ်မှုလျော့ပြီး ဈေးကျတတ်တယ်။ ဂိတ်မှာကြာနေလို့ ဈေးကွက်ကို နောက်ကျမှရောက်ရင် အရှုံးခံပြီး ရောင်းရတာတွေရှိတယ်။ တချို့ဆို ကုန်မကုန်သေးပေမဲ့ အိမ်ပြန်နောက်ကျမှာစိုးလို့ စောစောပြန်ရတယ်” ဟု ကုန်သည်တစ်ဦးက ပြောသည်။
ယာဉ်ဖြတ်သန်းခွင့်ပိတ်ပင်မှုအပြင် စစ်ကောင်စီစစ်ဆေးရေးဂိတ်မှ တာဝန်ရှိသူများက ကုန်စိမ်းတင်ယာဉ်များထံ အကြောင်းအမျိုးမျိုးပြကာ ငွေကျပ် ၃ သောင်းမှ ၁ သိန်းအထိ တောင်းခံမှုများရှိကြောင်း သတင်းရင်းမြစ်များက ဆိုသည်။ ယင်းငွေကြေးတောင်းခံမှုများကြောင့် ကုန်ပို့ဆောင်ရေးစရိတ် ပိုမိုမြင့်တက်လာပြီး ကုန်သည်များအပေါ် ဝန်ထုပ်ဝန်ပိုး ဖြစ်စေကြောင်း သိရသည်။
လဲချားမြို့နယ်သည် အနီးဝန်းကျင်မြို့များသို့ ဆက်သွယ်သည့် လမ်းကြောင်းပေါ်တွင် တည်ရှိသည့်အတွက် ကုန်တင်ယာဉ်များအပါအဝင် နေ့စဉ် ခရီးသွားယာဉ်အများအပြား ဖြတ်သန်းသွားလာလျက်ရှိသည်။ ဒေသခံများနှင့် ကုန်သည်များက တိုက်ပွဲဖြစ်ပွားနေသည့် ဒေသမဟုတ်ဘဲ တည်ငြိမ်သည့် လဲချားမြို့နယ်တွင် ယာဉ်ဖြတ်သန်းချိန် ကန့်သတ်ထားမှုကို ပြန်လည်ရုပ်သိမ်းပေးရန် လိုလားနေကြသည်။
#MeKongNews
#လဲချား
#မိုင်းနောင်
#မက်လန်း
#စစ်ကောင်စီ
#ကုန်စည်စီးဆင်းမှု
#ပိတ်ပင်
