မဲခေါင်၊ ဩဂုတ် ၂၂
ပြီးခဲ့သည့် တစ်နှစ်အတွင်း ရှမ်းပြည်အတွင်းရှိ စစ်ဆေးရေးဂိတ်များတွင် ငွေတောင်းစားသည့် ရဲတပ်ဖွဲ့ဝင် ၃ ဦးကို အရေးယူခဲ့သည်ဟု စစ်ကောင်စီ၏ ရှမ်းပြည်နယ်အစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီးက ပြောသည်။
ကျိုင်းတုံ လွှတ်တော်ကိုယ်စားလှယ် ဦးစိုင်းဟွမ်နွဲ့ ၏ တာချီလိတ် −တောင်ကြီး လမ်းကြောင်းတစ်လျှောက် ဖွင့်လှစ်ထားရှိသည့် စစ်ဆေးရေးဂိတ်များတွင် ငွေကြေးကောက်ခံနေမှုအား မည်ကဲ့သို့ဆောင်ရွက်ပေးမည်ကို မေးမြန်းရာတွင် လုံ/နယ်ဝန်ကြီး ဗိုလ်မှူးကြီးစိန်ဝင်းက ယင်းကဲ့သို့ ဖြေကြားခြင်း ဖြစ်သည်။
၂၀၂၄ ခုနှစ်တွင်မူ စစ်ဆေးရေးဂိတ်တွင် ငွေတောင်းသည့် ရဲ ၁၅ ဦးကို အရေးယူခဲ့သည်ဟု လုံခြုံရေးနှင့် နယ်စပ်ရေးရာဝန်ကြီး ဗိုလ်မှူကြီး စိန်ဝင်းကပြောသည်။
“စစ်ဆေးရေးဂိတ်များမှာ တရားမဝင် ငွေးကြေးတောင်းခံတဲ့ ရဲတပ်ဖွဲ့ဝင်များကို ရဲစည်းကမ်းထိန်းသိမ်းရေးဥပဒေနဲ့ ၂၀၂၄ ခုနှစ်မှာ ၁၅ ဦး၊ ၂၀၂၅ ခုနှစ်မှာ ၃ ဦး အရေးယူဆောင်ရွက်ခဲ့ပါတယ်” ဟု ၎င်းကပြောသည်။
ထို့အပြင် စစ်ဆေးရေးဂိတ်များမှ ငွေကြေးတောင်းခံပါက သက်ဆိုင်ရာဌာနများသို့ အချက်အလက်မှန်ကန်စွာဖြင့် သတင်းပေးပို့ တိုင်ကြားနိုင်သည်ဟုလည်း ၎င်းကဆိုသည်။
စစ်ကောင်စီ၏ ရှမ်းပြည် လုံ/နယ်ဝန်ကြီး ပြောကြားချက်သည် မြေပြင်အခြေအနေနှင့်များစွာ ကွာဟနေသည်ဟု ကုန်ကားသမားများကပြောသည်။
“တကယ်အရေးယူမယ်ဆို ဂိတ်တိုင်းက ပိုက်ဆံတောင်းနေတာပဲလေ။ ပြီးတော့ တဂိတ်လုံး အတူတူဝေစားကြတာပဲ။ တကယ်အရေးယူချင်ရင် အကုန်အရေးယူရမှာပေါ့။ အခုက တစ်နှစ်လုံးနေမှ ၃ ယောက်အရေးယူတာဆိုတော့ အရေးယူခံရတဲ့ကောင်က တော်တော်ကံဆိုးနေလို့ဖြစ်မယ်” ဟု ကုန်ကားသမားတစ်ဦးကပြောသည်။
ကုန်တင်ယာဉ်မောင်းသူများ၏ ပြောဆိုချက်အရ တောင်ကြီး-ကျိုင်းတုံအား ကားကြီးများဖြင့် ဆန်သယ်ယူရာတွင်ပင် လမ်းတစ်လျှောက်ရှိ ဂိတ်ပေါင်း ၂၀ ကျော်ကို ပေးရသည့် ဂိတ်ကြေးမှာ သိန်း ၇၀ ကျော်ရှိသည်။
“အဆိုဆုံးက တာကော်တံတား အဲ့မှာရှိတဲ့ စုပေါင်းဂိတ်က ၅ သိန်း အနည်းဆုံးပေးရတယ်” ဟု ကုန်တင်ကားသမားတစ်ဦးကပြောသည်။
တာချီလိတ်မှ တောင်ကြီးအထိ လမ်းကြောင်းတစ်လျှောက်တွင်ရှိသည့် စစ်ဆေးရေးဂိတ်များသည် ခရီးသွားပြည်သူများသာမက လွှတ်တော်ကိုယ်စားလှယ်များကိုပါ တင်းကြပ်စွာ စစ်ဆေးခြင်း၊ ခရီးသွားများအား ငွေကြေးတောင်ခြင်း စသည့် မလိုလားအပ်သည့် စစ်ဆေးမှုများပြုလုပ်ခြင်းကြောင့် အချိန်ကြန့်ကြာကာ အကျပ်အတည်းဖြစ်စေသည်ဟု ကျိုင်းတုံ လွှတ်တော်ကိုယ်စားလှယ်က ပြောသည်။
တောင်ကြီး−ဟိုပုံး−လွိုင်လင်−နမ့်စန်−မိုင်းပျဥ်း−ကျိုင်းတုံ−တာချီလိတ် လမ်းမကြီးသည် အရေးပါသည့် ကုန်သွယ်ရေးလမ်းကြောင်းတစ်ခု ဖြစ်ပြီး ထိုင်းကုန်စည်များကို အများအပြားတင်သွင်းရာ လမ်းကြောင်းလည်း ဖြစ်သည်။
#MeKongNews
#စစ်ဆေးရေး
#ရှမ်းပြည်
#ငွေတောင်း
#စစ်ကောင်စီ
