မဲခေါင်၊ အောက်တိုဘာ ၁၀
အစ္စရေးဘက်က တိုက်ခိုက်လို့ သေဆုံးသွားတဲ့ ဟစ်ဇ်ဘိုလာခေါင်းဆောင်နေရာမှာ အစားဝင်ဖို့ ပြင်ဆင်နေတဲ့ ၇၁ နှစ်အရွယ် နာအင်ကက်ဆမ်ဟာ အောက်တိုဘာ ၈ ရက်နေ့မှာ စစ်ပွဲပြင်းထန်နေတဲ့ လက်ဘနွန်နိုင်ငံထဲက မြေအောက်ဘန်ကာကနေ ရုပ်သံတိုက်ရိုက်ထုတ်လွှင့်ပြီး အစ္စရေးနိုင်ငံထဲ ဒုံးကျည်မိုးရွာမယ်လို့ ခြိမ်းခြောက်ပြီးတာနဲ့ အစ္စရေးဘက်ကို ဒုံးကျည် ၁၀၅ လုံး ပစ်ခတ်တိုက်ခိုက်ခဲ့ပါတယ်။
အစ္စရေးမြောက်ပိုင်း မြို့တော် ဟိုင်ဖာမြို့ကို ဟစ်ဇ်ဘိုလာရဲ့ အကြီးမားဆုံးတိုက်ခိုက်မှုအဖြစ် ဒုံးကျည် ၁၀၅ လုံး နဲ့ ပစ်ခတ်မှုမှာ အစ္စရေးရဲ့ အစွမ်းထက်လွန်းတဲ့ Iron Dome လေကြောင်းရန်ကာကွယ်ရေးစနစ်ကလည်း ဖျက်ချနိုင်စွမ်းမြင့်မာစွာ တန်ပြန်နိုင်ခဲ့ပါတယ်။ ဟိုင်ဖာမြို့ဟာ အစ္စရေးရဲ့ လူဦးရေ တတိယအထူထပ်ဆုံးမြို့ဖြစ်ပြီး လူပေါင်း ၂၆၀,၀၀၀ နေထိုင်ရာ ဒေသဖြစ်ပါတယ်။
အစ္စရေး လေကြောင်းရန်ကာကွယ်ရေးစနစ်က ဒုံးကျည်အများစုကို ဖျက်ချနိုင်ခဲ့ပေမယ့် မြို့မြောက်ပိုင်း နေရာတွေမှာ ကျရောက်ပေါက်ကွဲမှုနဲ့ ပျက်စီးထိခိုက်မှုတွေလည်း ရှိခဲ့ကြောင်း၊ အရေးပေါ်လူနာတင်ယာဉ် အသင်းဝင်တစ်ဦး ပြောဆိုချက်အရ ၇၁ နှစ်အရွယ် အဖွားအိုတစ်ယောက် ချွန်ထက်တဲ့ အရာနဲ့ ထိခိုက်မိမှုမျိုး ဖြစ်ပွားခဲ့ပေမယ့် တခြားဆိုးဆိုးရွားရွား ဒဏ်ရာရရှိမှုမျိုး၊ သေဆုံးမှုမျိုး အစ္စရေးမှာ မဖြစ်ခဲ့ဘူးလို့ ဆိုပါတယ်။
ဟိုင်ဖာနဲ့ ကရာယွတ်မြို့တွေကို ပစ်ခတ်မှုအပြီး နောက်ထပ် ဒုံးကျည် အလုံး ၂၀ နဲ့ ထပ်ပစ်ခတ်သေးပေမယ့် Iron Dome ဖျက်ဒုံးတွေကနေ အကုန် ကြားဖြတ်ပစ်ချနိုင်ခဲ့ကြောင်းလည်း သိရှိရပါတယ်။
အစ္စရေးတပ်တွေဟာ လက်ဘနွန်ထဲကို စစ်ကြောင်းထိုးဝင်နေသလို လေကြောင်းတိုက်ခိုက်မှုလည်း ဆက်တိုက် လုပ်ဆောင်နေရာမှာ ဟစ်ဇ်ဘိုလာခေါင်းဆောင် ဒါဇင်ချီကို သုတ်သင်အပြီး အောက်တိုဘာ ၈ ရက်နေ့က အီရန်ဆီကနေ လက်နက်တွေ တင်သွင်းပေးတဲ့ ထောက်ပို့အကြီးအကဲ ဆူဟေးဟက်ဆိန်း ကိုလည်း သုတ်သင်နိုင်ခဲ့ပြီဖြစ်ကြောင်း ထုတ်ပြန်ကြေညာသွားခဲ့ပါတယ်။
အီရန်ကတော့ အစ္စရေးလုပ်ကြံမှုနဲ့ သေဆုံးသွားတဲ့ ဟစ်ဇ်ဘိုလာ ခေါင်းဆောင် နက်စ်ရယ်လာနေရာမှာ နာအင်ကက်ဆမ်ကို အစားထိုးခန့်အပ်ဖို့ စီစဉ်ပေးနေပြီဖြစ်ကြောင်းလည်း သတင်းတွေက ဆိုပါတယ်။
Ref:Thesun
MKF-001
