မဲခေါင်၊ ဖေဖော်ဝါရီ ၂၃
ရန်ကုန်တိုင်း၊ လှည်းကူးမြို့နယ်၊ ရိပ်သာရပ်ကွက်၊ မေဃဝတီ (၄) လမ်းရှိ နေအိမ်တစ်လုံးမှာ မနေ့ ဖေဖော်ဝါရီ ၂၂ ရက်၊ ည ၈ နာရီကျော်က ၅ လောင်းပြိုင် လူသတ်မှု ဖြစ်ပွားခဲ့ပြီး ပြစ်မှုကျူးလွန်သူတွေ လွတ်မြောက်သွားမှာကို စိုးရိမ်တယ်လို့ မိသားစုဝင်တွေနဲ့ ရင်နှီးသူ တစ်ဦးက မဲခေါင်သတင်းကို ပြောပါတယ်။
၃ နှစ်အရွယ် ကလေးငယ် အပါအဝင် အသတ်ခံရတဲ့ မိသားစုဟာ ငါးခြောက်၊ ပုစွန်ခြောက် အွန်လိုင်းမှ ရောင်းဝယ်နေသူတွေ ဖြစ်ပြီး သေနတ်နဲ့ ပစ်သတ်ခံရခြင်း ဖြစ်ကာ သူတို့ဟာ ဒလန်မဟုတ်သလို PDF ကို ထောက်ပံ့ နေသူတွေ မဟုတ်ဘူးလို့ သူက ပြောပါတယ်။
“ သေတဲ့သူတွေက ရပ်ကွက်ထဲမှာ အေးဆေးနေတဲ့ သူတွေပါ။ ခုလို အသတ်လည်း ခံရတယ်။ ထင်ရာမြင်ရာတွေ ပြောနေတာတော့ မကောင်းပါဘူး။ လူမှုရေး ကိစ္စကြောင့် သတ်တာလည်း ဖြစ်နိုင်ပါတယ်။ အကြောင်းအရင်း အဖြစ်မှန် ပေါ်ဖို့ လိုတယ်။ ဒီလို အမှုတွေက လှည်းကူးမှာတော့ မဖြစ်ဖူးပါဘူး။ အသက် ၃ နှစ်အရွယ် ကလေးကိုပါ သတ်တာကိုတော့ တစ်ရပ်ကွက်လုံး ဒေါသထွက်ကြတယ်။ ခေါတ်အခြေအနေအရတော့ အမှုမှန်ပေါ်ဖို့ ဝေးတယ်လို့ ထင်တယ်” လို့ ရပ်ကွက်နေ ပြည်သူ တစ်ဦးက ပြောပါတယ်။
အခု ဖြစ်ပွားခဲ့တဲ့ ၅ လောင်းပြိုင် လူသတ်မှုမှာတော့ အသက် ၃ နှစ်အရွယ် ကလေးငယ် အပါအဝင် ဒေါ်စန်းနွဲ့၊ သားဖြစ်သူ မောင်မောင်၊ သမီးဖြစ်သူ မဝင်းနွယ်နဲ့ အသက် ၈၅ နှစ်အရွယ် ဦးလေးဖြစ်သူတို့ သေနတ် ဒဏ်ရာတွေနဲ့ နေအိမ်ဧည့်ခန်းမှာ သေဆုံးနေတာဖြစ်ပြီး နေအိမ်အတွင်းက ပစ္စည်းတွေ ရှာဖွေယူဆောင်သွားတာ မရှိဘူးလို့ လူသတ်မှု ဖြစ်ပွားခဲ့တဲ့ နေအိမ် ရောက်ရှိခဲ့သူ တစ်ဦးက ပြောပါတယ်။
၂၀၁၆ ခုနှစ်က မင်္ဂလာဒုံမြို့နယ်၊ ပတ္တမြားမြို့သစ်မှာ ကိုစိုးနောင်နဲ့ ဇနီးဖြစ်သူ အပါအဝင် ကလေးငယ် ၂ ဦးကို ဓားနဲ့ အချက်များစွာ ထိုးသတ်ခဲ့မှု ဖြစ်ပွားခဲ့ပြီး ရဲတပ်ဖွဲ့ အနေနဲ့ ယနေ့ချိန်ထိ တရားခံ အစစ်အမှန် ဖော်ထုတ်နိုင်ခဲ့ခြင်း မရှိဘူးလို့ သိရပါတယ်။
အလားတူ ကမာရွတ်မြို့နယ်၊ စိမ်းလဲ့ကန်သာလမ်းမှာ ၂၀၀၈ ခုနှစ်၊ မတ်လက ဖြစ်ပွားခဲ့တဲ့ ၅ လောင်းပြိုင် လူသတ်မှုမှာလည်း ယနေ့အချိန်ထိ တရားခံတွေ ဖမ်းဆီရမိခဲ့ခြင်း မရှိသေးပါဘူး။
MK-005