မဲခေါင်၊ သြဂုတ် ၂
ရှမ်းပြည်နယ်ရဲ့ မြို့တော် တောင်ကြီးမြို့၊ ကျောင်းကြီးစုရပ်ကွက်၊ ကျောက်တစ်လုံး လမ်းမကြီးဘေး၊ အဝေရာ မီးပုံးပျံကွင်းမှာ မနေ့ ဩဂုတ်လ ၁ ရက်၊ နေ့လယ် ၁၂ နာရီခန့်က ရဲအသွင်ယူ လက်ထိပ်ခတ် ဓါးပြတိုက်မှု ဖြစ်ပွားခဲ့တယ်လို့ ရပ်ကွက်နေ ပြည်သူတွေက ပြောပါတယ်။
တောင်ကြီးမြို့ရှိ ရှမ်းပြည်နယ် နှစ်ခြင်းခရစ်ယာန် ကျမ်းစာသင်ကျောင်းက ကျောင်းသား တစ်ဦးဟာ သူနေထိုင်တဲ့ ရွာကနေ တောင်ကြီးမြို့ပေါ် ပြန်လာစဉ် မီးပုံပျံကွင်းက ဇရပ်မှာ ခဏတာ မိုးဝင်ခိုရာက ဓါးပြတိုက်ခံလိုက်ရတာ ဖြစ်တယ်လို့ နီးစပ်သူ တစ်ဦးက ပြောပါတယ်။
“သူက ဇရပ်မှာ မိုးခိုနေတဲ့ အချိန်မှာ ရဲလိုလို ဘာလိုလို လူ ၂ ယောင် ရောက်လာပြီး ဖုန်းစစ်မယ် ဆိုပြီး တောင်းတယ်။ ပြီးတော့ သူ့ကို လက်ထိပ်ခတ် ဓါးထောက်ပြီး အကုန်လုသွားတယ်” လို့ သူက ရှင်းပြပါတယ်။
လုယက်ခံရသူဟာ အသက် ၂၀ ဝန်းကျင်အရွယ် ဖြစ်ပြီး ဖုန်း၊ ကျောင်းစရိတ်တွေ စုထည့်ထားတဲ့ ပိုက်ဆံအိတ် အပြင် ဆိုင်ကယ်ပါ လုယက် ခံလိုက်ရတယ်လို့ သူက ဆက်ပြောပါတယ်။
လုယက်သူ ၂ ဦးဟာ အသက် ၄၅ နှစ် ဝန်းကျင်တွေ ဖြစ်ပြီး ရဲအသွင် ယူထားတယ်လို့ ဆိုပါတယ်။
“အရိုက်တော့ မခံရဘူး။ သူက ရဲထင်ပြီး အသာတကြည် ပေးလိုက်တာ။ တစ်ယောက်ထဲ မသွားသင့်တဲ့ နေရာ ဖြစ်နေပြီ။ တစ်နေရာရာ သွားရင် မိုးမခိုရအောင် ထီး၊ မိုးကာ အပြည့်စုံ ဆောင်ထားသင့်တယ်” လို့ လုယက်ခံရသူနဲ့ နီးစပ်သူ နောက်တစ်ဦးက ပြောပါတယ်။
လုယက်ခံရစဉ် ဘေးနားကလူတွေ တွေ့မြင်နေကြပေမယ့် ဝိုင်းမကူဘဲ အလုခံရသူ ကျောင်းသားဟာလည်း ဓါးထောက်ခံထားရတာကြောင့် အော်ဟစ် အကူအညီတောင်းလို့ မရဘူးလို့ ဆိုပါတယ်။
အဝေရာ မီးပုံးပျံကွင်းဘေးက ဘူတာအနီးမှာ ရဲကင်းရှိပြီး မီးပုံးပျံကွင်း အရှေ့ဘက်ဇရပ် ယာယီ ကျန်းမာရေးဌာနမှာ ရဲ ၂ ဦး အမြဲစောင့်နေတဲ့ကြားက အခုလို ဓါးပြတိုက်သွားတာကြောင့် အံ့ဩမိတယ်လို့ တောင်ကြီးမြို့ခံတွေက ပြောပါတယ်။
CJ-007
#MekongNews
#တောင်ကြီးမြို့
#အဝေရာ_မီးပုံးပျံကွင်း
#ဓားထောက်လုယက်
