မဲခေါင်၊ ဧပြီ ၁၉

ရှမ်းပြည်နယ်အရှေ့ပိုင်း၊ တာချီလိတ်မြို့မှာ ဓာတ်ဆီဘူးကိုင်ထားတဲ့သူအပေါ် ဆေးလိပ်မီးပွါးကျလို့ မီးလောင်မှု ဧပြီလ ၁၈ရက်က ဖြစ်ပွားခဲ့တယ်လို့ ဒေသခံတစ်ဦးက မဲခေါင်သတင်းကိုပြောပါတယ်။

တာချီလိတ်မြို့ လွယ်တော်ခမ်း-ညောင်လွတ် သက်တော်ရှည်ဘုန်ကြီးကျောင်းနားမှာ နေတဲ့ ကိုဖိုးခွားဆိုသူ မနေ့က မတော်တဆမီးလောင်ခဲ့တာဖြစ်ပြီး ခန္ဓာကိုယ်အနှံ့ ဒဏ်ရာရခဲ့တယ်လို့ ဒေသခံ တစ်ဦးကပြောပါတယ်။

“ ဖြစ်တာကတော့ မနေ့က မွန်းလွဲပေါ့။ ၃ နာရီလောက်ဖြစ်မယ်။ သူက ဆိုင်ကယ်ဆီထည့်ဖို့ ထင်တယ် ဓာတ်ဆီဘူး ကိုင်ထားတဲ့အချိန်ဘေးကလူက ဆေးလိပ်သောက်နေတော့ မီးပွားကျသွားပြီး ထလောင်တာ။ တော်သေးတယ်။ မသေတာပဲ။ ဒဏ်ရာတွေတော့များတယ်။ မီးလောင်ဒဏ်ရာတွေပေါ့” လို့ သူကပြောပါတယ်။

ခန္ဓာကိုယ်အနှံ့ နဲ့ မျက်နှာ မှာ မီးလောင် ဒဏ်ရာတွေရခဲ့ပေမဲ့ စိုးရိမ်စရာတော့မရှိပဲ တာချီလိတ်လူမှုကူညီရေးအသင်းတစ်ခုက တာချီလိတ်ဆေးရုံကို ပို့ဆောင်ပေးခဲ့တယ်လို့ ကူညီခဲ့သူတွေနဲ့ နီးစပ်သူတစ်ဦးကပြောပါတယ်။

ဓာတ်ဆီတို့လို လောင်ကျွမ်းလွယ်တဲ့ အရာတွေနား မီးလောင်လွယ်တဲ့ပစ္စည်းတွေယူမလာကြဖို့ နဲ့ မီးလောင်လွယ်တဲ့ပစ္စည်းတွေကို ဂရုစိုက် ကိုင်တွယ်ပေးကြဖို့ လူမှုကူညီရေးအသင်းတစ်ခုက ပြည်သူတွေကို အသိပေးထားပါတယ်။

MK-007

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)